قازاقستان ارمياسى ورتالىق ازيادا ۇزدىك اتاندى
استانا. قازاقپارات - جىل سوڭىنا دەيىن ەلىمىزدىڭ قارۋلى كۇشتەرى جاڭا بروندالعان تەحنيكامەن تولىعادى. سونىمەن قاتار جوعارى دالدىككە يە زىمىراندى كەشەندەر مەن جويعىش ۇشاقتاردى دا ساتىپ الۋ جوسپارلانعان.
بۇل جونىندە قورعانىس مينيسترلىگى مالىمدەدى. جالپى بۇگىندە قازاق ارمياسى ورتالىق ازيا توڭىرەگىندە ۇزدىك دەپ سانالادى. وعان Global Firepower قارۋلى كۇشتەردىڭ جاھاندىق رەيتينگى دالەل. مۇندا ءبىزدىڭ مەملەكەت ازەربايجان، وزبەكستان، تۇركىمەنستان مەن قىرعىزستان ەلدەرىنىڭ اسكەرلەرىن ارتتا تاستاپ، 58-ورىنعا جايعاسقان.
اسكەر سانى، تەحنولوگيالىق دامۋ دەڭگەيى مەن داعدارىس جاعدايىنداعى ءىس-ارەكەتتەرى. جاھاندىق رەيتينگ ساراپشىلارى نەگىزىنەن وسى كريتەرييلەرگە باسىمدىق بەرەدى. بۇل باعىت ءبىزدىڭ قارۋلى كۇشتەرىمىزدە جاقسى جولعا قويىلعان. قارجىلاندىرۋ كولەمى ارتىپ، جاڭا زاماناۋي تەحنيكالار الىنىپ جاتىر. بۇل جولى جاھاندىق رەيتينگكە الەمنىڭ 145 مەملەكەتى ەندى. قازاقستان 58-ورىنعا يە بولىپ، ءوزىنىڭ بىلتىرعى كورسەتكىشتەرىن جاڭارتىپ، 5 پوزيتسياعا جوعارىلاعان.
قازىر قارۋلى كۇشتەردىڭ الەۋەتىن ارتتىرۋ ءۇشىن ءبىرقاتار باستامالار قولعا الىنعان. ماسەلەن، 7 جىلعا ارنالعان ارنايى تۇجىرىمداما دا بەكىتىلدى. قۇجاتقا ساي مينيسترلىك بارلىق اسكەري قۇرىلىمداردى زاماناۋي قارۋ-جاراقپەن جانە تەحنيكامەن قامتاماسىز ەتەتىن بولادى.
ەربول بەگىلدايەۆ، ق ر ق م اسكەري-تەحنيكالىق ساياسات دەپارتامەنتى باستىعىنىڭ ورىنباسارى:
- ارنايى ماقساتتاعى بولىمشەلەردى جانە قۇرلىق اسكەرلەرىن جاراقتاندىرۋ ءۇشىن اعىمداعى جىلدىڭ سوڭىنا دەيىن 60 بىرلىكتەن استام بروندى دوڭگەلەكتى ماشينانىڭ ءتۇرلى موديفيكاتسياسىن كۇتۋدەمىز. ال اۋە كۇشتەرى ءۇشىن اسكەرلەر مەن جۇكتەردى جەدەل جونەلتۋ مۇمكىنشىلىكتەرىن كەڭەيتۋ ماقساتىندا اعىمداعى جىلدىڭ سوڭىنا قاراي اۋىر جۇك كوتەرگىش ا-400 اسكەري- كولىكتىك اۆياتسيالىق ءبىرىنشى ۇشاعىن كۇتىپ وتىرمىز.
تەحنيكادان بولەك قورعانىس مينيسترلىگى ساربازداردىڭ ءبىلىمى مەن بىلىكتىلىگىن شىڭداۋعا باسا ءمان بەرەدى. بىلتىر اسكەري وقۋ ورىندارىندا 11 جاڭا ماماندىق اشىلعان. شەتەلدە ءبىلىم الۋعا بەرىلەتىن كۆوتالار قىسقارتىلىپ، وزىمىزدەگى ءبىلىم بەرۋ دەڭگەيىنىڭ ساپاسى جاقسارتىلدى.
نۇرلىحان تەمىربەكوۆ، ق ر ق ك قۇرلىق اسكەرلەرى باس شتابى باستىعىنىڭ ورىنباسارى:
- بىزگە بىلىكتى، ءبىلىمدى، سانالى، ءوز مامانىنىڭ شەبەرى وفيتسەرلەر قازىر قاجەت. سوندىقتان وسى سەرجانتتار قۇرامىن، وفيتسەرلەر قۇرامدارىن بىلىمدەرىن ارتتىرىپ جاتىرمىز. وسى جاعدايدا بىزدە ساردار جانە تاكتيكا-1، تاكتيكا-2 دەگەن كۋرستار جۇرگىزىلەدى. بۇل كۋرستار وفيتسەرلەردىڭ، سەرجانتتاردىڭ وزدەرىنىڭ ماماندارىن شىڭداۋى ءۇشىن جانە تاعى دا باسقا لاۋازىمدارعا تاعايىندالۋى ءۇشىن وتكىزىلەدى.
حالىقارالىق ساراپشىلاردىڭ پايىمداۋىنشا بۇگىندە قازاق اسكەرى ورتالىق ازيا اۋماعىنداعى ەڭ مىقتى ارميانىڭ ءبىرى بولىپ تابىلادى. ىرگەدەگى كورشىلەرىمىز وزبەكستان مەن قىرعىزستان بۇل رەيتينگتە 65 پەن 100-ورىنعا تۇراقتاعان. ال الەم بويىنشا كوشتى ا ق ش اسكەرى باستاپ تۇر.
24.kz