قازاقستان اسكەريلەرى ۇلى بريتانيادا وتكەن بەدەلدى حالىقارالىق جارىستا ۇزدىك ۇشتىككە ەندى

استانا. KAZINFORM - قازاقستاندىق دەسانتشىلار ۇلى بريتانياداعى ۋەلستە وتكەن بەدەلدى حالىقارالىق «كەمبري پاترۋلى» جارىسىندا ءۇشىنشى ورىنعا يە بولدى. بۇل تۋرالى ق ر قورعانىس مينيسترلىگى مالىمدەدى.

جارىس بىرنەشە كەزەڭنەن تۇردى - ەكى اپتا ساباق بويى جالپى جاعدايعا كىرىسپە، قاۋىپسىزدىك شارالارى، قارۋ-جاراقتىڭ ماتەريالدىق بولىگىن ۇيرەنۋ، توپوگرافيا، تاكتيكالىق جانە مەديتسينالىق دايىندىق ساباقتارى ءوتتى. جارىستىڭ بەلسەندى كەزەڭى 10-12-قازان ارالىعىندا ءوتتى.

بيىلعى جىلى جارىسقا 38 ەلدەن 100 دەن استام كوماندا قاتىسىپ، ونىڭ ىشىندە 12 ۇزدىك كوماندا فينالدىق سىنعا شىقتى.

قۇرامىندا 8 جاۋىنگەرى بار قازاقستان كومانداسى جاۋىنگەرلىك مىندەتتەردى ورىنداي وتىرىپ، ۇزىندىعى 70 شاقىرىمنان اساتىن باعىتتى ەڭسەردى. جاۋىنگەرلەردىڭ ءارقايسىسى 30 كەلىدەن استام جۇك كوتەردى. 48 ساعات ىشىندە اسكەري قىزمەتشىلەر حيميالىق جانە بيولوگيالىق قاۋىپ-قاتەر كەزىندەگى ءىس-قيمىلدى، شابۋىلداۋ وپەراتسيالارىن جانە جەتۋ قيىن جەرلەردە باعدارلاۋمەن قوسا، كۇردەلى جاۋىنگەرلىك تاپسىرمالاردى ورىندادى. ءار 8-10 شاقىرىم سايىن قاتىسۋشىلار جاۋىنگەرلىك ماشىق پەن توزىمدىلىكتى كورسەتۋدى قاجەت ەتەتىن جاڭا تاپسىرمالارعا تاپ بولدى.

قازاقستان دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى بارلىق سىناقتاردى ويداعىداي ورىنداپ، جاقسى دايىندىق پەن كاسىبيلىكتىڭ جوعارى دەڭگەيىن كورسەتتى. جارىستىڭ بارلىق كەزەڭدەرىنىڭ قورىتىندىسى بويىنشا قازاقستاندىق كوماندا قولا جۇلدەگە لايىق دەپ تانىلدى.

«كەمبري پاترۋلى» - 60 جىلدان استام ۋاقىت بويى وتكىزىلىپ كەلە جاتقان ەڭ بەدەلدى جانە كۇردەلى اسكەري جارىستاردىڭ ءبىرى. جىل سايىن وسى جارىس الەمنىڭ تۇكپىر- تۇكپىرىنەن اسكەري بارلاۋ بولىمشەلەرىنىڭ باسىن قوسادى. بۇل جارىس اسكەري شەبەرلىكتىڭ كورسەتكىشى جانە قازاقستاندىق اسكەري قىزمەتشىلەردىڭ ماشىعى مەن جاۋىنگەرلىك دايىندىق دەڭگەيىنىڭ جوعارى ەكەنىن راستادى.

بۇعان دەيىن قازاقستان دەسانتشىلارى گيمالايدى باعىندىرعانىن جازعان بولاتىنبىز.