قازاقستان كومانداسى ارالاس جەكپە-جەكتەن ازيا چەمپيوناتىندا 7 التىن، 9 كۇمىس جانە 10 قولا جۇلدە الدى
استانا. KAZINFORM - پاكىستاننىڭ لاحور قالاسىندا IMMAF قولداۋىمەن م م ا- دان ازيا چەمپيوناتى ءوتتى. بايراقتى باسەكەدە قازاقستان قۇراماسى قارسىلاس شاق كەلتىرمەي، 10 مارتە جەڭىسكە جەتتى.
12 ەلدىڭ سپورتشىلارى قاتىسقان جارىستا ۇلتتىق قۇراما اتىنان ەل نامىسىن 38 سپورتشى قورعادى. وتاندىق سپورتشىلار 18-20 جاس ارالىعىنداعى جاستار، 21 جاستان اسقان ەرەسەكتەر اراسىندا ۇزدىك اتاندى.
ايتا كەتۋ كەرەك، قازاقستاندىق سپورتشىلار مۇنداي جەتىستىككە قاتارىنان 10-رەت قول جەتكىزىپ وتىر. بۇعان دەيىن وتكەن توعىز ازيا چەمپيوناتىندا دا قازاقستان جەڭىس تۇعىرىنان كورىنگەن بولاتىن.
پاكىستاندا وتكەن ازيا بىرىنشىلىگىنىڭ قورىتىندىسى بويىنشا وتانداستارىمىز 7 التىن، 9 كۇمىس جانە 10 قولا جۇلدەگە يە بولدى. ۇلتتىق قۇرامانىڭ قورجىنىنا ءبىرىنشى بولىپ قاراعاندى وبلىسىنىڭ اتىنان قاتىسقان سەرىكباي ماديار («جاستار» ديۆيزيونى، سالماق دارەجەسى 61,2 كەلى) التىن مەدال سالدى. ال ۇلتتىق قۇرامانىڭ ەكى سپورتشىسى ەرۇلان قابدۋلوۆ پەن ادەل ماحامەتوۆا IMMAF ازيانىڭ ءۇش دۇركىن چەمپيوندارى اتاعىن بىردەن راستادى. سونداي-اق، اقمولا وبلىسىنىڭ وكىلى ۆەليەۆ زوحراب (61,2 كەلى)، ب ق و- دان شابدان سامعات (65,8 كەلى)، اتىراۋلىق اسادوۆ نەيمات (70,3 كەلى) جانە اقمولا وبلىسىنان باچۋرينا ماتيلدادا (52,2 كەلى) التىن جۇلدەگە قول جەتكىزىپ، ەل مەرەيىن ۇستەم ەتتى.
«كوماندا ءىس جۇزىندە جەتپىس پايىزعا جاڭاردى. بالالاردىڭ كوپشىلىگى ازيا چەمپيوناتىنا العاش رەت كەلدى. باسەكەلەستىك وتە جوعارى بولدى. ءبىز بۇرىن بايقاماعان پاكىستان كومانداسى ءبىزدى تاڭ قالدىردى. كۇتكەندەي، قازاقستان، تاجىكستان جانە باحرەين كوماندالارى اراسىندا ناعىز تەكەتىرەس بولدى»، - دەدى ارالاس جەكپە-جەكتەن قر ۇلتتىق قۇراماسىنىڭ باس باپكەرى بايان جانعالوۆ.
الايدا قازاقستاندىق سپورتشىلار مۇنىمەن توقتاپ قالمايتىنىن جەتكىزدى. الەمنىڭ بەس دۇركىن جۇلدەگەرى، ازيانىڭ ءۇش دۇركىن چەمپيونى، حالىقارالىق دارەجەدەگى سپورت شەبەرى ەرۇلان قابدۋلوۆ الدا الەمدىك بىرىنشىلىك كۇتىپ تۇرعانىن اتاپ ءوتتى.
«ءيا، ءبىزدىڭ سپورتشىلار بارلىق جەكپە-جەك كۇردەلى بولعانىنا قاراماستان، وزدەرىن تاعى دا كورسەتتى. ءبىراق ءبىزدىڭ باستى ماقساتىمىز - الەم چەمپيوناتىندا جەڭىسكە جەتۋ. ءبىز ۇيگە ءبىر اپتاعا بارامىز، دەمالامىز، سودان كەيىن دايىندىقتى قايتادان باستايمىز. دەمالۋعا بولمايدى»، - دەدى قابدۋلوۆ.
الەم چەمپيوناتى 4-12-قاراشادا تاشكەنتتە وتەدى. قازاقستاننىڭ مما ارالاس جەكپە-جەك فەدەراتسياسى سپورتشىلارعا جان-جاقتى قولداۋ كورسەتىپ جاتىر. جاتتىقتىرۋشىلار مەن شاكىرتتەردىڭ جۇدىرىقتاي جۇمىلعان جۇمىسىنىڭ ارقاسىندا كوماندا ازيالىق جەكپە-جەك ەليتاسىنا كىردى.
ەستەرىڭىزگە سالا كەتەيىك، ارالاس جەكپە-جەك (م م ا) قازاقستاندا رەسمي سپورت ءتۇرى مارتەبەسىنە يە بولدى. اۋەسقوي جانە كاسىبي ارالاس جەكپە-جەك 2013-جىلى سپورت ءتۇرى رەتىندە تانىلدى.