قازاقستان ءبىز ويلاعاننان دا جوعارى دامىعان ەل ەكەن - كورەيالىق بالۋان قىز

استانا. KAZINFORM  - دۇنيەجۇزىلىك كوشپەندىلەر ويىندارىنا كەلگەن كورەيالىق بالۋان قىز و دجي حەن ءوزىن قازاقستان قاتتى تاڭعالدىرعانىن ايتىپ بەردى.

«مەن ومىرىمدە العاش رەت قازاقستانعا كەلىپ تۇرمىن. دۇنيەجۇزىلىك كوشپەندىلەر ويىنى اياسىندا ءبىرىنشى رەت قازاق كۇرەسىنەن باعىمدى سىنادىم. بۇل مەن ءۇشىن ۇمىتىلماس ساتتەر بولىپ قالارى انىق. ءوز ەلىمدە كورەي كۇرەسىمەن اينالىسامىن. ال قازاق ەلىندە العاش رەت قازاق كۇرەسىنەن باعىمدى سىناپ كوردىم. وكىنىشكە قاراي، ءبىرىنشى بەلدەسۋىمدە جەڭىلىس تاپتىم. ءبىراق، ۇتىلىپ قالسام دا وزىمدىك تاجىريبە الدىم دەپ ويلايمىن. قازاق كۇرەسىنىڭ قانداي كۇرەس ەكەنىن كوردىم، ءتۇسىندىم. وسىعان دەيىن ەرەجەلەرىن، ءادىس جاساۋ قاعيدالارىن ۆيدەولاردان قاراپ، ءوز بەتىمشە ۇيرەنگەن ەدىم. مىنە، بۇگىن ءوز كوزىممەن كوردىم»، - دەدى بالۋان قىز.

سونىمەن قاتار، قازاقستان ءوزى ويلاعاننان دا دامىعان ەل ەكەنىن كورىپ، قاتتى تاڭعالعانىن اتاپ ءوتتى.

«مەن قازاقستاندى حالقى از، شاعىن، اسا ءبىر دامىماعان ەل ەكەن دەپ ويلادىم. كەلگەندە ءبارى باسقاشا كورىندى. قازاق ەلى ءبىز ويلاعان دەڭگەيدەن الدەقايدا دامىپ كەتكەن ەل ەكەنىن كورىپ قاتتى تاڭعالدىم. استانالارىڭىز قانداي ادەمى. حالىقتارىڭىز قانداي قوناقجاي! ماعان ءبارى-ءبارى قاتتى ۇنادى. كوشپەندىلەر ويىنىن دا وتە جوعارى دەڭگەيدە ۇيىمداستىرىپ جاتقاندارىڭىز كورىنىپ تۇر. مەن بۇيىرسا، قازاق كۇرەسىن تولىق مەڭگەرىپ، تاعى دا ەلدەرىڭىزگە جارىسقا كەلگىم كەلەدى»، - دەدى كورەيالىق بالۋان و دجي حەن.

ەستەرىڭىزگە سالا كەتەيىك، بۇگىن V دۇنيەجۇزىلىك كوشپەندىلەر ويىندارىنىڭ ءۇشىنشى كۇنى ءوز مارەسىنە جەتتى. قازاقستان قۇراماسى ازىرگە 21 التىن، 10 كۇمىس، 17 قولا (48) مەدالمەن جالپى ەسەپتە كوش باستاپ كەلەدى.

اۆتور
كۇنسۇلتان وتارباي