قازاقستان ەكونوميكاسىن بيۋدجەت ەسەبىنەن ىنتالاندىرىپ وتىر - دۇنيەجۇزىلىك بانك

استانا. KAZINFORM - دۇنيەجۇزىلىك بانك قازاقستان ەكونوميكاسىنا كەزەكتى ايلىق شولۋىن جاريالادى.

«9 ايدا جالپى ىشكى ءونىمنىڭ جىلدىق ماندەگى شىنايى كولەمى %4 ءوسىپ، قالپىنا كەلدى. العاشقى جارتى جىلدىقتا %3,2- عا دەيىن باياۋلاعان بولاتىن. ءۇشىنشى توقساندا عانا ەكونوميكالىق ءوسىم جىلدىق ماندە كەنەت %5,6 ءوستى.

ەكىنشى توقسانداعى كورسەتكىش %2,6 بولعان. وسىلايشا ەكونوميكانىڭ ءوسۋ قارقىنى %5,5 قالپىنا كەلدى. الدىڭعى توقساندا %1,6 بولىپ تۇسكەن ەدى.

ءۇشىنشى توقساندا پاندەميادان كەيىنگى كەزەڭدەگى ەڭ قۋاتتى توقساندىق كورسەتكىشتەر تىركەلىپ وتىر. ەكونوميكا ءوسىمىنىڭ قالپىنا كەلۋىنە بيۋدجەت شىعىندارى نەگىزگى قوزعاۋشى كۇش بولسا كەرەك. 9 ايداعى شوعىرلاندىرىلعان بيۋدجەتتىڭ شىنايى شىعىندارى %5,3 ءوستى»، - دەپ جازىلعان شولۋدا.

دۇنيەجۇزىلىك بانك ساراپشىلارىنىڭ ەسەپتەۋىنشە، ەلدەگى ينۆەستيتسيالىق بەلسەندىلىك وزگەرىسسىز قالىپ وتىر.

«تاۋار ەكسپورتى جىلدىق ماندە %5,9 ارتىپ، ەكونوميكالىق بەلسەندىلىككە باسەڭ بولسا دا قولداۋ كورسەتتى.

ينفلياتسيا ءتۇسىپ كەلەدى. ءبىراق باعا قىسىم ءالى ساقتالىپ تۇر. تۇتىنۋ باعالارى قىركۇيەك ايىندا جىلدىق ماندە %8,3- عا دەيىن ءتۇستى. قاڭتاردا بۇل كورسەتكىش %9,5 بولعان ەدى. بۇل ىشكى سۇرانىستىڭ تومەندەگەنىن كورسەتەدى. ايلىق ينفلياتسيا دا ءۇشىنشى اي قاتارىنان تومەندەپ كەلەدى. الايدا ماقسات ەتكەن كورسەتكىشتەن ءالى دە جوعارى قالىپ وتىر.

ازىق- تۇلىك باعاسى %5- عا دەيىن تۇسسە، ازىق- تۇلىك ەمەس تاۋارلار باعاسى %7,6- عا دەيىن تومەندەگەن. ال قىزمەت كورسەتۋ باعالارى جوعارى كۇيىندە قالىپ تۇر. بۇعان ەڭبەكاقىنىڭ شىن مانىندە ورنىقتى وسۋىمەن بايلانىستى كىدىرىستەر سەبەپ بولۋى ىقتيمال»، - دەپ جازادى دۇنيەجۇزىلىك بانك ماماندارى.

اۆتور

ەسىمجان ناقتىباي