قازاقستان مەن ۋكراينا سىرتقى ىستەر مينيسترلەرى ب ۇ ۇ باس اسسامبلەياسىنىڭ سەسسياسىندا كەزدەستى
نيۋ-يورك. KAZINFORM - قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ ۋكراينا سىرتقى ىستەر ءمينيسترى اندرەي سيبيگامەن كەزدەسۋ وتكىزدى.
سۇحبات بارىسىندا حالىقارالىق كۇن تارتىبىندەگى وزەكتى ماسەلەلەر جانە قازاق- ۋكراين ىنتىماقتاستىعىنىڭ قازىرگى دامۋ احۋالى بويىنشا پىكىر الماسۋ ورىن الدى.
م. نۇرتىلەۋ قازاقستاننىڭ ۋكرايناداعى جاعدايدى تەز ارادا رەتتەۋگە جانە ەلدە تۇراقتى بەيبىتشىلىكتىڭ ورناۋىنا مۇددەلى ەكەنىن راستادى.
اتاپ ايتقاندا، استانا قاقتىعىستى ب ۇ ۇ جارعىسى مەن حالىقارالىق قۇقىقتىڭ نەگىزگى قاعيداتتارىنا سايكەس ساياسي-ديپلوماتيالىق جولمەن رەتتەۋدى قولداپ كەلگەنىن جانە بۇل ۇستانىمدا ەكەنى اتالىپ ءوتتى.
ايتا كەتەيىك، بۇعان دەيىن ق ر عىلىم جانە جوعارى ءبىلىم ءمينيسترى ساياسات نۇربەك «بولاشاق» باعدارلاماسى اياسىندا سميتسون ينستيتۋتى نەگىزىندە انتروپولوگيا، تاريح سىندى سالالاردا تاعىلىمدامالار وتكىزىلەتىنىن ايتقان بولاتىن.