قاڭتار-ناۋرىز ايلارى ارالىعىندا قازاقستانعا تۇراقتى تۇرۋعا قىتايدىڭ 1260 ازاماتى كەلگەن. بۇل وتكەن جىلدىڭ سايكەس كەزەڭىمەن سالىستىرعاندا ءۇش ەسەدەن استام جوعارى كورسەتكىش.
ق ر ستراتەگيالىق جوسپارلاۋ جانە رەفورمالار اگەنتتىگىنە قاراستى ۇلتتىق ستاتيستيكا بيۋروسىنىڭ مالىمەتىنشە، ءبىرىنشى توقسان قورىتىندىسى بويىنشا قىتايدان كوشى-قون اعىنىنىڭ مۇنداي جوعارى دەڭگەيى كەمىندە سوڭعى توعىز جىلدا العاش رەت تىركەلىپ وتىر.
سونىمەن قاتار توقساندىق ستاتيستيكا ءداستۇرلى تۇردە قۇبىلمالى بولىپ كەلەدى. ياعني كۇرت ءوسىم كەزەڭدەرى كەيىن تومەندەۋمەن الماسىپ وتىرادى.
ماسەلەن، ءبىر جىل بۇرىن دا كورسەتكىش ەرەكشە ءوسىم كورسەتكەن. سول كەزدە قازاقستانعا كەلگەندەر سانى 98 ادامنان 750 ادامعا دەيىن، ياعني شامامەن سەگىز ەسەگە ارتقان.
دەگەنمەن سوڭعى ەكى جىلداعى تۇراقتى جوعارى كورسەتكىشتەر قىتاي ازاماتتارىنىڭ كوشى-قون بەلسەندىلىگىنىڭ ءوسۋ ءۇردىسى قالىپتاسىپ كەلە جاتقانىن اڭعارتادى.
ءبىرىنشى توقسان قورىتىندىسى بويىنشا قىتاي قازاقستانعا تۇراقتى تۇرۋعا كوشىپ كەلگەن ازاماتتار سانى جونىنەن ءۇشىنشى ورىنعا شىقتى. بۇل رەتتە ەكىنشى ورىندا تۇرعان رەسەيدەن ايىرماشىلىق نەبارى بەس ادامدى قۇرادى. رەسەيدەن قازاقستانعا 1265 يمميگرانت كەلگەن. بۇل وتكەن جىلمەن سالىستىرعاندا 29 پايىزعا كوپ.
كوش باستاپ تۇرعان ەل - وزبەكستان. بۇل ەلدەن 2275 ادام قونىس اۋدارعان. الايدا مۇندا كەرىسىنشە تومەندەۋ بايقالدى - كورسەتكىش بىلتىرعى جىلمەن سالىستىرعاندا 13 پايىزعا ازايعان.
قىتايدان كەلگەندەردىڭ باسىم بولىگى - ەتنيكالىق قازاقتار. ولاردىڭ ۇلەسى 99,5 پايىزعا جەتەدى. قونىستانۋ ءۇشىن ەڭ تانىمال وڭىرلەر قاتارىندا استانا، الماتى قالالارى، سونداي-اق الماتى وبلىسى مەن جەتىسۋ وبلىسى بار.
يمميگراتسيالىق ستاتيستيكاعا تۇراقتى تۇراتىن ەلىن رەسمي تۇردە اۋىستىرعان شەتەل ازاماتتارى مەن ازاماتتىعى جوق ادامدار ەنگىزىلەدى.
بۇعان دەيىن قازاقستاندا قىتايدان كەلگەن قانداستار سانى رەكوردتىق دەڭگەيگە جەتكەنى حابارلاندى.