قازاقستان مەن ارمەنيا پرەزيدەنتتەرى «استانا» حالىقارالىق قارجى ورتالىعىنا باردى
استانا. KAZINFORM - مەملەكەت باسشىسى قاسىم-جومارت توقايەۆ پەن ەلىمىزگە رەسمي ساپارمەن كەلگەن ارمەنيا پرەزيدەنتى ۆااگن حاچاتۋريان «استانا» حالىقارالىق قارجى ورتالىعىنا باردى، دەپ حابارلايدى اقوردانىڭ باسپا ءسوز قىزمەتى.
پرەزيدەنتتەرگە ا ح ق و باسقارۋشىسى رەنات بەكتۇروۆ قارجى ورتالىعى قىزمەتىنىڭ نەگىزگى باعىتتارى جانە ونىڭ وڭىرلىك باستامالاردى دامىتۋداعى ۇلەسى تۋرالى مالىمەت بەردى.
ا ح ق و ارقىلى قازاقستان ەكونوميكاسىنا تارتىلعان ينۆەستيتسيا كولەمى 13 ميلليارد دوللاردان اسقان. ونىڭ 5,9 ميلليارد دوللارى AIX بيرجاسىنداعى پورتفەلدىك ينۆەستيتسيا بولسا، 7,3 ميلليارد دوللارى ا ح ق و- عا قاتىسۋشى كومپانيالارعا تيەسىلى. بۇگىندە مۇندا الەمدەگى 80-نەن استام ەلدىڭ 3200-گە جۋىق كومپانياسى جۇمىس ىستەيدى. ولاردىڭ قاتارىندا اقپاراتتىق- كوممۋنيكاتسيالىق تەحنولوگيالار، قارجى قىزمەتتەرى مەن ساقتاندىرۋ سالالارىنا ماماندانعان ارمەنيانىڭ 6 ءىرى كومپانياسى دا بار.
سونىمەن قاتار ا ح ق و سوتى مەن حالىقارالىق تورەلىك ورتالىعىنىڭ قىزمەتى، ورتالىقتاعى سوت جۇيەسىنىڭ ەرەكشەلىگى جونىندە دە اقپارات بەرىلدى. بۇدان بولەك، ا ح ق و قارجى قىزمەتتەرىن رەتتەۋ كوميتەتىنىڭ جۇمىسى تۋرالى باياندالدى. اتالعان كوميتەت پەن ارمەنيا رەسپۋبليكاسىنىڭ ورتالىق بانكى اراسىندا بانك جانە ساقتاندىرۋ قىزمەتتەرىن، باعالى قاعازدار نارىعىن قاداعالاۋ جانە رەتتەۋ سالاسىنداعى ءوزارا ءىس-قيمىل تۋرالى مەموراندۋم جاسالعان.
اۆتور
ەربول جانات