قازاقستان ەكونوميكانى قولداۋ ءۇشىن 105 ميلليارد يەن الاتىن بولدى

استانا. KAZINFORM - پارلامەنت ءماجىلىسىنىڭ قاراۋىنا «قازاقستان مەن ازيا دامۋ بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» زاڭ جوباسى جانە «قازاقستان مەن ازيا ينفراقۇرىلىمدىق ينۆەستيتسيالار بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» زاڭ جوباسى كەلىپ ءتۇستى. وسى ەكى قۇجات بويىنشا جالپى قارىز كولەمى 105 ميلليارد يەندى قۇرايدى.

ءماجىلىستىڭ قارجى جانە بيۋدجەت كوميتەتىنىڭ ءتورايىمى، دەپۋتات تاتيانا ساۆەليەۆانىڭ ايتۋىنشا، ءبىرىنشى زاڭ جوباسى 2024 -جىلعى 23-قازاندا پارلامەنت ماجىلىسىنە ۇكىمەتتىڭ قاۋلىسىمەن ەنگىزىلدى.

«قارىز تۋرالى كەلىسىمگە 2024 -جىلعى 21-تامىزدا استانا قالاسىندا قول قويىلدى. ازيا دامۋ بانكى قارىزى قازاقستانعا 52,3 ميلليارد يەن سوماسىندا ۇسىنىلادى. قارىزدى جابۋ مەرزىمى 15 جىلعا ەسەپتەلگەن، ونىڭ ىشىندە جەڭىلدىكتى كەزەڭ 2027 -جىلدىڭ 1-ماۋسىمىنا دەيىن جالعاسادى. قارىز قاراجاتى جوسپارلى كەزەڭگە ارنالعان رەسپۋبليكالىق بيۋدجەت تاپشىلىعىنىڭ بەكىتىلگەن كولەمى شەگىندە ەل ەكونوميكاسىنىڭ تۇراقتىلىعىن قولداۋ ءۇشىن تارتىلادى. سوندىقتان قارجى جانە بيۋدجەت كوميتەتى بۇل زاڭ جوباسى بويىنشا قورىتىندى ازىرلەۋگە دايىن»، - دەدى دەپۋتات ءماجىلىستىڭ جالپى وتىرىسىندا.

ال ەكىنشى قۇجات تا 2023 -جىلعى 23-قازاندا پارلامەنت ماجىلىسىنە ۇكىمەتتىڭ قاۋلىسىمەن ەنگىزىلدى. قارىز تۋرالى كەلىسىمگە 2024 -جىلعى 21-تامىزدا استانادا قول قويىلدى.

«بۇل تۇرعىدا ازيا ينفراقۇرىلىمدىق ينۆەستيتسيالار بانكىنىڭ قارىزى قازاقستانعا 52,7 ميلليارد يەن سوماسىندا بەرىلەدى. ونى وتەۋ مەرزىمى 15 جىلعا جالعاسادى. اتاپ ايتقاندا، بۇل قاراجات جوسپارلى كەزەڭگە ارنالعان رەسپۋبليكالىق بيۋدجەت تاپشىلىعىنىڭ ءتيىستى كولەمى اياسىندا ەكونوميكا تۇراقتىلىعىن قولداۋ ءۇشىن تارتىلادى»، - دەدى تاتيانا ساۆەليەۆا.

اۆتور
رۋسلان عابباسوۆ