قازاقستان فۋتبول ليگاسىنىڭ پرەزيدەنتى تاعايىندالدى

استانا. KAZINFORM - قازاقستان فۋتبول ليگاسى (QFL) پرەزيدەنتى قىزمەتىنە عاني قاينازاروۆ كەلدى.

بۇل شەشىم ليگاعا مۇشە كلۋبتار وكىلدەرىنىڭ كەزەكتەن تىس وتىرىسىندا قابىلداندى. داۋىس بەرۋشىلەردىڭ كوپشىلىگى ع. قاينازاروۆتىڭ كانديداتۋراسىن ماقۇلدادى.

قازاقستاندىق جانكۇيەرلەر عاني قاينازاروۆتىڭ ەسىمىن جاقسى بىلەدى. فۋتبول مامانى مانسابىندا ءار ۋاقىتتا «قايرات» پەن «تاراز» كلۋبتارىندا ويىن كورسەتىپ، ۇلتتىق قۇراما ساپىندا ەل نامىسىن قورعادى. 1996 -جىلى «تاراز» ساپىندا ەل چەمپيونى اتاندى.

فۋتبولشى مانسابىن اياقتاعان سوڭ، «تارازدا» پرەزيدەنت، «استانادا» سپورت ديرەكتورى قىزمەتىن اتقاردى. سونداي- اق، قازاقستان فۋتبول فەدەراتسياسىندا قۇراما كوماندالار دەپارتامەنتىنىڭ ديرەكتورى بولدى. بيىل QFL ۆيتسە- پرەزيدەنتى رەتىندە تاعايىندالدى.

ەسكە سالساق، بۇدان بۇرىن قازاقستان فۋتبول ليگاسىنىڭ پرەزيدەنتى قىزمەتىن اتقارعان رافاەل گاريبيان قىزمەتىنەن كەتتى.

ول قازاقستان فۋتبول ليگاسى پرەزيدەنتى قىزمەتىن 2023 -جىلدىڭ 2-مامىرىنان باستاپ اتقاردى.