قازاقستان درونداردى تاڭبالاپ اكەلۋ ءتارتىبىن ەنگىزبەكشى
استانا. KAZINFORM - ونەركاسىپ جانە قۇرىلىس مينيسترلىگى مەن قورعانىس مينيسترلىگى 2026 -جىلى پيلوتسىز ۇشاتىن اپپاراتتاردىڭ قوزعالىسىن باسقاراتىن ارنايى ورتالىق قۇرۋعا كىرىسەدى. بۇل تۋرالى پرەمەر-مينيستر ولجاس بەكتەنوۆتىڭ ءماجىلىس دەپۋتاتىنىڭ ساۋالىنا جولداعان جاۋاپتا ايتىلعان.
- ونەركاسىپ جانە قۇرىلىس مينيسترلىگى مۇددەلى مەملەكەتتىك ورگاندارمەن بىرگە «ەرەكشە تاۋارلاردى باقىلاۋ تۋرالى» زاڭعا سايكەس ناقتى تاۋارلاردىڭ ەكسپورتى مەن يمپورتىن قولدانىستاعى باقىلاۋدى ەسكەرە وتىرىپ، قازاقستان رەسپۋبليكاسىنىڭ اۋماعىنا اكەلۋ كەزىندە پ ۇ ا تاڭبالاۋ ماسەلەسىن شەشۋ بويىنشا جۇمىس جۇرگىزىپ جاتىر. وسىلايشا، جۇرگىزىلگەن جۇمىستاردىڭ قورىتىندىسى بويىنشا زاڭسىز اينالىمدى بولعىزباۋ جانە شىعارىلعان جەرىنىڭ قاداعالانۋىن قامتاماسىز ەتۋ ءۇشىن پ ۇ ا تاڭبالاۋعا قويىلاتىن ءبىرىڭعاي تەحنيكالىق تالاپتاردى ازىرلەۋ جوسپارلانعان، - دەلىنگەن جاۋاپتا.
ۇكىمەت ازاماتتىق پيلوتسىز اۆياتسيانى دامىتۋدىڭ 2025-2031 -جىلدارعا ارنالعان تۇجىرىمداماسىن بەكىتكەن.
- پيلوتسىز جۇيەلەردى دامىتۋ جونىندەگى 2025-2031 -جىلدارعا ارنالعان ارنايى باعدارلاما شەڭبەرىندە ۇشۋ اقپاراتىن ءتيىمدى جيناۋ ءۇشىن (ونەركاسىپ ءمينيسترىنىڭ 2025 -جىلعى 23-مامىرداعى № 177 جانە قورعانىس ءمينيسترىنىڭ 2025 -جىلعى 26-مامىرداعى № 608 بىرلەسكەن بۇيرىعىمەن بەكىتىلگەن) 2026 -جىلدىڭ 1-توقسانى ىشىندە پ ۇ ا ۇشۋىن باسقارۋدىڭ، باقىلاۋ مەن كەلىسۋدىڭ ءبىرىڭعاي ورتالىعىن قۇرۋ جونىندەگى جوسپاردى ازىرلەۋ كوزدەلگەن. تۇجىرىمداما اياسىندا ازىرلەمەلەر تىزبەسىن قالىپتاستىرۋ، ءبىلىم بەرۋ باعدارلامالارىن ەنگىزۋ جانە كادرلار دايارلاۋ، ەكونوميكا سالالارىندا قولدانۋ اياسىن كەڭەيتۋ، ءوندىرىستى قولداۋ، جاۋاپكەرشىلىكتى قاتاڭداتۋ جانە پ ۇ ا قاۋىپتەرىن بەيتاراپتاندىرۋ جونىندەگى ءىس-شارالار كوزدەلگەن، - دەپ جازادى پرەمەر-مينيستر.
ەسكە سالساق، ماۋسىم ايىندا سىرتقى ىستەر مينيسترلىگىنىڭ رەسمي وكىلى ايبەك سمادياروۆ رەسەيدى ابىگەرگە سالعان پيلوتسىز ۇشاتىن اپپاراتتار قازاقستان اۋماعىنان ۇشىرىلدى دەگەنگە ساياتىن الىپ-قاشپا اڭگىمەلەرگە جاۋاپ بەرگەن ەدى.