قازاقستان اۋىل شارۋاشىلىعى ءونىمى ەكسپورتىن 10 ميلليارد دوللارعا جەتكىزبەك
استانا. KAZINFORM - ەلوردادا «Kazagro/Kazfarm-2024» حالىقارالىق اۋىل شارۋاشىلىعى كورمەلەرى جۇمىسىن باستادى. ءۇش كۇنگە سوزىلاتىن ءىس- شاراعا الەمنىڭ 21 ەلىنەن كەلگەن ۇزدىك 250 اگروونەركاسىپ كەشەنى كومپانياسى قاتىسۋدا.
«قازاقستان سياقتى مەملەكەتتەر ءۇشىن اگروونەركاسىپ كەشەنى اۋىلدىڭ تاعدىرى دەپ ايتساق ارتىق ەمەس. سوندىقتان اۋىلدىڭ، سول اۋىلدا تۇراتىن ازاماتتاردىڭ بولاشاعى بۇگىندە وسىنداي جاڭا تەحنولوگيالارمەن بايلانىستى. بۇل كورمەلەردىڭ ارىپتەسى سانالاتىن گەرمانيا 40 كومپانياسىن اكەلىپ وتىر. سوعان وراي كورمە جاي عانا تەحنولوگيالاردى ۇسىنۋ الاڭى ەمەس، مەملەكەتارالىق قارىم-قاتىناس تىرەگىنە اينالىپ وتىر»، - دەدى حالىقارالىق ءىس- شارانىڭ اشىلۋىنا ءسوز العان پرەمەر-ءمينيستردىڭ كەڭەسشىسى ەرالى توعجانوۆ.
ءماجىلىس دەپۋتاتى، «اۋىل» پارتياسىنىڭ ءتوراعاسى سەرىك ەگىزبايەۆ بۇگىنگى كورمەلەردە تەك قانا تەك قانا اگروتەحنولوگيالار عانا ەمەس، سونىمەن قاتار ەلىمىزدىڭ بۇكىل اۋىل حالقىنا قاجەتتى ءارى پايدالى جوبالار ۇسىنىلىپ وتىرعاندىعىن باسا ايتتى.
«ءماجىلىستىڭ اگرارلىق كوميتەتى بۇل ءىس-شاراعا جان-جاقتى قولداۋ كورسەتەتىن بولادى. بۇل كورمە ءبىزدىڭ ۇلتتىق اگرارلىق برەندىمىز بولۋىن قالايمىز»، - دەدى ول.
اۋىل شارۋاشىلىعى ۆيتسە-ءمينيسترى امانعالي بەردالين مۇنداي كورمە ەلىمىزدىڭ اۋىل شارۋاشىلىعىن دامىتۋعا ۇلكەن ىقپالىن تيگىزەتىندىگىن اتاپ ءوتتى.
«قازاقستان ورتالىق ازيادا اۋىل شارۋاشىلىعى سالاسىنىڭ كوشباسشىسى سانالادى. بۇگىنگى تاڭدا ەلىمىز 20 ميلليارد دوللاردىڭ اۋىل شارۋاشىلىعى ءونىمىن وندىرەدى. قايتا وڭدەۋ سالاسى 6 ميلليارد دوللاردى قۇرايدى. رەسپۋبليكانى ازىق- تۇلىكپەن تولىق قامتاماسىز ەتىپ وتىرمىز. مۇنىڭ ءبارى اۋىل شارۋاشىلىعىنىڭ دامىپ كەلە جاتقانىن كورسەتەدى. سوڭعى 5 جىلدا اۋىل شارۋشىلىعىنا تارتىلاتىن ينۆەستيتسيا كولەمى 2,2 ەسە ارتىپ، 2,2 ميلليارد دوللارعا جەتتى. ەكسپورت كولەمى 5 ميلليارد دوللارعا جەتتى. الداعى 1-2 جىلدا ەكسپورت كولەمىن 10 ميلليارد دوللارعا جەتكىزۋدى جوسپارلاپ وتىرمىز»، - دەدى ۆيتسە-مينيستر.
ءداستۇرلى تۇردە كورمەلەر اۋىل شارۋاشىلىعى سالاسىنىڭ ەكى نەگىزگى باعىتى بويىنشا ءوتىپ جاتىر. KazAgro وسىمدىك شارۋاشىلىعى بولىمىندە اگرارشىلارعا الەمدەگى ەڭ وزىق جانە جوعارى ساپالى تەحنيكانىڭ تۇرلەرىن ۇسىنادى. كورمە تۇقىم تاڭداۋدان باستاپ وڭدەۋ تەحنولوگياسىنا دەيىنگى بۇكىل ءوندىرىس پروتسەسىن قامتيدى.
KazFarm - بۇل مال شارۋاشىلىعىنا ارنالعان، ءتۇرلى تەحنولوگيالاردى تاماشا كورسەتەتىن جارقىن جانە قىزىقتى ەكسپوزيتسيا. مۇندا تابىستى مال وسىرۋشىلەر بورداقىلاۋ الاڭدارى مەن ءسۇت-تاۋار فەرمالارىنا ارنالعان ونىمدەردىڭ تولىق تسيكلىمەن تانىسا الادى.
اۆتور
مارلان جيەمباي