قازاقستان 2025-جىلى عارىشقا ءوز زىمىرانىن ۇشىرادى
استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ سەناتتىڭ جالپى وتىرىسىندا 2025-جىلى عارىشقا وتاندىق زىمىران ۇشىرۋ جوسپاردا تۇرعانىن ايتتى.
«بايتەرەك» قازاقستان زىمىران كەشەنىنىڭ جوباسى تۋرالى ايتساق، جۇمىس قايتا جانداندى. ءبىرىنشى «سويۋز-5» زىمىران تاسىعىشىن ۇشىرۋ 2025-جىلعا جوسپارلانعان. كوممەرتسيالىق باعىتتا زىمىران ۇشىرۋ 2028-جىلعا جوسپارلانعان. ءۇش جىل بويى تەستىلەۋ رەجيمىندە زىمىراندار ۇشىرىلادى»، - دەدى ول.
ءمينيستردىڭ سوزىنشە، قازىر وتاندىق زىمىراندى عارىشقا شىعارۋ ماسەلەسى جان-جاقتى پىسىقتالىپ جاتىر.
«وتاندىق زىمىران تاسىعىش عارىشقا تاۋەلسىز جول اشۋ قۇرالىن قالىپتاستىرۋعا مۇمكىندىك بەرەدى. قازىر زىمىران تاسىعىشتىڭ كومپونەنتتەرى مەن ماتەريالدارىن ازىرلەۋ جۇمىستارى ءجۇرىپ جاتىر. زىمىراننىڭ قوسپا وتىنىنىڭ پروتوتيپى جاسالدى. مەتەورولوگيالىق زىمىراندى ۇشىرۋ 2025-جىلعا جوسپارلانعان. اسا جەڭىل زىمىراندى سىناقتان وتكىزۋ 2023-جىلعا بەلگىلەنگەن»، - دەدى جاسلان ماديەۆ.
ب ۇ ۇ- نىڭ تاۋەلسىز باعالاۋى بويىنشا قازاقستان سيفرلاندىرۋ سالاسىندا العا ىلگەرىلەپ كەلەدى. قازاقستان «ەلەكتروندى ۇكىمەتتەر» يندەكسىندە 163 ەلدىڭ ىشىندە 24 ورىن الىپ، «ونلاين قىزمەتتەر» يندەكسىندە ۇزدىك وندىققا كىردى.
وسىعان دەيىن قازاقستاننىڭ مۇناي-حيميا سالاسىندا ءبىرقاتار جوبانى قاراستىرىپ جاتقانى تۋرالى جازدىق.