قازاقستان ازاماتتىعىن العان جاندار ارماندارى مەن باسىنان وتكەن وقيعاسىن ايتىپ بەردى
شىمكەنت. KAZINFORM - دونيار، ابدۋل كەرىم جانە سۆەتلانانىڭ قازاقستان ازاماتتىعىن الۋ جولىنداعى كەدەرگىلەردى جەڭۋى جاڭا ومىرگە ۇمتىلىستىڭ جارقىن بەينەسىن كورسەتەدى. ماحابباتتىڭ، تاباندىلىقتىڭ جانە شىعارماشىلىقتىڭ ارقاسىندا ولار قازاقستاندا ءوز ورىندارىن تاپتى. قازاق ەلىن ءوز ءۇيىم دەپ بىلگەن شەتەلدىكتەردىڭ شابىتتاندىراتىن وقيعالارىن سىزدەرمەن ءبولىسىپ وتىرمىز.
ازاماتتىققا اپارار جول: دونيار مەن گۇلنار تاعدىرى
دونيار ميرزاحمەتوۆ 1967 -جىلى شىمكەنتتە دۇنيەگە كەلگەن. بالا كەزىنەن مۋزىكانىڭ قۇدىرەتىن ءتۇيسىنىپ ءوستى. سەگىزىنشى سىنىپتان كەيىن گۇلىستان مەملەكەتتىك مەكتەبىنە وقۋعا ءتۇسىپ، كەيىن تاشكەنت مەملەكەتتىك كونسەرۆاتورياسىن ۇزدىك ءبىتىردى.
1996 -جىلى وزبەكستان ءتولقۇجاتىن الىپ، شىمكەنتتىك گۇلنارمەن بىرگە وتاۋ قۇردى. دەگەنمەن ايەلى وزبەكستان ازاماتتىعىن الا الماي، كەڭەستىك ۇلگىدەگى قۇجاتپەن كۇنەلتتى. ول كەزدە ەرلى- زايىپتىلاردىڭ ەكى بالاسى بولاتىن. بيۋروكراتيالىق كەدەرگىلەردەن شارشاعان وتباسى قازاقستانعا قونىس اۋدارۋدى ۇيعاردى.
وتانىن ورالعان گۇلنار قازاقستان ازاماتتىعىن الدى. شىمكەنتتە كەلگەن جاس وتباسى كوپ ۇزاماي تاعى ەكى بالالى بولدى. ولار دا اۆتوماتتى تۇردە قازاقستان ازاماتى اتاندى.
«ايەلىم وزبەكستاندا تۇرعاندا ۇزاق ۋاقىت بويى ءبىر شەشىمگە كەلە المايتىنبىز. سەبەبى، ول جاقتا ازاماتتىق الۋ وتە قيىن ەدى. 20 جىل بويى كۇتتىك، سودان ءۇمىتتى ءۇزىپ قازاقستانعا ورالۋدى ۇيعاردىق. سەبەبى، ونىڭ قازاقستان ازاماتى بولۋعا تولىق سەبەبى بار - ول وسىندا دۇنيەگە كەلگەن. ءبىز مۇندا ۇلكەن جەتىستىككە جەتتىك! قازىر ءۇيىمىز، وتباسىمىز، دوستارىمىز بار»، - دەيدى وتاعاسى.
قازىر دونيار شىمكەنتتەگى مۋزىكا مەكتەبىنىڭ حالىق اسپاپتارى بولىمىندە مۇعالىمى بولىپ ەڭبەك ەتەدى. مەكتەپ وقۋشىلارىنا گيدجاك ويناۋدى ۇيرەتىپ ءجۇر. ول وزبەكستاندا تۋعان ەكى بالاسىمەن بىرگە قازاقستان ازاماتتىعىن الۋدى ارماندايدى. ولار قازاق ءتىلى مەن ەل تاريحىن بىلەتىندەرىنە سەنىمدى. بۇگىندە الداعى ەمتيحاندارعا تىڭعىلىقتى دايىندالىپ جاتىر.
«قازاقستان ماعان وتە جاقىن. مۇندا مەنىڭ اتا-انام، بالالارىم، نەمەرەلەرىم تۇرادى. حالقى مەيىرىمدى جانە جاناشىر، مەن وسىندا تۇرعانىما قۋانىشتىمىن»، - دەيدى دونيار ميرزاحمەتوۆ.
تاشكەنتتە تۇرعانىنا 30 جىل وتسە دە، دوستارى مەن تۋىستارىنا قازىر تەك قوناق رەتىندە بارادى. ال، ءوزىنىڭ ءۇيى شىمكەنتتە ەكەنىن جانە قازاقستاندىق ءتولقۇجاتتى الۋدى - وتباسى تاريحىنىڭ ماڭىزدى كەزەڭى ءارى جاڭا تاراۋى بولادى دەپ بىلەدى.
نيگەريادان قازاقستانعا كوشۋ: ابدۋل كەريم ادەشين ابدۋل فاتحيدىڭ وقيعاسى
KerimGold دەگەن اتپەن تانىمال ابدۋل كەريم ادەشين ابدۋل فاتحي دوستارىنىڭ شاقىرۋىمەن 2014 -جىلى قازاقستانعا كوشىپ كەلدى. سونداي-اق، قازاق تىلىندەگى اندەردى جان-جاقتى ورىنداۋىنىڭ ارقاسىندا الەۋمەتتىك جەلىلەردە بىردەن تانىمال بولدى.
نەگىزى نيگەريادان كەلگەن كەرىمگولد قازاقستانعا كوشكەنگە دەيىن بىرىككەن اراب امىرلىكتەرىندە، گرۋزيادا جانە ازەربايجاندا تۇرىپ، ءتىل ءبىلىمى مەن مۋزىكالىق قابىلەتتەرىن دامىتقان. الايدا، ونىڭ ايتۋىنشا، ول ەش جەردە ءوزىن قازاقستانداعىداي جايلى سەزىنبەگەن.
ابدۋل كەريم سەگىز تىلدە سويلەي الادى. قازاق، يورۋبا، يگبو، اعىلشىن، تۇرىك، ءازىربايجان، ورىس جانە اراب تىلدەرىن ەركىن مەڭگەرگەن. سونداي-اق، ول كىتاپ وقۋدى، اسىرەسە قازاق ادەبيەتىن ۇناتادى، اباي قۇنانبايەۆتىڭ فيلوسوفياسىن ءوز مۋزىكاسىنا شەبەر ۇيلەستىرگەنىن ماقتان ەتەدى.
قازاقستانداعى ون جىل ىشىندە KerimGold استانادا، شىمكەنتتە جانە اقتاۋدا تۇردى. قازىر الماتىعا وتۇراقتاپ، شىعارماشىلىعىن جالعاستىرۋدا. وسى جىلى ول ءوزىنىڭ «بىزدە بار» اتتى دەبيۋتتىك البومىن شىعاردى. بۇل قازاقستاندا تۇراتىن شەتەلدىكتىڭ العاشقى البومى بولدى. ول نەگىزىنەن قازاق تىلىندە 13 ترەكتى قامتيدى.
«ءار ءانىم دانالىققا تولى. قازاقستاندا ءتۇرلى ەتنوس وكىلدەرى بەيبىتشىلىك پەن كەلىسىمدە ءومىر ءسۇرىپ جاتىر. مەنىڭ ويىمشا، بۇل - ومىرگە جايلىلىق، وسىندا قالۋعا دەگەن ۇمتىلىس جانە شىعارماشىلىق مۇمكىندىك تۋدىراتىن مەيىرىمدى ورتا»، - دەيدى مۋزىكانت.
ابدۋل كەريمنىڭ قازاقستان ازاماتتىعىن الۋدان ءۇمىتتى. ەلىمىزدە ەكى ۇلى دۇنيەگە كەلگەننەن كەيىن، قازاقستاندا ءومىر بويى قالۋدى ماقسات ەتىپ وتىر. بۇگىندە مۋزىكانت ءارى كومپوزيتور 10 جىل ىشىندە جاڭا ومىرگە وڭاي بەيىمدەلگەنىن ايتادى. تۋعان جەردى ساعىنعاندا، جاقىندارىمەن بەينەقوڭىراۋ ارقىلى حابارلاسىپ تۇرادى.
«جاقىندا مەنىڭ ۇلكەن اپكەم قازاقستاننىڭ ەرەكشە تارتىمدىلىعىن ءتۇسىنۋ ءۇشىن لوندوننان الماتىعا ۇشىپ كەلدى» - دەيدى ول.
نيگەريانىڭ تۋماسى جاقىن ارادا ءوزىن «قازاقستان رەسپۋبليكاسىنىڭ ازاماتىمىن» دەپ ماقتانىشپەن ايتاتىنىنا ءۇمىتتى.
سۆەتلانا كيم: ماحاببات پەن ازاماتتىقتىڭ جەكە تاريحى
سۆەتلانا كيمنىڭ حيكاياسى - تابىستى ينتەگراتسيا مەن جاڭا وتانعا دەگەن سۇيىسپەنشىلىكتىڭ ۇلگىسى. وزبەكستاننىڭ تۋماسى، ۇلتى كارىس. جۋرناليستيكا ماماندىعى بويىنشا ديپلوم الىپ، 2004 -جىلى شىمكەنتكە قونىس اۋدارعان. سۆەتلانا تەز ارادا ماماندىعى بويىنشا جۇمىسقا ورنالاسىپ، كوپ ۇزاماي قازاقستان ازاماتى الەكساندرمەن تانىسقان. بىرنەشە ايدان كەيىن عاشىقتار ۇيلەندى. ول كەزدە سۆەتلانانىڭ قازاقستاندا تەك تۇرۋعا عانا رۇقساتى بولعان.
جاسى 25-كە تولعاندا، بۇرىنعى ءتولقۇجاتىنىڭ مەرزىمى ءوتىپ كەتكەندىكتەن، ازاماتتىقتى وزگەرتۋ تۋرالى سۇراق تۋىندايدى. كوشى- قون قىزمەتى وعان قازاقستان ازاماتتىعىن الۋدى ۇسىنعان. سۆەتلانا ءوز تاڭداۋىنا سەنىمدى بولدى. سودان بىردەن كەلىسىم بەرىپ، قازاقستان ازاماتى اتاندى. سەبەبى، ول وتباسىن قۇرعان ەلدە قالعىسى كەلدى جانە سول كەزدە ءبىرىنشى بالاسىن دۇنيەگە اكەلدى.
«ءبىز قازاقستاندا سۇيىسپەنشىلىككە تولى وتباسىن قۇردىق. قازىر كۇيەۋىم ەكەۋمىزدىڭ ءتورت بالامىز بار. سوڭعى 19 -جىلىمدى جاقىن ادامدارىمنىڭ ورتاسىندا وتكىزگەنىمە قۋانىشتىمىن. شىمكەنتتىڭ كليماتى مەن تۋعان جەردەگىدەي - جىلى ءارى جايلى»، - دەيدى شىمكەنت قالاسىنىڭ تۇرعىنى.
بۇگىندە ول تابىستى تەلەجۇرگىزۋشى جانە تۋريستىك اگەنتتىك يەسى. وڭتۇستىك كورەيادا ۇزاق جىلدار تۇرىپ جاتقان اعاسىمەن بەينەقوڭىراۋ ارقىلى حابارلاسىپ تۇرادى. سۆەتلانا تاشكەنتتەگى اتا-اناسىنا ءجيى بارادى. ولار دا شىمكەنتكە نەمەرەلەرىن كورۋگە قۋانا كەلەدى.
سۆەتلانا بالالارىمەن بىرگە قازاق ءتىلى مەن قازاقستان تاريحىن زەرتتەۋدى جالعاستىرىپ جاتىر. ول كوشىپ-قونىپ، ازاماتتىق العانىنا ەشقاشان وكىنگەن ەمەس جانە بۇل كەزەڭ ول ءۇشىن وڭاي بولعانىنا ءارى تاڭدانىپ، ءارى قۋانادى.
ايتا كەتەيىك، ق ر عىلىم جانە جوعارى ءبىلىم ءمينيسترى ساياسات نۇربەك مينيسترلىك قازاقستان ازاماتتىعىن العىسى كەلەتىن شەتەلدىكتەرگە ارنالعان تەستىلەردى دايارلاۋعا كىرىسەتىنىن ايتتى.
اۆتور
قايرات زاينيشەۆ