قازاقستان كورشىلىك قاتىناستارىن ۇنەمى پىسىقتاپ وتىرۋعا ءتيىس - وكسفورد ۋنيۆەرسيتەتىنىڭ پروفەسسورى

استانا. KAZINFORM - وكسفورد ۋنيۆەرسيتەتىنىڭ پروفەسسورى، «جەردىڭ ايتىلماعان تاريحى» بەستسەللەرىنىڭ اۆتورى پيتەر فرانكوپان استانادا ءوتىپ جاتقان «Connected-2024» حالىقارالىق كونفەرەنسياسىنىڭ جالپى وتىرىسىنان كەيىن ب ا ق وكىلدەرىنە سۇحبات بەردى.

پيتەر فرانكوپان ب ا ق وكىلدەرىنىڭ جاساندى زەيىن، سيفرلاندىرۋ تەندەنتسيالارىنىڭ ادامزات تاريحىنا اسەرى تۋرالى سۇراقتارىنا جاۋاپ بەرە وتىرىپ، قازاقستاننىڭ الەم گەوساساتىنداعى ورنى تۋرالى پايىمىن ايتتى.

«قازاقستان الەمدەگى ەڭ ءىرى مەملەكەتتەردىڭ ءبىرى. بۇل ەل زاماننىڭ تىنىش كەزىندە ايرىقشا قىزىقتى، ال قيىن شاقتاردا وتە كۇردەلى وڭىرگە اينالىپ شىعا كەلەتىن ايماقتا تۇر. سولتۇستىكتەرىڭىزدە رەسەي، شىعىس جاقتارىڭىزدى قىتاي بار. ءبىر بۇيىرىڭىزدە ورتالىق ازيا جاتىر. يران مەن اۋعانستان دا الىس جاتقان جوق. سوندىقتان قازاقستانعا كورشىلىك قاتىناستاردى ۇدايى پىسىقتاپ وتىرۋعا تۋرا كەلەدى»، - دەدى وكسفورد پروفەسسورى.

تاريحشى باتىس قوعامىنىڭ قازاقستاندى ورتالىق ازيانىڭ ءبىر بولشەگى رەتىندە قاراۋى كەي جاعدايدا ءتيىمسىز ەكەنىن ايتادى.

«ءبىز، باتىستاعىلار، قازاقستاندى ۇنەمى ورتالىق ازيا ەلدەرىمەن بىرگە قارايمىز. مۇنداي ءتاسىل ءاردايىم ءتيىمدى دەۋگە كەلمەيدى. قازاقستاننىڭ اۋماعى ۇلكەن، حالقىنىڭ سانى ءوسىپ كەلەدى، جاستار كوپ. 1991 -جىلى استانانىڭ شاعىن قالا بولعانىن ەلەستەتۋدىڭ ءوزى قيىن. قازىر ول قازاقستاننىڭ ورتالىعىنا اينالىپ وتىر. سوعان قاراپ بۇل ەلدەگى وزگەرىستەر قارقىنى وراسان بولعانىن تۇسىنۋگە بولادى. ەلدىڭ ەندىگى تىنىس-تىرشىلىگى كوبىنە سىزدەرگە، جاس بۋىنعا بايلانىستى بولادى. سىزدەردىڭ نە ىستەيتىندەرىڭىزگە، قانداي وزگەرىستەردى قالايتىندارىڭىزعا بايلانىستى»، - دەدى پيتەر فرانكوپان.

بۇعان دەيىن استانادا الەمنىڭ 60 ەلىنەن شاقىرىلعان ساراپشىلار «Connected-2024» حالىقارالىق كونفەرەنسياسىنا قاتىسىپ جاتقانىن جازعانبىز.

اۆتور
ەسىمجان ناقتىباي