قازاقستان مەن بەنين اراسىندا ءبىرقاتار مەموراندۋمعا قول قويىلدى
استانا. KAZINFORM - قازاقستانعا بەنين رەسپۋبليكاسىنىڭ سىرتقى ىستەر ءمينيسترى ولۋشەگۋن ادجادي باكاريدىڭ مەملەكەتتىك ساپارى بارىسىندا ەكى ەل اراسىندا ءبىرقاتار قۇجاتقا قول قويىلدى.
- قازاقستاننىڭ سىرتقى ىستەر ءمينيسترى بەنين رەسپۋبليكاسىن افريكا قۇرلىعىنداعى ماڭىزدى سەرىكتەس. ساۋدا- ەكونوميكالىق ىنتىماقتاستىعىمىز ۇلكەن الەۋەتكە يە. اسىرەسە، اۋىل شارۋاشىلىعى، قورعانىس ونەركاسىبى، كولىك لوگيستيكاسى، ينۆەستيتسيا جانە جاڭا تەحنولوگيا سالالارىندا مول مۇمكىندىك بار. بۇگىن قول قويىلاتىن ديپلوماتيالىق جانە ساياسي كونسۋلتاتسيالار تۋرالى مەموراندۋم سىرتقى ىستەر مينيسترلىكتەرى اراسىنداعى ءوزارا ىقپالداستىقتىڭ اياسىن كەڭەيتۋگە مۇمكىندىك بەرەدى، - دەدى ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ مەيمانمەن كەزدەسۋ بارىسىندا.
كەزدەسۋ قورىتىندىسى بويىنشا سىرتقى ىستەر ۆەدومستۆوسىنىڭ باسشىلارى ەكىجاقتى مەموراندۋمدارعا قول قويدى.
- بەنين كوپجاقتى ىنتىماقتاستىقتى دامىتۋعا ەرەكشە ءمان بەرەدى، سەبەبى قازىرگى زامانعى الەم جاعدايىندا ەلدەرمەن كوپجاقتى بايلانىس ورناتۋ اسا ماڭىزدى. سونىمەن قاتار، بەنين حالىقارالىق قۇقىقتى قۇرمەتتەيدى جانە ءدال وسى ورتاق قۇندىلىقتاردى ساقتاۋ مەن تۇراقتى نەگىزدەرگە سۇيەنە وتىرىپ، ەلدەرىمىز جاڭا دەڭگەيگە كوتەرىلە الادى، - دەدى ولۋشەگۋن ادجادي باكاري ەكىجاقتى كەزدەسۋ بارىسىندا.
شەتەلدىك مەيماننىڭ مالىمدەۋىنشە، بەنين قازاقستانمەن ورتاق قۇندىلىقتار نەگىزىندە بەرىك ءارى سەرپىندى قارىم-قاتىناس ورناتقىسى كەلەدى.
- شىن مانىندە، ءبىزدىڭ ورتاق قۇندىلىقتار مەن ورتاق كوزقاراس بەنين مەن قازاقستان اراسىندا بەرىك قارىم- قاتىناس ورناتۋعا مۇمكىندىك بەرەدى. اسىرەسە ءبىز جەكە كەزدەسۋ بارىسىندا تالقىلاعان اۋىل شارۋاشىلىعى، سيفرلاندىرۋ، ەنەرگەتيكا جانە كولىك سالاسىنداعى ىنتىماقتاستىق ماڭىزدى. سونىمەن قاتار بەنين قازاقستان ءۇشىن افريكا قۇرلىعىنا شىعاتىن پورت، قولجەتىمدىلىك نۇكتەسى بولۋعا نيەتتى. ءبىز ورتاق قۇندىلىقتاردى بولىسە وتىرىپ، تالقىلانعان ماقساتتارعا بىرگە جەتە الاتىنىمىزعا سەنىمدىمىن، - دەيدى ول.
ايتا كەتسەك، قازاقستان مەن بەنين رەسپۋبليكاسى اراسىنداعى ديپلوماتيالىق قارىم- قاتىناس 2011 -جىلى 13- قىركۇيەكتە ورناتىلعان.
وسىعان دەيىن قازاقستان مەن بەنين اراسىندا ءبىرقاتار مەموراندۋمعا قول قويىلعانى تۋرالى حابارلادىق.
اۆتور
داۋلەت ىزتىلەۋ