قازاقستان بارلىق تاراپتى سيريا داعدارىسىن كىدىرىسسىز شەشۋگە بەلسەندى قاتىسۋعا شاقىرادى

استانا. KAZINFORM - قازاقستان بارلىق تاراپتى سيريا داعدارىسىن كىدىرىسسىز شەشۋگە بەلسەندى قاتىسۋعا شاقىرادى. بۇل تۋرالى اتالعان كەلىسسوزدەردىڭ جالپى وتىرىسىندا سىرتقى ىستەر ءمينيسترىنىڭ ورىنباسارى الىبەك باقايەۆ ءمالىم ەتتى.

«بۇگىن ءبىز سيريادا بەرىك بەيبىتشىلىكتى ورناتۋ جولىنداعى ماڭىزدى كەزەڭ - استانا پروتسەسى اياسىنداعى جۇمىسىمىزدى جالعاستىرىپ وتىرمىز. بۇل وقيعا سيريانىڭ بولاشاعى ءۇشىن عانا ەمەس، سونىمەن قاتار كوپتەگەن كۇردەلى ماسەلە مەن قايشىلىقتارعا تاپ بولعان بۇكىل ايماق ءۇشىن ماڭىزدى. تاياۋ شىعىستاعى شيەلەنىستىڭ قازىرگى ۋشىعۋى شەكارادان تىس جەرلەردى قامتىپ، ايماقتىق تۇراقتىلىققا قاۋىپ توندىرەتىن جانە ايتارلىقتاي گەوساياسي ءارى ەكونوميكالىق كەدەرگىلەر تۋدىراتىن ەلەۋى تاۋەكەلدەردى دە قوسا قوزدىرادى. ءبىز بۇل تەكەتىرەستىڭ ءۇشىنشى تاراپتىڭ قاتىسۋىمەن اۋقىمدى اسكەري قاقتىعىسقا ۇلاسۋ مۇمكىندىگىنە ەرەكشە قىراعىلىق تانىتۋىمىز قاجەت. مۇنداي وقيعالاردىڭ سالدارى ايماقتىڭ بولاشاق وركەندەۋى مەن قاۋىپسىزدىگى ءۇشىن جويقىن بولادى. وسىنى ەسكەرە وتىرىپ، ءبىزدىڭ بارلىق مۇددەلى تاراپ اراسىندا سىندارلى ديالوگ قالىپتاستىرۋىمىز وتە ماڭىزدى. ساياسي شەشىمگە ۇمتىلۋ ايرىقشا ماڭىزعا يە. ءبىز بەرىك بەيبىتشىلىك پەن تۇراقتىلىققا جول اشۋعا باعىتتالعان ديپلوماتيالىق باستامالارعا باسىمدىق بەرۋىمىز قاجەت دەپ ەسەپتەيمىز»، - دەدى الىبەك باقايەۆ.

ونىڭ اتاپ وتۋىنشە، وسى ماقساتقا جەتۋ ءۇشىن، سيريانىڭ بولاشاعىن تالقىلاۋ ءۇشىن كونستيتۋتسيالىق كوميتەتتىڭ وتىرىستارىن جانداندىرۋ قاجەت. مۇنداي پىكىرتالاستار ىشكى ساياسي بىرلىكتى نىعايتۋ، ۇلتتى جارقىن جانە تۇراقتى بولاشاققا باعىتتاۋ ءۇشىن وتە ماڭىزدى.

«سوڭعى جىلدارى قازاقستان سيريا حالقىن قولداپ كەلەدى جانە سيريا داعدارىسىن رەتتەۋدە بەلسەندى ءرول اتقارادى. 2017 -جىلدىڭ قاڭتار ايىنان باستاپ، سيريا بويىنشا استانا فورماتىندا يران، رەسەي جانە تۇركيانىڭ دەلدالدىعىمەن، ب ۇ ۇ- نىڭ قولداۋىمەن كەلىسسوزدەر ءوتىپ كەلەدى. بۇل پلاتفورما بىزگە دەەسكالاتسيا ايماقتارىن دامىتۋعا جانە زورلىق-زومدىلىقتى ازايتۋعا ىقپال ەتەتىن ماڭىزدى كەلىسىمدەرگە قول جەتكىزۋگە مۇمكىندىك بەردى. قازاقستان قاقتىعىسۋشى تاراپتاردى تاتۋلاستىرۋ ءۇشىن حالىقارالىق ىنتىماقتاستىقتىڭ وتە ماڭىزدى ەكەنىن ءتۇسىنىپ، استانا پروتسەسىنە بەيىلدى بولىپ قالا بەرەدى. سيريا تاريحىنداعى وسى قايعىلى جايتتى شەشۋدىڭ جالعىز جولى بۇل – ب ۇ ۇ جارعىسى مەن قارارلارىنا سايكەس ۇيلەستىرىلگەن ساياسي جىنە ديپلوماتيالىق ءتاسىل. قازاقستان بارلىق تاراپتى سيرياداعى داعدارىستى كىدىرىسسىز شەشۋگە بەلسەندى قاتىسۋعا، ايماقتا تۇراقتىلىق پەن بەيبىتشىلىك ورناتۋعا شاقىرادى»، - دەدى مينيستر ورىنباسارى.

ايتا كەتەيىك، كەزدەسۋگە قاتىسۋ ءۇشىن قازاقستان ەلورداسىنا 11 دەلەگاتسيا كەلدى. سيريا ۇكىمەتىنىڭ كەلىسسوز توبىنا سىرتقى ىستەر جانە ەكسپاتريانتتار ىستەرى جونىندەگى ءمينيستردىڭ ورىنباسارى ايمان رااد جەتەكشىلىك ەتسە، سيريا وپپوزيتسياسى اتىنان احماد توما باسشىلىق ەتتى.

سونىمەن قاتار كەزدەسۋگە كەپىلگەر ەلدەردىڭ دەلەگاتسيالارى قاتىستى: رەسەي دەلەگاتسياسىن سيرياداعى جاعدايدى رەتتەۋ بويىنشا ر ف پرەزيدەنتىنىڭ ارنايى وكىلى الەكساندر لاۆرەنتيەۆ، تۇركيا دەلەگاتسياسىن ت ر س ءى م- ءنىڭ ەكىجاقتى ساياسي قاتىناستار جونىندەگى باس ديرەكتورى مۋستافا يۋرداكۋل، ال يران دەلەگاتسياسىن ي ي ر س ءى م- ءنىڭ ارنايى ساياسي ماسەلەلەر جونىندەگى كومەكشىسى الي اسگار حادجي.

كەلىسسوزدەرگە باقىلاۋشى رەتىندە يوردانيا، ليۆان جانە يراك وكىلدەرى، سونداي-اق حالىقارالىق ۇيىمدار - بىرىككەن ۇلتتار ۇيىمى، ب ۇ ۇ- نىڭ بوسقىندار ىستەرى جونىندەگى جوعارعى كوميسسارىنىڭ باسقارماسى جانە قىزىل كرەست وكىلدەرى قاتىستى.

اۆتور

مارلان جيەمباي