قازاقستان شەتەلدىك عىلىم دوكتورى ديپلومدارىن تانۋ پروتسەسىن توقتاتا ما - ۆيتسە-پرەمەر جاۋابى

استانا. KAZINFORM - پرەمەر-ءمينيستردىڭ ورىنباسارى تامارا دۇيسەنوۆا ءماجىلىس دەپۋتاتتارىنىڭ ەلىمىزدە شەتەلدىك عىلىم دوكتورى ديپلومدارىن تانۋ پروتسەسىن توقتاتۋعا قاتىستى ساۋالىنا جاۋاپ بەردى.

«قازاقستان 2010-جىلدان باستاپ بولون پروتسەسىنىڭ تولىق قۇقىلى مۇشەسى سانالادى جانە ۇلتتىق بىلىكتىلىك شەڭبەرىن بەكىتتى. ول ەۋروپالىق بىلىكتىلىك شەڭبەرى جانە ءبىلىم بەرۋدىڭ حالىقارالىق ستاندارتتىق جىكتەلىمى نەگىزىندە ازىرلەنگەن. «ءبىلىم تۋرالى» زاڭعا سايكەس، قازاقستاندا عىلىم كانديدات جانە عىلىم دوكتورى عىلىمي دارەجەلەرى بەرىلمەيدى. قازاقستاندا عىلىم دوكتورىن تانۋ ەۋرازيالىق ەكونوميكالىق وداق تۋرالى حالىقارالىق شارتتىڭ مىندەتتەمەلەرىنە سايكەس PhD دوكتورى دارەجەسىن بەرۋ جولىمەن جۇزەگە اسىرىلادى»، - دەدى ۇكىمەت باسشىسىنىڭ ورىنباسارى.

ونىڭ اتاپ وتۋىنشە، 2023-جىلى بەكىتىلگەن ءبىلىم تۋرالى قۇجاتتاردى تانۋ قاعيدالارىمەن رەگلامەنتتەلگەن شەتەلدىك قۇجاتتاردى تانۋ پروتسەدۋراسى ۇلتتىق مۇدەگە ساي كەلەتىن ولشەمشارتتاردى قامتيدى. ماسەلەن، سوڭعى 3 جىلدا شەتەلىدك ديپلومداردى تانۋ تۋرالى 306 ءوتىنىش ءتۇسىپ، ونىڭ ىشىندە 103 ديپلوم تانىلماعان. بۇل - 33,6 پايىز. سونىمەن قاتار ە ا ە و- داعى سەرىكتەس ەلدەردەن تاراپىنان دا وتىنىشتەر سانىنىڭ تومەندەۋى بايقالادى.

«ءوز كەزەگىندە، قاعيدا ارەكەتىن توقتاتۋ قازاقستاننىڭ حالىقارالىق شارت نورمالارىن جۇزەگە اسىرۋ جونىندەگى مىندەتتەمەلەرىن بۇزۋعا، شەتەلدە عىلىم دوكتورى عىلىمي اتاعىن العان ازاماتتاردىڭ قۇقىعىنا نۇقسان كەلتىرۋگە الىپ كەلەدى»، - دەدى تامارا دۇيسەنوۆا.

اۆتور

مارلان جيەمباي