قازاقستان كوكپار فەدەراتسياسى قىرعىزداردىڭ شاقىرتۋىنا قاتىستى مالىمدەمە جاسادى

استانا. قازاقپارات - قازاقستان رەسپۋبليكاسىنىڭ كوكپار فەدەراتسياسى 5-دۇنيەجۇزىلىك كوشپەندىلەر ويىندارىنىڭ ناتيجەسىنە جانە قازاق-قىرعىز اراسىندا وتكەن فينالدىق ويىندا تۋىنداعان پىكىرتالاسقا قاتىستى ءوز ۇستانىمىن ءبىلدىردى، - دەپ حابارلايدى msports.kz سايتى.

قىرعىزستان كوك ءبورى فەدەراتسياسىنىڭ تاراپى 1-قاراشادا وتەتىن تۋرنيرگە شاقىرعانى تۋرالى: كوپشىلىك بۇنى 5-دۇنيەجۇزىلىك كوشپەندىلەر ويىندارىنىڭ فينالى بويىنشا قارىمتا كەزدەسۋ دەپ ويلاپ وتىر. قىرعىزستان تاراپى اشىق تۋنيرگە قاتىسۋعا شاقىردى. ەسكەرە كەتەتىن جايت، بۇل تۋرنير ءبىزدىڭ كۇنتىزبەلىك جوسپارىمىزدا جوق. ول ۋاقىتقا ءوزىمىزدىڭ وزگە تۋرنيرلەرىمىز قويىلعان. الداعى ۋاقىتتا قىرعىزستان تاراپى كوكپاردان الەم چەمپيوناتى نەمەسە حالىقارالىق تۋرنيرلەرگە شاقىرعان جاعدايدا ديالوگ جۇرگىزۋگە ءازىر ەكەنىمىزدى جەتكىزەمىز.

كوپشىلىكتىڭ ەكى ەل اراسىنداعى قارىمتا كەزدەسۋدى كۇتىپ وتىرعانى كوكپار سپورتىنا دەگەن قىزىعۋشىلىقتىڭ ارتقانىن بىلدىرەدى. بۇل قۋانتارلىق جاعداي. ۇلتتىق ويىنىمىزدىڭ دەڭگەيى ءبىر ساتى كوتەرىلگەندىگىنىڭ بەلگىسى رەتىندە قابىلدايمىز، - دەلىنگەن رەسمي جاۋاپتا.

كوكپار - ەجەلدەن ەكى ەلدىڭ دە مادەنيەتى مەن تاريحىندا ەرەكشە ورىن الاتىن سپورت ءتۇرى.

وكىنىشكە قاراي، حالىق اراسىندا قازاق-قىرعىز قۇرامالارىنىڭ ويىنى ەمەس، كەيبىر تۇسىنبەۋشىلىكتەر قوعام نازارىن اۋدارتىپ وتىر. بىرىنشىدەن، ەرەجە بۇزعان قازاقستاندىق سپورتشى جازاسىن الىپ، ەكى مينۋتتىق ايىپ الاڭىنا جىبەرىلدى. ەكىنشىدەن، قىرعىز دەلەگاتسياسىنىڭ تاراپىنان تورەشىلەرگە ەشقانداي پروتەست كەلىپ تۇسپەگەنىن دە ەستەرىڭىزگە سالامىز. قازاقستاننىڭ كوكپار فەدەراتسياسى كەز كەلگەن كەلىسپەۋشىلىكتەر سپورتتىق ادەپ نەگىزىندە شەشىلۋى ءتيىس ەكەنىن اتاپ وتەدى. الەۋمەتتىك جەلىدەگى نەگاتيۆ پىكىرلەر، قازاق سپورتشىلارىنىڭ تاراپىنا ايتىلعان جاعىمسىز سوزدەردى دە قۇپتامايمىز. ءبىز قازاق جانە قىرعىز حالىقتارى اراسىنداعى دوستىق پەن ىنتىماقتاستىقتى جوعارى باعالايمىز، ءبىراق ماراپاتتاۋ راسىمىندە وزىنە تيەسىلى جۇلدەنى شەشىپ تاستاۋ، جەڭىسكە جەتكەن قۇرامانىڭ ءانۇرانىن تىڭداماي كەتىپ قالۋ بىزگە جات قىلىق. سپورتتىق باسەكە كەزىندەگى داۋ-جانجالدار ەكى ەلدىڭ اراسىنداعى ىنتىماققا كەرى اسەرىن تيگىزبەۋ قاجەت. كەلەسىدە بۇنداي كەلەڭسىز جاعداي قايتالانباس ءۇشىن تارتىپتىك كەڭەس وتىرىسى وتەتىنىن، بۇل جاعدايدا ءتيىستى شارا قولداناتانىمىزدى حابارلايمىز. سپورتتاعى جەڭىس پەن جەڭىلىس قاتار جۇرەتىنىن ۇمىتپاعان ابزال»، - دەپ جاۋاپ بەردى كوكپار فەدەراتسياسى.

ايتا كەتەيىك، استانادا وتكەن 5-كوشپەندىلەر ويىنىنداعى فينالدا ەسە جىبەرگەن قىرعىزستان كوكبورى فەدەراتسياسى قازاقستاندى جارىسقا شاقىرعان بولاتىن.