قازاقستان اقشانى جىلىستاتۋمەن كۇرەس تاۋەلسىز رەيتينگىندە 27 ورىنعا العا جىلجىدى
قازاقستان اقشانى جىلىستاتۋعا قارسى تاۋەلسىز رەيتينگتە پوزيتسياسىن ەداۋىر جاقسارتىپ، 100 دەن استام ەلدى ارتتا قالدىردى، دەپ حابارلايدى Kazinform ق ر قارجىلىق مونيتورينگ اگەنتتىگىنىڭ باسپا ءسوز قىزمەتىنە سىلتەمە جاساپ.
2023-جىلدىڭ 13- قاراشاسىندا بازەل مەنەدجمەنت ينستيتۋتى اقشانى جىلىستاتۋعا جانە تەرروريزمدى قارجىلاندىرۋعا قارسى كۇرەس سالاسىنداعى ەڭ بەدەلدى دەرەككوز بولىپ تابىلاتىن جىل سايىنعى «Basel AML Index» رەيتينگىن جاريالادى.
بۇل رەيتينگتە قازاقستان 100 دەن استام ەلدى ارتقا تاستاپ، 4,71 ۇپاي جيناي وتىرىپ، پوزيتسياسىن 27 تارماققا جاقسارتتى.
بۇل ەلىمىز ءۇشىن 2012-جىلدان بەرى جاريالانىپ كەلە جاتقان رەيتينگ تاريحىنداعى ەڭ جوعارعى ناتيجە.
قازاقستان رەيتينگتە قىتاي، تۇركيا، ب ا ءا، سەربيا، بولگاريا، ۆەنگريا، رۋمىنيا، كاتار، باحرەين جانە ساۋد ارابياسى سەكىلدى ەلدەردەن باسىپ وزدى.
تاۋەكەل دەڭگەيى ەڭ تومەن توپ-5 ەلدىڭ قاتارىنا يسلانديا، فينليانديا، ەستونيا، اندوررا جانە شۆەتسيا كىردى.
ايتا كەتەيىك، زەرتتەۋ قىلمىستىق جولمەن الىنعان كىرىستەردى جىلىستاتۋ جانە تەرروريزمدى قارجىلاندىرۋدىڭ (ك ج/ت ق) جوعارى تاۋەكەلدەرىنە ىقپال ەتەتىن ءارتۇرلى فاكتورلاردى ولشەيتىن 5 باعىت بويىنشا 18 كورسەتكىشكە نەگىزدەلەدى.
«الىنعان ناتيجە FATF ستاندارتتارىنا سايكەستىگىنە ءوزارا باعالاۋدى ءساتتى اياقتاۋ مەن اقشانى جىلىستاتۋعا قارسى جۇيەنىڭ بارلىق بولىكتەرىنىڭ جۇمىس ىستەۋ تيىمدىلىگىنىڭ ارقاسىندا مۇمكىن بولدى. ەلىمىزدىڭ قارجىلىق قاۋىپسىزدىگىن ودان ءارى نىعايتۋ جۇمىستارى جالعاساتىن بولادى»، - دەلىنگەن حابارلامادا.