ءوز سوزىندە ول شۆەيتساريا قازاقستان ەكونوميكاسىنداعى جەتەكشى ينۆەستوردىڭ ءبىرى بولىپ قالا بەرەتىنىن اتاپ ءوتتى. شۆەيتساريالىق كومپانيالار ەنەرگەتيكا، ماشينا جاساۋ، تاماق جانە فارماتسيەۆتيكا ونەركاسىبىندە، ءبىرقاتار تەحنولوگيالىق سالادا جۇمىس ىستەيدى.
- 2025-جىلدىڭ توعىز ايىنىڭ قورىتىندىسى بويىنشا ەكى ەل اراسىنداعى تاۋار اينالىمى شامامەن $1,1 ميلليارد بولدى. قازاقستان ماشينا جاساۋ، فارماتسيەۆتيكا، مەديتسينا جانە بيوتەحنولوگيا، سيفرلاندىرۋ، كولىك-لوگيستيكالىق ينفراقۇرىلىم مەن جاڭارتىلاتىن ەنەرگيا كوزدەرى سالالارىندا شۆەيتساريالىق بيزنەستىڭ قاتىسۋىن ارتتىرۋعا نيەتتى، - دەلىنگەن مينيسترلىك حابارلاماسىندا.
ۆيتسە-پرەمەر قازاقستاننىڭ ينۆەستورلارعا بارىنشا قولايلى جاعداي جاساۋعا دايىن ەكەنىن اتاپ ءوتتى.
- ەكى ەل ىنتىماقتاستىعىنداعى ماڭىزدى جوبانىڭ ءبىرى - استاناداعى «شتادلەر قازاقستان» كومپانياسىنىڭ بازاسىندا جولاۋشىلار ۆاگونى ءوندىرىسىن لوكاليزاتسيالاۋ. بۇگىندە 557 جوعارى تەحنولوگيالىق ۆاگون جەتكىزۋگە كەلىسىمشارت جاسالدى. ونىڭ العاشقى توبى جىل سوڭىنا دەيىن جەتكىزىلەدى، - دەلىنگەن حابارلامادا.
سەرىك جۇمانعارين قازاقستان شۆەيتساريانىڭ، سونىڭ ىشىندە لۋگانو قالاسىنىڭ، سيفرلىق ۆاليۋتانى دامىتۋداعى جانە بلوكچەين تەحنولوگياسىن قولدانۋداعى تاجىريبەسىنە قىزىعۋشىلىق تانىتاتىنىن بولەك اتاپ ءوتتى.
- قازاقستان - بۇگىندە ونەركاسىپتىك كلاستەر قالىپتاستىرۋعا دايىن الاڭ. ءبىز كونسورتسيۋمدار قۇرۋعا، تەحنولوگيالىق كووپەراتسيانى دامىتۋعا دايىنبىز، - دەدى ۆيتسە-پرەمەر.
وتىرىس سوڭىندا قاتىسۋشىلار ىنتىماقتاستىقتى دامىتۋعا جانە ءوزارا ءىس-قيمىلدىڭ ءارتۇرلى سالاسىندا ەكىجاقتى ساۋدا-ەكونوميكالىق قاتىناستى نىعايتۋعا باعىتتالعان ءبىرقاتار قۇجات پەن كەلىسىمگە قول قويدى.
قازاقستان-شۆەيتساريا ىسكەرلىك كەڭەسى ەكى ەلدىڭ ىسكەر توپتارى اراسىنداعى ىنتىماقتاستىقتى دامىتۋ ءۇشىن 2012-جىلى قۇرىلعان ۇيلەستىرۋ جانە كونسۋلتاتسيالىق ورگان.
ق ش ى ك- ءنىڭ نەگىزگى مىندەتتەرى:
ساۋدا-ينۆەستيتسيالىق ءوزارا ءىس-قيمىلدى نىعايتۋ؛
قازاقستان مەن شۆەيتساريا بيزنەسى اراسىنداعى تىكەلەي بايلانىس پەن اقپارات الماسۋدى قولداۋ؛
ساۋدا-ەكونوميكالىق ىنتىماقتاستىقتاعى كەدەرگىلەردى جويۋ؛
بيزنەس جۇرگىزۋ جاعدايىن جاقسارتۋ بويىنشا ۇسىنىمدار دايىنداۋ.
ىنتىماقتاستىقتاعى باسىم باعىتتار: ەنەرگەتيكا، ماشينا جاساۋ، كتو جانە كادرلار دايارلاۋ، ونەركاسىپتىك جانە تۇرمىستىق قالدىقتاردى باسقارۋ، فارماتسيەۆتيكا، تەمىرجول كولىگى.
ايتا كەتەلىك شۆەيتساريا فەدەرالدى كەڭەسىنىڭ ۆيتسە-پرەزيدەنتى گي پارمەلان Kazinform اگەنتتىگىنە بەرگەن ەكسكليۋزيۆتى سۇحباتىندا قازاقستان قالايشا بەرننىڭ ورتالىق ازياداعى باستى سەرىكتەسىنە اينالعانىن اتاپ وتكەن ەدى.