قازاقستان مەن اۋعانستان اۋىل شارۋاشىلىق تاۋار اينالىمىن 1 ميلليارد دوللارعا دەيىن ارتتىرماق - ەربول تاسجۇرەكوۆ
الماتى. KAZINFORM - قازاقستان مەن اۋعانستان اگروونەركاسىپتىك كەشەن ونىمدەرىنىڭ تاۋار اينالىمىن ەكى ەسەگە دەيىن ارتتىرا الادى.
بۇل تۋرالى اۋىل شارۋاشىلىعى ۆيتسە-ءمينيسترى ەربول تاسجۇرەكوۆ الماتىدا ءوتىپ جاتقان قازاقستان-اۋعانستان بيزنەس فورۋمىندا ايتتى.
ۆيتسە-مينيستر اۋىل شارۋاشىلىعى سالاسىنداعى ەكىجاقتى ىنتىماقتاستىقتىڭ ماڭىزدىلىعىن اتاپ ءوتتى.
ونىڭ ايتۋىنشا، 2023 -جىلدىڭ قورىتىندىسى بويىنشا ەكى ەل اراسىنداعى اۋىل شارۋاشىلىعى سالاسىنداعى تاۋار اينالىمى 567,5 ميلليون دوللار بولعان. ال، قازاقستاننىڭ ەكسپورتى 547 ميلليون دوللارعا جەتتى.
قازاقستان اۋعانستانعا نەگىزىنەن ۇن مەن بيداي ەكسپورتتايدى. بۇل اتالعان ەلگە جولداناتىن ەكسپورتتىڭ �- دان استامى.
ءوز كەزەگىندە اۋعانستان قازاقستانعا مينەرالدى سۋلاردى، جەمىستەر مەن دامدەۋىشتەردى ەكسپورتتايدى.
ۆيتسە-مينيستر ەكى ەل بيزنەسىنىڭ تىعىز ىنتىماقتاستىعى ارقاسىندا ەلدەر اۋىل شارۋاشىلىعى ونىمدەرىنىڭ تاۋار اينالىمىن 1 ميلليارد دوللارعا دەيىن ارتتىرا الاتىنىن اتاپ ءوتتى.
«جالپى، قازاقستان تىڭايتقىشتاردىڭ جانە اۋىلشارۋاشىلىق ونىمدەرىنىڭ باسقا دا تۇرلەرىنىڭ سۇرانىسقا يە تۇرلەرىمەن ىنتىماقتاسۋعا جانە جەتكىزىلىممەن الماسۋعا دايىن. اتاپ ايتقاندا، كونديتەرلىك جانە ۇن ونىمدەرى، وسىمدىك مايلارى، سونداي-اق مينەرالدى تىڭايتقىشتار، اۋىل شارۋاشىلىعى تەحنيكالارى. ءبىز ءوز كەزەگىمىزدە حالىقتىڭ سۇرانىسىن وتەۋ ءۇشىن اۋعانستاننان سيترۋس، كەپتىرىلگەن جەمىستەر، انار شىرىنى، دامدەۋىشتەر، ماقتا شيكىزاتى جانە تاعى باسقاسىن ساتىپ الۋعا دايىنبىز»، - دەدى ە. تاسجۇرەكوۆ.
سوڭعى جىلدارى قازاقستاننىڭ اۋعانستانعا بيداي ەكسپورتى قىسقاردى. 2023 -جىلى جەتكىزۋ كولەمى S- عا ازايىپ كەتكەن بولاتىن. وسى جىلدىڭ 8 ايىندا نەبارى 69 مىڭ توننا.
ۆيتسە-مينيستر اتاپ وتكەندەي، قازاقستان لوگيستيكانى جاقسارتۋ جانە جەتكىزىلىمدەردى ارتتىرۋ ءۇشىن بەينەۋ استىق تەرمينالىنىڭ الەۋەتىن پايدالانۋ ارقىلى بۇل جاعدايدى تۇزەتۋدى جوسپارلاپ وتىر.
ءسوزىنىڭ سوڭىندا ۆيتسە-مينيستر ەلدەر اراسىنداعى تاجىريبە الماسۋدىڭ ماڭىزدىلىعىنا توقتالىپ، قازاقستاننىڭ اۋعانستانداعى ەگىن ونىمدىلىگىن ارتتىرۋ ءۇشىن وزىق تەحنولوگيالارمەن الماسۋعا دايىن ەكەنىن جەتكىزدى.
وسىعان دەيىن قازاقستان مەن اۋعانستان اراسىنداعى ساۋدا اينالىم 330,7 ميلليون دوللارعا جەتكەنى تۋرالى جازعان ەدىك.
اۆتور
الما مۇقانوۆا