تۋريزمنەن تۇسەتىن تابىس تا ءوسىپ وتىر. ماسەلەن، الماتى وبلىسىندا سەگىز ايدا تۋريزم سالاسىنان بيۋدجەتكە 3,9 ميلليارد تەڭگە تۇسكەن. بۇل بىلتىرعىدان 39 پايىزعا كوپ. ال العاشقى جارتىجىلدىقتا وڭىردەگى قوناقۇيلەر مەن دەمالىس ورىندارى 264 مىڭعا جۋىق تۋريست قابىلداعان.
قازىر تۋريستەردى تابيعات پەن تاريحي ورىندارمەن قاتار، ءىرى مادەني جانە سپورتتىق شارالار دا قىزىقتىرادى. بىلتىر الماتىداعى دجەننيفەر لوپەس كونسەرتىنە 35 ەلدەن 7 مىڭعا جۋىق شەتەلدىك كەلگەن. ولاردىڭ قالاداعى تۋريستىك شىعىنى 5 ميلليارد تەڭگەدەن اسقان.
بۇل ءۇردىس بيىل دا جالعاستى. قازاقستاندا Enrique Iglesias كونسەرتى، Cirque du Soleil گاسترولدەرى مەن حالىقارالىق فەستيۆالدەر ءوتتى. ال استاناداعى SOLANA FEST فەستيۆالىنە 12 مىڭنان استام بيلەتتى شەتەلدىكتەر ساتىپ العان.
ءبىراق مۇنداي تۋريستىك اعىندى استانا مەن الماتىدان وزگە وڭىرلەرگە دە باعىتتاي الامىز با؟ بۇل تۋرالى تۋريزم يندۋسترياسى كوميتەتىنىڭ رەسمي وكىلى جايناگۇل قاپپاسوۆا Jibek Joly تەلەارناسىنىڭ «بۇگىن. LIVE» باعدارلاماسىندا جاۋاپ بەرەدى.
- وقيعالىق تۋريزم - شەتەلدىك جانە ىشكى تۋريستەردى تارتاتىن ماڭىزدى باعىتتاردىڭ ءبىرى. 2026 -جىلدىڭ باسىندا مينيسترلىك تاراپىنان حالىقارالىق ۇلتتىق كۇنتىزبە بەكىتىلدى. وعان ەلىمىزدىڭ بارلىق ءوڭىرىن قامتيتىن 55 ءىس-شارا ەنگىزىلدى. بۇل شارالار تەك استانا مەن الماتىدا ەمەس، وڭىرلەردە دە ۇيىمداستىرىلادى. باستى ماقسات - ءار وڭىرگە ىشكى تۋريستەردى تارتىپ، ولاردىڭ تابيعاتى مەن تاريحي-مادەني ورىندارىن تانىتۋ، - دەدى جايناگۇل قاپپاسوۆا.
ماماننىڭ ايتۋىنشا، شەتەلدىك تانىمال انشىلەردىڭ كونسەرتتەرىنە كەلەتىن تۋريستەردىڭ سانى ارتىپ كەلەدى. كەلەسى جىلعا دا مۇنداي ءىس- شارالار كوپ جوسپارلانىپ وتىر. 2027 -جىلدىڭ جاڭا كۇنتىزبەسى كەلەسى جىلدىڭ باسىندا بەلگىلى بولادى.
- حالىقارالىق ءىس-شارالار مەن كونسەرتتەرگە كەلگەن تۋريستەر، ادەتتە، ەلدە 2-3 كۇن بولادى. ولار قوناقۇيلەرگە ورنالاسىپ، قالانى جانە تۋريستىك نىسانداردى ارالايدى. قازىردىڭ وزىندە 2027 -جىلعا دەيىن ەلىمىزدە 25-كە جۋىق قوناق ءۇي سالۋ جوسپارلانىپ وتىر. شەتەلدىك تۋريست ەلگە ءبىر رەت كەلىپ قانا قويماي، قايتا ورالۋى ءۇشىن ەڭ الدىمەن ساپالى سەرۆيس قاجەت. سوندىقتان حالىقارالىق قوناقۇي جەلىلەرىن تارتۋعا جانە وسى سالاعا ينۆەستيتسيا اكەلۋگە باسىمدىق بەرىلىپ وتىر، - دەدى ول.
شەتەلدىك تۋريستەرگە ەلىمىزدىڭ وڭىرلەرىن ارالاتاتىن تۋروپەراتورلار قىزمەت كورسەتەدى. ولاردىڭ قىزمەتى مينيسترلىك تاراپىنان تەكسەرىلىپ، رۇقسات بەرىلەدى. تۋريستەرگە ساپالى قىزمەت كورسەتۋ ءۇشىن گيدتەردىڭ بىلىكتىلىگىن ارتتىرۋعا دا كوڭىل ءبولىنىپ وتىر.
- گيد قىزمەتىنىڭ ساپاسى دا ماڭىزدى. بۇل باعىتتا تۇركىستان وبلىسىندا تۋريزم جانە مەيماندوستىق ۋنيۆەرسيتەتى جۇمىس ىستەيدى. وندا كاسىبي تۋريزم ماماندارى دايارلانىپ جاتىر. سالاداعى ماسەلەلەر مەن سىن- ەسكەرتۋلەر دە نازاردان تىس قالمايدى. تۋريستەر اسىرەسە جازعى ماۋسىمدا تازالىق ماسەلەسىنە قاتىستى شاعىمدارىن ءجيى ايتادى. بۇل باعىتتا جەرگىلىكتى اتقارۋشى ورگاندار ءتيىستى جۇمىستار جۇرگىزىپ جاتىر، - دەدى ول.
جايناگۇل قاپپاسوۆانىڭ ايتۋىنشا، قازىر «قازاقستان.travel» ۇلتتىق پلاتفورماسى ازىرلەنىپ جاتىر. وندا سەگىز تىلدە ەلىمىزدىڭ ءار ءوڭىرى، تۋريستىك نىساندار مەن جوسپارلانعان ءىس- شارالار تۋرالى اقپارات بەرىلەدى.
- گيدتەر مەن تۋروپەراتورلار تۋرالى مالىمەت تە وسى پلاتفورمادان قولجەتىمدى بولادى. تۋريست ءۇشىن قاجەتتى اقپاراتتىڭ بارلىعى ءبىر جەرگە جيناقتالادى. پلاتفورما كەلەسى جىلى ىسكە قوسىلادى. كاسىپكەرلەر ءوز قىزمەتتەرىن سول جەرگە ورنالاستىرا الادى، ال تۋريستەر وزىنە قاجەتتى قىزمەت پەن باعىتتى وڭاي تابادى، - دەدى مامان.
الماتى وبلىسى - تۋريستەر ەڭ كوپ باراتىن نەگىزگى باعىتتاردىڭ ءبىرى. ونىڭ تابيعاتى مەن تاريحي-مادەني ورىندارى تۋريستەر ءۇشىن تارتىمدى. سونىمەن قاتار باسقا وڭىرلەردىڭ دە تۋريستەرگە قولايلى جاعداي جاساۋىنا باسىمدىق بەرىلىپ وتىر. مىسالى، قىزىلوردا وبلىسىندا قوناقۇيلەر سالۋ جانە تۋروپەراتورلارمەن جۇمىس ىستەۋ باعىتىندا جوبالار جۇزەگە اسىرىلۋدا. سونداي-اق بايقوڭىر عارىش ايلاعىن تاماشالاۋعا ارنالعان ارنايى تۋريستىك مارشرۋتتار ازىرلەنىپ جاتىر ەكەن.