قازاقستان مەكتەپتەرىن كۇزەتۋ ءتارتىبى قانشالىقتى قاتاڭ

استانا. KAZINFORM - بالالاردىڭ مەكتەپتەگى قاۋىپسىزدىگى - كۇن تارتىبىندەگى ماڭىزدى ماسەلەلەردىڭ ءبىرى. سوڭعى جىلدارى ءبىلىم بەرۋ ۇيىمدارىنداعى قاۋىپسىزدىككە اسا ءمان بەرىلىپ، ءبىرقاتار جاڭاشىلدىق ەنگىزىلدى.

بالالاردىڭ مەكتەپتەگى قاۋىپسىزدىگى - اسا ماڭىزدى ماسەلە، ال بەينەباقىلاۋ جۇيەسى قاۋىپسىزدىكتى قامتاماسىز ەتۋدىڭ ءتيىمدى قۇرالدارىنىڭ ءبىرى رەتىندە قولدانىلادى.

ىشكى ىستەر مينيسترلىگىنىڭ مالىمەتىنشە، بۇگىندە ەلىمىزدە 7797 مەكتەپ بار، ولاردا 223 مىڭنان استام بەينەباقىلاۋ كامەراسى ورناتىلعان. ونىڭ ىشىندە 6986 مەكتەپ تەرروريستىك تۇرعىدان وسال وبەكتى ساناتىنا كىرەدى، ونىڭ ىشىندە 5817 مەكتەپ جەدەل باسقارۋ ورتالىعىنا جانە ىشكى ىستەر ورگاندارىنىڭ كەزەكشى بولىمدەرىنە قوسىلعان (�).

ۇكىمەتتىڭ 2021 -جىلعى 12-ساۋىردەگى №234 قاۋلىسىمەن بەكىتىلگەن تەرروريستىك تۇرعىدان وسال وبەكتىلەردىڭ ولشەم شارتتارىنا سايكەس ءبىلىم الۋشىلار مەن پەرسونالدىڭ ناقتى سانى 100 جانە ودان دا كوپ ادام بولاتىن ءبىلىم بەرۋ ۇيىمدارى (بالاباقشالار، مەكتەپتەر جانە ت. ب. ) ادامدار كوپ جينالاتىن وبەكتىلەر قاتارىنا جاتادى.

سونىمەن قاتار، ءبىلىم بەرۋ ۇيىمدارى وبەكتىلەرىنە قويىلاتىن تالاپتار ءبىلىم جانە عىلىم مينيسترلىگىنىڭ 2022 -جىلعى 30-ناۋرىزداعى №117 بۇيرىعىمەن بەكىتىلگەن، تەرروريستىك تۇرعىدان وسال وبەكتىلەردى قورعاۋدى ۇيىمداستىرۋ جونىندەگى نۇسقاۋلىقپەن بەلگىلەنگەن.

مەكتەپتەردى قاۋىپسىزدىكتى قامتاماسىز ەتۋگە جەكە كۇزەت ۇيىمدارى تارتىلادى، ولار «كۇزەت قىزمەتى تۋرالى» زاڭنىڭ 10-بابىندا جانە ىشكى ىستەر مينيسترلىگىنىڭ 2014 -جىلعى 30-جەلتوقسانداعى № 959 («كۇزەت قىزمەتىن جۇزەگە اسىرۋ ءۇشىن بىلىكتىلىك تالاپتارىن جانە ولارعا سايكەستىكتى راستايتىن قۇجاتتار تىزبەسىن بەكىتۋ تۋرالى») بۇيرىعىندا كوزدەلگەن بىلىكتىلىك تالاپتارىنا سايكەس كەلۋى ءتيىس.

جەكە كۇزەت ۇيىمدارىنىڭ كۇزەتشىلەرى ىشكى ىستەر مينيسترلىگىنىڭ 2015 -جىلعى 23- اقپانداعى №143 («جەكە كۇزەت ۇيىمىندا باسشى جانە كۇزەتشى لاۋازىمدارىن اتقاراتىن جۇمىسكەرلەردى دايارلاۋ جانە ولاردىڭ بىلىكتىلىگىن ارتتىرۋ جونىندەگى ۇلگىلىك وقۋ باعدارلامالارى مەن ۇلگىلىك وقۋ جوسپارلارى») بۇيرىعىنا سايكەس مامانداندىرىلعان وقۋ ورتالىقتارىندا باستاپقى دايارلىقتان، سونداي-اق جىل سايىن بىلىكتىلىگىن ارتتىرۋدان وتەدى.

- كۇزەتشى لاۋازىمىنا ورنالاسۋ ءۇشىن ءبىرقاتار تالاپ قويىلادى، ونىڭ ىشىندە جاس شەكتەۋى بويىنشا 19 جاستان جوعارى بولۋى كەرەك. كۇزەتشىلەر ءۇشىن جوعارى جاس شەگىن بەلگىلەۋ كونستيتۋتسيانىڭ 14-بابىنىڭ نورماسىنا قايشى كەلەدى، وعان سايكەس ەشكىمدى شىعۋ تەگى، الەۋمەتتىك، لاۋازىمدىق جانە مۇلىكتىك جاعدايى، جىنىسى، ءناسىلى، ۇلتى، ءتىلى، دىنگە كوزقاراسى، سەنىمى، تۇرعىلىقتى جەرى نەمەسە كەز كەلگەن وزگە ءمان-جايلار بويىنشا قانداي دا ءبىر كەمسىتۋگە بولمايدى. جالپى كۇزەتشىلەرگە قويىلاتىن بىلىكتىلىك تالاپتارى زاڭعا سايكەس ازىرلەنىپ، بەكىتىلگەن. كۇزەتشىنىڭ جاسى ونىڭ قابىلەتسىزدىگىنىڭ ولشەمى بولا المايدى، ويتكەنى بۇل ونىڭ فيزيكالىق دەنساۋلىعىنىڭ جاي- كۇيىن، كۇيزەلىسكە توزىمدىلىگىن، دايىندىق دەڭگەيى مەن باسقا دا قابىلەتتەرىن كورسەتپەيدى. وسى ورايدا مامانداندىرىلعان وقۋ ورتالىعىندا ارنايى دايىندىقتان وتكەنى ماڭىزدى، - دەپ تۇسىندىرىلگەن ۆەدومستۆونىڭ رەسمي ساۋالعا بەرىلگەن جاۋاپتا.

مەكتەپ كۇزەتى قىزمەتىن ليتسەنزيالاۋ

كۇزەت قىزمەتىمەن اينالىسۋ قۇقىعىنا ليتسەنزيا بەرۋگە قويىلاتىن تالاپتار رەتتەلگەن جانە ول قولدانىستاعى زاڭناما شەڭبەرىندە جۇزەگە اسىرىلادى.

ءبىلىم جانە عىلىم مينيسترلىگىنىڭ 2022 -جىلعى 30-ناۋرىزداعى №117 بۇيرىعىنا سايكەس ءبىلىم بەرۋ وبەكتىلەرى 2 توپقا بولىنەدى:

پەرسونال مەن ءبىلىم الۋشىلاردىڭ (تاربيەلەنۋشىلەردىڭ) ناقتى سانى 700 ادامعا دەيىنگى ءبىلىم بەرۋ وبەكتىلەرى؛
اۋدان ورتالىقتارىندا، اۋداندىق ماڭىزى بار قالالاردا، وبلىستىق ماڭىزى بار قالالاردا، رەسپۋبليكالىق ماڭىزى بار قالالاردا، استانادا ورنالاسقان، سونداي-اق، ورنالاسقان جەرىنە قاراماستان، پەرسونال مەن ءبىلىم الۋشىلاردىڭ (تاربيەلەنۋشىلەردىڭ) ناقتى سانى 700 دەن استام ءبىلىم بەرۋ وبەكتى.
وبەكتىلەردىڭ تەرروريزمگە قارسى قورعالۋىنىڭ نەعۇرلىم جوعارى دەڭگەيىن قامتاماسىز ەتۋ ءۇشىن 2- توپقا جاتقىزىلعان وبەكتىلەردىڭ يەلەرى نەمەسە باسشىلارى ليتسەنزيانىڭ 1- كىشى ءتۇرى بار (كۇزەت قىزمەتىنىڭ بارلىق ءتۇرى، ونىڭ ىشىندە تەرروريستىك تۇرعىدان وسال وبەكتىلەرىن كۇزەتۋ) جەكە كۇزەت ۇيىمدارى مەن كۇزەت قىزمەتتەرىن كورسەتۋ تۋرالى شارت جاساسادى.

- ليتسەنزيانىڭ 1- كىشى ءتۇرى بار جەكە كۇزەت ۇيىمدارىندا كۇزەت قىزمەتىن كورسەتۋ سالاسىندا كەمىندە ءبىر جىل جۇمىس تاجىريبەسى، ورتالىقتاندىرىلعان باقىلاۋ ءپۋلتى، راديوبايلانىس، وبەكتىلەردە دابىل قاعۋ قۇرالى، جەدەل ەكى ءموبيلدى توبى جانە قىزمەتتىك قارۋ بولۋى ءتيىس، - دەلىنگەن ساۋال جاۋابىندا.

وسىلايشا ىشكى ىستەر مينيسترلىگى مەكتەپتەردەگى كۇزەت ۇيىمدارى ءۇشىن ءبىرىڭعاي ستاندارتتاردى ازىرلەۋ، مەكتەپ كۇزەتشىلەرى سانى، كۇزەتۋ الاڭى جانە وقۋشىلارمەن اراقاتىناسى، سونداي-اق وقۋشىلار سانىن ەسكەرە وتىرىپ، مەكتەپ كۇزەتشىلەرىن ۇلعايتۋ مۇمكىندىگى تۋرالى ماسەلەلەرى مەن جالپى سالانى رەتتەۋمەن وقۋ-اعارتۋ مينيسترلىگى اينالىساتىنىن ايتىپ وتىر.

ەسكە سالا كەتەيىك، وتكەن جىلى ىشكى ىستەر مينيسترلىگى جەكە كۇزەت ۇيىمدارىنىڭ شتات ءنورماتيۆىن جاريالادى.

سونداي-اق ىشكى ىستەر ءمينيسترى ەرجان سادەنوۆ بالالاردىڭ قاۋىپسىزدىگى تۋرالى ايتا كەلە، مەكتەپ كۇزەتشىلەرىنىڭ كوبى ۆاحتەرلەر مەن زەينەتكەرلەر ەكەنىن تىلگە تيەك ەتكەن ەدى.