قازاقستان - كورەيلەر كوبەيىپ جاتقان جالعىز ەل - يۋريي شين

استانا. KAZINFORM - كورەيا رەسپۋبليكاسىنىڭ پرەزيدەنتى يۋن سوك يەلدىڭ قازاقستانعا مەملەكەتتىك ساپارى ەكى ەل اراسىنداعى بەرىك قارىم-قاتىناستى كورسەتەتىن ماڭىزدى وقيعا بولدى.

بۇل پىكىردى Kazinform تىلشىسىمەن قازاقستان كورەيلەرى قاۋىمداستىعىنىڭ ءتوراعاسى جانە قازاقستان حالىقتارى اسسامبلەياسى ءتوراعاسىنىڭ ورىنباسارى يۋري شين ءبولىستى.

«1992 -جىلدان باستاپ قازاقستان مەن وڭتۇستىك كورەيا سەنىمدى ءارى بەرىك قارىم-قاتىناستا. بۇگىن ءبىز قازاقستاننىڭ وڭتۇستىك كورەياعا قالاي نازار اۋداراتىنىن جانە وڭتۇستىك كورەيانىڭ ورتالىق ازياعا قالاي نازار اۋداراتىنىن كورەمىز. قازاقستانعا ۇشار الدىندا وڭتۇستىك كورەيا پرەزيدەنتى جىبەك جولى بويىندا بولۋ وتە قىزىقتى ەكەنىن ايتتى. سوندىقتان K- Silkway باعدارلاماسى جاسالدى. سەبەبى وڭتۇستىك كورەيا پرەزيدەنتى باستاعان دەلەگاتسيا ورتالىق ازيا ەلدەرىن ارالاپ، ءوزارا قارىم-قاتىناستى كەڭەيتۋدى ۇيعاردى. ال قازاقستانعا كورەيانىڭ تەحنولوگيالارى وتە قىزىقتى. سوندىقتان ەكى ەل اراسىندا وتە جاقسى سينەرگيا بولۋى مۇمكىن»، - دەدى يۋري شين استانا ەكى ەل پرەزيدەنتىنىڭ قاتىسۋىمەن وتكەن گالا- كونسەرت بارىسىندا.

سونداي-اق، قاۋىمداستىق ءتوراعاسى مەملەكەت باسشىسىنىڭ سەۋل مەن سينگاپۋردىڭ ۇلگىسى بويىنشا الاتاۋ سياقتى جاڭا اقىلدى قالالاردى سالۋعا دايىن ەكەندىگى تۋرالى بۇگىنگى مالىمدەمەسىن ەسكە سالدى.

«ءبىز كورەيالىق كومپانيالارعا وندىرىستەرىن وسىندا ورنالاستىرۋ ءۇشىن تولىق قولداۋ كورسەتۋگە دايىنبىز. بۇگىندە قازاقستاندا Samsung, Lotte, Hyundai, LG جانە Kia سياقتى كومپانيالار جۇمىس ىستەيدى. وتاندىق ەكسپورتتى ۇلعايتۋ جانە زاماناۋي وندىرىستەردە جۇمىس ورىندارىن قامتاماسىز ەتۋ ءۇشىن قازاقستانداعى كورەي وندىرىستەرىن كەڭەيتۋدىڭ ۇلكەن الەۋەتىن كورىپ وتىرمىز»، - دەيدى ول.

ودان بولەك، يۋري شين قازاق حالقىنىڭ كورەي حالقىمەن ۇقساستىعىن دا اتادى.

«ەگەر ءبىز جاي عانا ءتىلدى الساق، وندا كورەيلەرگە ورىس تىلىنەن گورى قازاق ءتىلىن ۇيرەنۋ وڭايىراق. ويتكەنى ايتىلۋ جاعىنان ەكى ءتىل جاقىنىراق. ارينە، ءبىز تەك تىلمەن عانا ەمەس، سونىمەن قاتار ەكونوميكامىزدى ماقتان تۇتۋ ءۇشىن كورەيا سياقتى ناقتى ەل قۇرعىمىز كەلەدى. قازاقستاندىق كورەي رەتىندە ءبىزدىڭ ۇلت بۇل جەردە 80 جىلدان استام ۋاقىت تۇرادى دەپ ايتا الامىن. قازاق مادەنيەتىنە قويان-قولتىق ارالاسىپ، بەلسەندى ىقپالداسۋدامىز. ءبىز مۇندا بەيىمدەلگەن ۇلتپىز جانە بىزگە جايلى. قازاقستان - كورەيلەر كوبەيىپ كەلە جاتقان جالعىز ەل. ەگەر ورتالىق ازيا ەلدەرىن الساق، باسقا مەملەكەتتەردە كورەيلەر سانى ازايدى. بۇل قازاقستاننىڭ ءومىر سۇرۋگە جايلى جانە بولاشاعىمىزدى وسىندا جوسپارلاپ وتىرعانىمىزدى كورسەتەدى»، - دەدى كورەيلەر قاۋىمداستىعىنىڭ باسشىسى.

اۆتور

داۋلەت ىزتىلەۋ