قازاقستان استانادا قىتاي كومپانياسىمەن بىرگە 10G ينتەرنەتتى سىناقتان وتكىزبەكشى
استانا. KAZINFORM - استانا اكىمدىگى Huawei كومپانياسىمەن بىرگە 10G كەڭ جولاقتى بايلانىس جەلىسىن دەمونستراتسيالىق سىناقتان وتكىزەتىن پيلوتتىق جوبانى ىسكە اسىرماقشى.
استاناداعى «ورتالىق ازيا - قىتاي» ەكىنشى يندۋستريالىق- ينۆەستيتسيالىق ىنتىماقتاستىق فورۋمىندا قول قويىلعان قۇجاتتاردىڭ بىرىندە وسىنداي ماملە بار.
جوبانىڭ اتى - «Huawei 10G كەڭجولاقتى جەلىسىن دەمونستراتسيالىق سىناقتان وتكىزۋ» پيلوتتىق جوباسىن جۇزەگە اسىرۋ. كەلىسىمگە استانا قالاسىنىڭ اكىمدىگى مەن «حۋاۆەي تەكنولودجيز كازاحستان» ج ش س قول قويدى.
«Kazakh Invest» كومپانياسىنىڭ مالىمەتى بويىنشا، جوبا اياسىندا 50G PON تەحنولوگياسى نەگىزىندە تەلەكوممۋنيكاتسيالىق شەشىمدەردى ەنگىزۋ كوزدەلگەن.
بۇعان دەيىن سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن «قازاقتەلەكوم» ا ق 3000 نان استام اۋىلدى ينتەرنەتكە قوسۋ تۋرالى ينۆەستيتسيالىق كەلىسىم جاساسقان ەدى.