قازاقستان كەمەلەرىندەگى مامانداردىڭ 40 پايىزى شەتەلدىكتەر

استانا. KAZINFORM - قازاقستانىڭ تەڭىز فلوتىندا جۇرگەن كاسىبي مامانداردىڭ 40 پايىزى شەتەلدىكتەر. كولىك مينيسترلىگى تەمىرجول جانە سۋ كولىگى كوميتەتى ءتوراعاسىنىڭ ورىنباسارى قاسىم تىلەپوۆ ورتالىق كوممۋنيكاتسيالار قىزمەتىندە وسىنداي دەرەك كەلتىردى.

«سالاداعى كادرلىق الەۋەتكە كەلەتىن بولساق، وتاندىق تەڭىز فلوتىنىڭ ءجۇزۋ قۇرامىندا 1,5 مىڭعا جۋىق تەڭىزشى بار. ونىڭ 900 ى قازاقستان ازاماتتارى، 600 ى شەتەلدىكتەر. جالپى تەڭىز كولىگى كادرلارىنا قاجەتتىلىك شامامەن 200 ادامعا تەڭ. تەڭىز كولىگى ماماندارىن ەكى جوعارى وقۋ ورنى دايارلايدى - قازاقستان- بريتان تەحنيكالىق ۋنيۆەرسيتەتى جانىنداعى قازاقستان تەڭىز اكادەمياسى جانە ش. ەسەنوۆ اتىنداعى كاسپي تەحنولوگيا جانە ينجينيرينگ ۋنيۆەرسيتەتى»، - دەدى ول.

كوميتەتتىڭ انىقتاما مالىمەتى بويىنشا، 2020 -جىلى تەڭىز ماماندىقتارىنىڭ وقۋ اقىسى 636 مىڭ تەڭگەدەن 1 ميلليون تەڭگەگە دەيىن قىمباتتاتىلعان. قازاقستان- بريتان تەحنيكالىق ۋنيۆەرسيتەتى ەندى ونى 2,5 ميلليون تەڭگەگە دەيىن كوتەرۋدى سۇراپ وتىر. كوميتەت عىلىم جانە جوعارى ءبىلىم مينيسترلىگىنە وسى ۇسىنىستى قولداپ حات جولداپ وتىر.

اۆتور
ەسىمجان ناقتىباي