قازاقستان مەن جاپونيا عالىمدارى جاڭا گەربيتسيدتى سىناپ جاتىر

استانا. KAZINFORM - قازاق كۇرىش عىلىمي-زەرتتەۋ ينستيتۋتىندا Sumitomo كومپانياسىنىڭ وكىلدەرىمەن كەزدەسۋ ءوتتى. بۇل تۋرالى اۋىل شارۋاشىلىعى مينيسترلىگى حابارلادى.

وندا ينستيتۋت عالىمدارى - كامالدين شەرماعامبەتوۆ، گۇلسىم بايمبەتوۆا جانە ايدوس جالبىروۆ - كۇرىش القاپتارىندا جاڭا جاپون گەربيتسيدى NC-656-نى سىناۋ بارىسى مەن قازىرگى ناتيجەلەردى تالقىلادى. سونداي-اق، الداعى جوسپارلار مەن جاڭا تاجىريبە الاڭدارىن ۇيىمداستىرۋ جايى قاراستىرىلدى.

كەزدەسۋدە جاپوندىق پرەپاراتتاردى قانت قىزىلشاسى مەن جازدىق ارپادا قولدانۋ مۇمكىندىگى دە قارالدى.

تاراپتار اگروتەحنولوگيالار باعىتىندا ارىپتەستىكتى جالعاستىرىپ، ورتاق جوبالاردى جۇزەگە اسىرۋعا قىزىعۋشىلىق ءبىلدىردى.

ايتا كەتەيىك، ەلىمىزدە جىل سوڭىنا دەيىن كاربون ەگىنشىلىگىن دامىتۋ جول كارتاسى بەكىتىلمەك.