قازاقستان «بولاشاق» ستيپەندياتتارىنا قانشا قاراجات جۇمساپ جاتىر

استانا. KAZINFORM - «حالىقارالىق باعدارلامالار ورتالىعى» ا ق «بولاشاق» باعدارلاماسى ستيپەندياتتارىن وقىتۋعا بولىنگەن بيۋجەت قاراجاتىنىڭ سوماسىن اتادى.

ورتالىق مالىمەتىنە قاراعاندا، وقىتۋ قۇنى ءبىلىم باعدارلاماسىنا، باراتىن ەلگە جانە تاڭدالعان ماماندىققا بايلانىستى وزگەرىپ تۇرادى. سونىمەن قاتار، قارجىنى ەسەپتەۋ كەزىندە ۋنيۆەرسيتەتتىڭ رەيتينگى، ونىڭ ورنالاسقان جەرى، باعدارلامانىڭ ۇزاقتىعى دا ماڭىزدى ءرول اتقارادى.

«ورتا ەسەپپەن ءبىر ستيپەندياتقا ماگيستراتۋرا باعىتىندا شامامەن 10-15 ميلليون تەڭگە جانە دوكتورانتۋراعا 20-25 ميلليون تەڭگە جۇمسالادى. ونىڭ ىشىندە وقۋ اقىسى، شاكىرتاقى، اۋە كولىگىمەن ساپارلاۋ اقىسى جانە باسقا دا سوعان بايلانىستى شىعىندار قامتىلعان»، - دەلىنگەن ورتالىقتىڭ Kazinform اگەنتتىگىنە بەرگەن جاۋابىندا.

ايتا كەتەيىك، «بولاشاق» حالىقارالىق ستيپەندياسى 1993-جىلى 5-قاراشادا قۇرىلىپ، ءبىر جىلدان كەيىن العاشقى قازاقستاندىق ستۋدەنتتەر وقۋعا باردى. 30 جىل ىشىندە 12731 ادام ديپلوم الدى، ياعني ورتا ەسەپپەن جىلىنا 425 ادام وقۋىن ءتامامداپ تۇردى. كەيىنگى بىرنەشە جىلدا 2607 ادام وقۋىن اياقتادى.

قازىرگى كەزدە «بولاشاق» باعدارلاماسى بويىنشا 939 قازاقستاندىق ءبىلىم الىپ جاتىر. ولاردىڭ باسىم بولىگى ماگيستراتۋرادا - 704 ادام. ال دوكتورانتۋرادا 133 بولسا، تاعى 102 ادام تاعىلىمدامادان وتۋگە باردى.

بۇدان بۇرىن حابارلانعانداي، قىركۇيەك ايىنىڭ باسىندا شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ شەشىمىمەن 150 قازاقستاندىق «بولاشاق» حالىقارالىق ستيپەندياسىنىڭ يەگەر اتاندى.