قازاقستان اۋماعىنا 5 فرانسيا سىيادى، ال ءبىر فرانسيادا 56 اتوم رەاكتورى بار - بانۋ نۇرعازيەۆا
الماتى. KAZINFORM - قازاقستاندا اتوم ەلەكتر ستانتسياسىن سالۋ ماسەلەسى بويىنشا «الماتى باس جوسپار» ع ز ي عيماراتىندا قوعامدىق تالقىلاۋ ءوتىپ جاتىر.
قوعامدىق تالقىلاۋعا قوعامدىق كەڭەس مۇشەلەرى، ساراپشىلار جانە قالا تۇرعىندارى قاتىستى. جيىن بارىسىندا ەلىمىزدەگى اتوم ەنەرگەتيكاسىن دامىتۋدىڭ جوسپارلارى تانىستىرىلدى.
- قازاقستاننىڭ ازاماتتىق اليانسىنا 7 مىڭعا جۋىق ۇكىمەتتىك ۇيىمدار كىرەدى. ءبىز بىرنەشە جىل بۇرىن ا ە س سالۋ ماسەلەسىن كوتەردىك، سەبەبى اتوم ەلەكتر ستانتسياسى - جاسىل تەحنولوگيا. ونى الەمنىڭ ەڭ دامىعان ەلدەرى قولدانىپ كەلەدى. ا ە س سانى بويىنشا الەمدە ا ق ش ءبىرىنشى تۇر - 96 رەاكتور. سونداي-اق كوشباسشىلار قاتارىندا فرانسيا بار. قازاقستان اۋماعىنا 5 فرانسيانى سىيدىرۋعا بولادى دەيمىز. ءبىراق ءبىر فرانسيادا 56 اتوم رەاكتورى بولسا، وندا ۋران ءوندىرىسى بويىنشا ءبىرىنشى تۇرعان قازاقستان تۋرالى نە ايتا الامىز؟ وسى سەبەپتى ازاماتتىق اليانستىڭ مۇشەلەرى ەلىمىزدىڭ وڭىرلەرىندە قوعامدىق تالقىلاۋلار وتكىزىپ جاتىر، - دەدى قازاقستان ازاماتتىق اليانسىنىڭ پرەزيدەنتى بانۋ نۇرعازيەۆا.
قوعامدىق ساراپشى رەتىندە قاتىسقان مەدەۋ ابىشيەۆ ا ە س قاۋىپسىزدىگى تۋرالى پىكىر ءبىلدىردى.
- بۇگىنگى تالقىلاۋدىڭ ماڭىزدىلىعى جوعارى، سەبەبى حالىق نە ءۇشىن ا ە س سالىنىپ جاتقانىن ءبىلۋى كەرەك. قازىر قوعام ىشىندەگى نەگىزگى قورقىنىش راديوفوبياعا بايلانىستى بولىپ تۇر. «جارىلىپ كەتۋى مۇمكىن» دەگەن سوزدەر ايتىلادى. ءبىراق بۇل ماسەلەلەردىڭ ءبارىن عالىمدار دا، ۇكىمەت تە بارلىق قاۋىپتەردى ەسكەرىپ، شەشىم قابىلدايدى. قاراستىرىلىپ جاتقان رەاكتورلار 3+ بۋىندى رەاكتورلارعا جاتادى. ۋاقىتپەن سۇرىپتالعان، سەنىمدى رەاكتورلار. مۇنداي رەاكتوردىڭ ىستەن شىعۋ قاۋپى وتە تومەن، - دەدى ءال-فارابي اتىنداعى قاز ۇ ۋ تەوريالىق جانە يادرولىق فيزيكا كافەدراسىنىڭ مەڭگەرۋشىسى مەدەۋ ابىشيەۆ.
ەسكە سالايىق، بۇعان دەيىن قازاقستان بەيبىت يادرولىق رەاكتوردى قالاي پايدالانىپ جاتقانىن جازعانبىز.