قازاقستان شەت ەلدەردەن تىكەلەي ينۆەستيتسيا تارتۋ بويىنشا ورتالىق ازيادا كوش باستاپ تۇر - پرەزيدەنت

استانا. KAZINFORM - قازاقستان شەت ەلدەردەن تىكەلەي ينۆەستيتسيا تارتۋ بويىنشا ورتالىق ازيادا كوش باستاپ تۇر. بۇل تۋرالى اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا مەملەكەت باسشىسى قاسىم-جومارت توقايەۆ ايتتى.

«قازاقتا «ەڭبەگىنە قاراي – ونبەگى» دەگەن ءسوز بار. مۇنى، ەڭ الدىمەن، اۋىل حالقىنىڭ ەرەن ەڭبەگىنىڭ جەمىسى دەۋگە بولادى. مەملەكەت تاراپىنان دا ءتيىستى جۇمىس جۇرگىزىلدى، قاجەتتى كومەك بەرىلدى. قازىر ەلىمىزدە جاڭا ەكونوميكالىق باعدار اياسىندا ناقتى شارالار قولعا الىنىپ جاتىر. جۇيەلى جۇمىستاردىڭ ناتيجەسىندە ينفلياتسيا دەڭگەيى تومەندەدى، سونداي-اق ۇلتتىق ەكونوميكانىڭ ءوسىمى 2024 -جىلدىڭ قاڭتار- قازان ايلارىندا 4 پايىزدان اسىپ، جاقسى قارقىن الدى. مۇنايدان تىس سالالاردى دامىتۋ ارقىلى وڭ ديناميكا بايقالادى. بۇل - ماڭىزدى ۇدەرىس»، - دەدى قاسىم-جومارت توقايەۆ.

مەملەكەت باسشىسىنىڭ اتاپ وتۋىنشە، ىشكى جالپى ءونىم ءوسىمىنىڭ ۇشتەن ەكىسىنەن استامى ساۋدا، وڭدەۋ ونەركاسىبى، قۇرىلىس پەن اۋىل شارۋاشىلىعىنا تيەسىلى. وسى باعىتتاعى بەلسەندى جۇمىستى جالعاستىرۋ كەرەك.

«قازاقستان شەت ەلدەردەن تىكەلەي ينۆەستيتسيا تارتۋ بويىنشا ورتالىق ازيادا كوش باستاپ تۇر. بيىل جەتەكشى حالىقارالىق رەيتينگ اگەنتتىكتەرى قازاقستاننىڭ قازىرگى نەسيە رەيتينگى ينۆەستيتسيالىق سەنىمدىلىك دەڭگەيىندە تۇرعانىن راستادى. قىركۇيەكتە Moody’s اگەنتتىگى قازاقستاننىڭ ۇزاقمەرزىمدى رەيتينگىن «تۇراقتى» دەڭگەيىنە كوتەردى. بۇل - تاۋەلسىز قازاقستان تاريحىنداعى ەڭ ۇزدىك ناتيجە»، - دەدى پرەزيدەنت.

مەملەكەت باسشىسى قازاقستان بيىل 12 ميلليون توننا استىق ەكسپورتقا شىعارعانىن ايتتى.

«ينۆەستيتسيا ەكونوميكانىڭ كەن وندىرۋدەن تىس سالالارىنا كوبىرەك تارتىلدى. وڭدەۋ سەكتورى كولەمى جاعىنان قازىردىڭ وزىندە كەن ءوندىرۋدى باسىپ وزدى ءارى ۇزدىكسىز ءوسىپ كەلەدى بۇل سالادا بۇگىندە 630 مىڭ ازامات جەمىستى ەڭبەك ەتەدى. جىل سوڭىندا جالپى قۇنى 1,2 تريلليون تەڭگەنى قۇرايتىن 180 يندۋستريالدى جوبا ىسكە اسىرىلماق»، - دەدى پرەزيدەنت.

مەملەكەت باسشىسىنىڭ دەرەگىنشە، كاتودتى مىس (قاراعاندى وبلىسى)، فەرروقورىتپا (پاۆلودار وبلىسى)، جۇك كولىكتەرىنىڭ بولشەكتەرى (قوستاناي وبلىسى)، سەمەنت، باعالى مەتالل وڭدەۋ ءوندىرىسى (جامبىل وبلىسى) سەكىلدى ءىرى زاۋىتتار جۇمىس ىستەي باستايدى. قازىرگى ۋاقىتتا ۆولفرام كەنىن قايتا وڭدەۋ (الماتى وبلىسى)، Chevrolet Onix اۆتوكولىك ماركاسىن قۇراستىرۋ (قوستاناي وبلىسى)، مىس كونسەنتراتى (جامبىل وبلىسى)، جىلۋ وقشاۋلاعىش ماتەريالدارى (الماتى وبلىسى) جانە قىش تاقتالارى (شىمكەنت قالاسى) وندىرىستەرى پايدالانۋعا بەرىلدى. «اتىراۋ وبلىسىندا پوليپروپيلەن شىعاراتىن زاۋىتتىڭ اشىلۋى مۇناي- گاز حيمياسى سالاسىنىڭ تولىقتاي قالىپتاسۋىنا ىقپال ەتتى. الداعى ۋاقىتتا پوليەتيلەن مەن بۋتاديەن ءوندىرۋ جوسپارلانعان. ماڭعىستاۋ وبلىسىندا ەۋروپالىق كونسورتسيۋمنىڭ قاتىسۋىمەن «جاسىل» سۋتەگى ءوندىرىسى جوباسى جۇزەگە اسىرىلادى. وسىلايشا ەلىمىزدە وزىق حالىقارالىق ستاندارتتارعا ساي جانە سىرتقى نارىقتا سۇرانىسقا يە ءونىم وندىرەتىن جاڭا كاسىپورىندار قۇرىلىپ جاتىر»، - دەدى قاسىم-جومارت توقايەۆ.

اۆتور

مارلان جيەمباي