قازاقستان بريكس-تى جاھاندىق پروگرەستىڭ قوزعاۋشى كۇشتەرىنىڭ ءبىرى رەتىندە قاراستىرادى - پرەزيدەنت
قازان. KAZINFORM - قازاقستان بريكس- ءتى جاھاندىق پروگرەستىڭ قوزعاۋشى كۇشتەرىنىڭ ءبىرى رەتىندە قاراستىرادى. بۇل تۋرالى مەملەكەت باسشىسى قاسىم-جومارت توقايەۆ بريكس-ءتىڭ XVI سامميتى پلەنارلىق وتىرىسىنىڭ «بريكس+» /«اۋتريچ» فورماتىنداعى جيىنىندا ايتتى.
«ءبىزدىڭ ەلىمىز بريكس- كە مۇشە مەملەكەتتەردىڭ تاياۋ شىعىستاعى جاعدايدىڭ شيەلەنىسۋىنە، ونىڭ سالدارىنان ادام شىعىنى مەن گۋمانيتارلىق اپاتقا اكەلىپ سوقتىرعانىنا الاڭداۋشىلىق تانىتۋىن قولدايدى. كەدەيشىلىك، تەڭسىزدىك جانە ءبىلىمنىڭ جەتىسپەۋشىلىگى سياقتى جانجالداردىڭ تۇپكى سەبەپتەرىن جويۋ ءۇشىن بىرلەسىپ جۇمىس ىستەۋ، ءبىزدىڭ ويىمىزشا، حالىقارالىق ساياسي ىنتىماقتاستىقتى نىعايتۋدىڭ نەگىزگى فاكتورى بولىپ قالا بەرەدى. قازاقستان ب ۇ ۇ قاۋىپسىزدىك كەڭەسىن رەفورمالاۋدى جانە ونىڭ افريكا، لاتىن امەريكاسى جانە ازيا ەلدەرىنەن جاڭا مۇشەلەردى قوسۋ ەسەبىنەن كەڭەيتىلۋىن قولدايدى»، - دەدى قاسىم-جومارت توقايەۆ.
مەملەكەت باسشىسى بەيبىتشىلىك پەن قاۋىپسىزدىك ماسەلەلەرىن شەشۋدە جاھاندىق وڭتۇستىك ەلدەرىنىڭ ءۇنى ەستىلۋى تيىستىگىن باسا ايتتى.
«بريكس جاھاندىق باسقارۋ قۇرىلىمىنداعى ورتا دەرجاۆالار مەن دامىپ كەلە جاتقان ەكونوميكالار دەپ اتالاتىن ەلدەردىڭ وكىلدىگىن كۇشەيتۋ ارقىلى بۇل ۇدەرىستە شەشۋشى ءرول اتقارا الادى. قازاقستان بريكس- ءتى جاھاندىق پروگرەستىڭ قوزعاۋشى كۇشتەرىنىڭ ءبىرى رەتىندە قاراستىرادى»، - دەدى پرەزيدەنت.
مەملەكەت باسشىسى بريكس ءوزارا ءتيىمدى ىنتىماقتاستىققا نيەتتى كوپتەگەن ەلدىڭ نازارىن اۋداراتىن حالىقارالىق اۋقىمداعى جاھاندىق ورتالىققا اينالىپ كەلە جاتقانىن اتاپ ءوتتى.
- بريكس دامۋ تۇرعىسىنان مول الەۋەتكە يە جانە ءتۇرلى قۇرلىقتاعى مەملەكەتتەردى بىرىكتىرەدى. سونداي- اق ىنتىماقتاستىقتى نىعايتىپ، ورتاق رەسۋرستاردى بارلىق قاتىسۋشىنىڭ يگىلىگىنە ءتيىمدى پايدالانادى. ءوزارا قۇرمەت پەن سەرىكتەستىك، بىرلەسە وركەندەۋ قاعيداتتارىنا نەگىزدەلگەن كەلەشەكتىڭ ىرگەسىن قالاۋعا بريكس- ءتىڭ تاجىريبەسى دە، مۇمكىندىگى دە جەتەدى، - دەدى پرەزيدەنت.
قاسىم-جومارت توقايەۆتىڭ پىكىرىنشە، بريكس- ءتىڭ كوپجاقتى كۇش-جىگەرى الەمدە ءالى دە بالاماسى جوق امبەباپ قۇرىلىم سانالاتىن ب ۇ ۇ قىزمەتىن تولىقتىرا تۇسەدى.
- ب ۇ ۇ جارعىسىنداعى ديپلوماتيا مەن ديالوگ قاعيداتتارى بريكس- ءتىڭ نەگىزگى كۇن تارتىبىنە اينالدى. ول قاقتىعىستاردى بەيبىت جولمەن رەتتەۋگە جانە ستراتەگيالىق تۇراقتىلىقتى نىعايتۋعا ىقپال ەتىپ وتىر. ءبىز ەۋرازيانىڭ تەڭ ءارى ءبىرتۇتاس قاۋىپسىزدىگىن قامتاماسىز ەتۋگە قاتىستى رەسەيدىڭ تۇجىرىمداماسىن جوعارى باعالايمىز. ونىڭ ءتۇپ نەگىزىندە ءوزارا سەنىم مەن ىنتىماقتاستىقتى نىعايتۋ ارقىلى گەوساياسي قىسىمدى تومەندەتۋ نيەتى جاتىر. قازاقستان قىتايدىڭ حالىقارالىق تۇراقتىلىقتى ساقتاۋ، ەگەمەندىكتى قورعاۋ، قاقتىعىستاردى بەيبىت جولمەن شەشۋ جانە كوپقىرلى تاسىلدەردى قولدانۋ ارقىلى جاھاندىق قاۋىپسىزدىكتى قامتاماسىز ەتۋ باستاماسىن قولدايدى. سونداي- اق ەلىمىز قىتاي مەن برازيليانىڭ ۋكراينا جونىندەگى بەيبىت جوسپارىن قۇپتايدى، - دەدى پرەزيدەنت.
ق ر پرەزيدەنتى قاسىم-جومارت توقايەۆ رەسەي فەدەراتسياسىنىڭ پرەزيدەنتى ۆلاديمير پۋتيننىڭ شاقىرۋىمەن بريكس- كە مۇشە مەملەكەتتەر باسشىلارىنىڭ XVI سامميتىنە قاتىسۋ ءۇشىن قازان قالاسىنا جۇمىس ساپارىمەن بارعان بولاتىن.
مەملەكەت باسشىسى بريكس سامميتىنە قاتىسۋشىلارمەن ءبىرقاتار كەزدەسۋ وتكىزدى.