قازاقستان جاستارىنىڭ 46 پايىزىندا جوعارى ءبىلىم بار

استانا. KAZINFORM - جۇمىسپەن قامتىلعان جاستار سانى 1,8 پايىز ءوستى. بۇل جايىندا ۇلتتىق ستاتيستيكا بيۋروسىنان حابارلاندى.

2024-جىلعى II توقسان قورىتىندىسى بويىنشا جۇمىسپەن قامتىلعان جاستاردىڭ سانى 3,6 ميلليون ادامدى قۇراپ، وتكەن جىلدىڭ سايكەس كەزەڭىمەن سالىستىرعاندا 1,8 پايىز وسكەن.

جاستاردىڭ 46 پايىزدا جوعارى جانە جوعارى وقۋ ورنىنان كەيىنگى ءبىلىم، 48 پايىز - تەحنيكالىق كاسىپتىك ءبىلىمى بار.

ەكونوميكالىق قىزمەت تۇرلەرى بويىنشا جاستاردىڭ كوبى مىنا سالالاردا ەڭبەكتەنەدى: كوتەرمە جانە بولشەك ساۋدا، اۆتوكولىك جوندەۋ (643 مىڭ ادام)، ءبىلىم بەرۋ (438 مىڭ ادام) جانە ونەركاسىپ (416 مىڭ ادام).

جاستار اراسىنداعى جۇمىسسىزدىق دەڭگەيى - 3,2 پايىز (2023-جىلى Ⅱ توقساندا - 3,6 پايىز بولعان).

جۇمىسپەن قامتىلعان جاستاردىڭ جاس قۇرامىن قاراستىراتىن بولساق، 2023-جىل قورىتىندىسى بويىنشا نەگىزگى ۇلەس (50,4 پايىز) 29-34 جاس توبى ارالىعىنداعىلارعا كەلەدى.

ەستەرىڭىزگە سالا كەتەيىك، 2023-جىلدان باستاپ قازاقستاندا جاستاردىڭ جاسى 35 جاسقا دەيىن ۇزارتىلدى.