قازاقستان العاش رەت افريكالىق مۇعالىمدەردى وقىتۋدى باستادى
استانا. KAZINFORM - قازاقستاندا العاش رەت «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمى پەداگوگيكالىق شەبەرلىك ورتالىعى افريكا كونتينەنتىندەگى شەتەلدىك ارىپتەستەردى وقىتۋدى باستادى.
بۇل - ورتالىقتىڭ جاڭا حالىقارالىق جوباسى، ونىڭ اياسىندا قازاقستاندىق زياتكەرلىك تەحنولوگيالاردى جاھاندىق ءبىلىم بەرۋگە تاراتۋ جالعاسۋدا.
ەكى اپتا بويى مالاۆيدىڭ ليلونگۆە قالاسىنداعى مۇعالىمدەردىڭ ۇلكەن توبى استاناعا كۇن سايىن ونلاين قوسىلاتىن بولادى. ناليكۋلە (Nalikule College of Education) ⠀پەداگوگيكالىق كوللەدجىنىڭ مۇعالىمدەرى ءوز زەرتتەۋ قىزمەتتەرىنە Lesson Study جانە Action Research تاسىلدەرىن ەنگىزۋدىڭ نەگىزگى الگوريتمدەرىن مەڭگەرەدى.
ونلاين- سەميناردىڭ اشىلۋىندا «نازاربايەۆ زياتكەرلىك مەكتەپتەرى» د ب ب ۇ باسقارما ءتوراعاسى ءانۋار جانعوزين مۇعالىمدەردىڭ كاسىبي دامۋىنىڭ ماڭىزى مەن شەتەلدىك ارىپتەستەردى وقىتۋداعى NIS- ءتىڭ جۇيەلى جۇمىسىن اتاپ ءوتتى. افريكالىق تاراپتىڭ وتاندىق ءبىلىم بەرۋدى تابىستى رەفورمالاۋعا جانە كەڭ اۋقىمدى ىنتىماقتاستىققا دەگەن ۇلكەن قىزىعۋشىلىعىن ءبىلىم مينيسترلىگىنەن ليەۆيس ەنەيا، پەداگوگيكالىق ءبىلىم جانە دامۋ ديرەكسياسىنان زيزۆا مسۋكۋما جانە ناليكۋلە پەداگوگيكالىق كوللەدجىنىڭ ديرەكتورى ەليزابەت مەكە راستادى. مالاۆي وكىلدەرى استانادا ءداستۇرلى دۇنيەجۇزىلىك Lesson Studies قاۋىمداستىعى كونفەرەنسياسىنىڭ وتەتىنىنەن ەرەكشە شابىتتانعانىن، وعان بارلىعى قاتىسۋدى ارماندايتىنىن مويىندادى.
- افريكالىق ارىپتەستەرىمەن نيدەرلاندىنىڭ زۆوللەسىندە WALS ەستافەتاسىن قابىلداۋ كەزىندە تانىستىق، - دەپ اتاپ ءوتتى پەداگوگيكالىق شەبەرلىك ورتالىعىنىڭ ديرەكتورى جانبوتا كابدىكاريموۆا: - سول كەزدە بىرنەشە ەلدىڭ وكىلدەرى ورتالىقتىڭ حالىقارالىق جوبالارىنا قىزىعۋشىلىق تانىتىپ، وقىتۋ تۋرالى ۇسىنىس تاستادى. ورتالىق پارتاسىنا ءبىرىنشى بولىپ ەلوردالىق ناليكۋلە پەداگوگيكالىق كوللەدجىنىڭ وكىلدەرى وتىردى.
پەداگوگيكالىق شەبەرلىك ورتالىعىنىڭ جاڭا سەرىكتەسى - جاپونيانىڭ تەحنيكالىق قولداۋىمەن سالىنعان، ەل ۇكىمەتى قۇرعان ءمالاۆيدىڭ ءبىلىم، عىلىم جانە تەحنولوگيالار مينيسترلىگىنە قاراستى بەدەلدى ناليكۋلە ءبىلىم بەرۋ كوللەدجى. ۇلتتىق ءبىلىم بەرۋدەگى يننوۆاتسيالىق ورتالىقتاردىڭ ءبىرى رەتىندە تانىلعان ول جاراتىلىستانۋ- ماتەماتيكا پاندەرىن وقىتۋعا دەن قويعان.
ناۋرىز ايىندا مالاۆي مۇعالىمدەرى استانادا وقۋىن جالعاستىرادى، سونىمەن قاتار قازاقستاننىڭ ورتا ءبىلىم بەرۋ جۇيەسىن زەرتتەيدى دەپ جوسپارلانۋدا.
جاڭا حالىقارالىق جوبا Lesson study- ءدىڭ جاھاندىق ەلشىسى رەتىندە تانىلعان پەداگوگيكالىق شەبەرلىك ورتالىعىنىڭ تابىستى ميسسياسىن تاعى ءبىر رەت دالەلدەدى. قىركۇيەك ايىندا استانادا ساباقتى زەرتتەۋگە ماماندانعان ەڭ وزىق ساراپشىلار مەن پراكتيكتەر ءداستۇرلى WALS (دۇنيەجۇزىلىك ساباقتى زەرتتەۋ قاۋىمداستىعى) كونفەرەنسياسىندا باس قوسادى. قازاقستانعا ۇلى بريتانيا، سينگاپۋر، جاپونيا، فينليانديا، مالايزيا، اۆستريا، قىتاي، امەريكا قۇراما شتاتتارى، گونكونگ، تۇركيا، بارلىعى 50-دەن استام ەلدىڭ وكىلدەرى ۇشىپ كەلەدى دەپ جوسپارلانۋدا.
پەداگوگيكالىق شەبەرلىك ورتالىعى ون جىلدان استام وتاندىق جانە الەمدىك ءبىلىم بەرۋگە «Lesson study» جاھاندىق ترەندىن ەنگىزۋمەن تابىستى اينالىسىپ كەلەدى. وقىتۋ ورتالىعىندا وسى جىلدار ىشىندە ءازىربايجان، وزبەكستان، قىرعىزستان، تۇركىمەنستان، ياكۋتيا- ساحا ەلدەرىنەن كەلگەن شەتەلدىك ارىپتەستەر ءبىلىم الدى.
قازىرگى ۋاقىتتا ەۋروپالىق وداقپەن بىرلەسىپ ورتالىقتىڭ تاعى ءبىر حالىقارالىق جوباسى - تاجىكستاننىڭ ءبىلىم جانە عىلىم مينيسترلىگىنە، سونداي- اق ءۋالاياتتاردىڭ پەداگوگيكالىق سالانىڭ بولىمدەرىنە ارنالعان «بولاشاق پەداگوگيكاسى: زاماناۋي مەكتەپتەردىڭ شەشىمدەرى» اتتى تاقىرىپتىق سەمينار جوسپارلانعان.
اۆتور
اسحات رايقۇل