قازاقستان بوكس فەدەراتسياسىنىڭ جاڭا باسشىسى ۇلتتىق قۇرامامەن كەزدەستى

استانا. KAZINFORM - قازاقستان بوكس فەدەراتسياسىنىڭ جاڭادان سايلانعان پرەزيدەنتى شاحمۇرات ءمۇتالىپ ۇلتتىق قۇرامانىڭ بىلعارى قولعاپ شەبەرلەرىمەن كەزدەستى. بۇل تۋرالى بوكس ساراپشىسى جالعاس تۇكەشوۆ Instagram-داعى رەسمي پاراقشاسىنا جازدى.

كەزدەسۋ بارىسىندا بوكستان ۇلتتىق قۇرامانىڭ باس باپكەرى مىرزاعالي ايتجانوۆ جاڭا باسشىعا يتاليادا وتەتىن رەيتينگتىك تۋرنيرگە باراتىن سپورتشىلاردى تانىستىردى. كەيىن شاحمۇرات ءمۇتالىپ سپورتشىلارعا ساتتىلىك تىلەپ، جۇمىلا ەڭبەك ەتۋگە شاقىردى.

«ماعان داۋىس بەرىپ، قولداپ وسى فەدەراتسيانىڭ باسشىسى ەتىپ تاعايىنداپ وتىر. ءبارىڭىز بىلەسىزدەر الدىمىزدا وتە ۇلكەن مىندەت تۇر. بوكس ءبىزدىڭ ۇلتتىق سپورتىمىز عوي. بۇكىل حالىق جانە پرەزيدەنتىمىز بىزگە ءۇمىت ارتىپ وتىر. ەڭ باستىسى، كەلە جاتقان وليمپياداعا دايىندىعىمىزدى شىڭداۋىمىز كەرەك. وسى ورايدا جەكە وزدەرىڭىزبەن تانىسىپ، دايىندىقتارىڭىزدى، جاعدايلارىڭىزدى كورەيىن دەپ كەلگەن جايىم بار. ءبىز بارلىق قولدان كەلەتىن جۇمىستى، جاعدايدى جاساۋعا دايىنبىز. ارينە اقىرعى ناتيجەنى وزدەرىڭىزدەن كۇتەمىز. ءبىراق ماقساتىمىزعا جەتۋ ءۇشىن قانداي دا ءبىر جاعدايلار بولسا، سۇراقتار بولسا، سونىڭ ءبارىن ورىنداپ، بارلىق جاعدايدى جاساۋدا ايانىپ قالمايمىز»، - دەدى فەدەراتسيا باسشىسى.

سونداي-اق شاحمۇرات ءمۇتالىپ بوكس فەدەراتسياسىنىڭ بۇرىنعى باسشىسى تۋرالى ءسوز قوزعادى.

«كەڭەس حاميت ۇلىنىڭ دا ءبىزدىڭ بوكسقا سىڭىرگەن ەڭبەگى وتە كوپ. ول كىسى الىسقا كەتكەن جوق. بوكس فەدەراتسياسىنىڭ قۇرمەتتى پرەزيدەنتى بولىپ قالدى»، - دەدى شاحمۇرات ءمۇتالىپ.

ەستەرىڭىزگە سالا كەتەيىك، وسىعان دەيىن يتاليادا وتەتىن ليتسەنزيادىق تۋرنيرگە باس باپكەر مىرزاعالي ايتجانوۆ كىمدەردى الىپ باراتىنىن جازعان بولاتىنبىز

اۆتور
كۇنسۇلتان وتارباي