بۇل تۋرالى ەكولوگيا جانە تابيعي رەسۋرستار ءمينيسترى الىبەك قۋانتىروۆ «تۇران جولبارىسىن جاڭعىرتۋ: مەملەكەت پەن بيزنەستىڭ بيو الۋان تۇرلىلىكتى ساقتاۋ جولىنداعى قىزمەتى» اتتى باسپا ءسوز ماجىلىسىندە ايتتى.
ەكولوگيا جانە تابيعي رەسۋرستار مينيسترلىگىنىڭ مالىمەتىنشە، ءۇمىت «ىلە-بالقاش» مەملەكەتتىك تابيعي رەزەرۆاتىنىڭ اۋماعىندا تىرشىلىك ەتىپ جاتىر. ول جابايى قابانداردى اۋلاپ، ءوز بەتىنشە قورەكتەنۋدە قيىندىق كورمەيدى.
- جولبارىستاردىڭ تابيعاتتا ءوز بەتىنشە تىرشىلىك ەتۋى ءۇشىن جابايى تۇياقتى جانۋارلاردىڭ جەتكىلىكتى بولۋى وتە ماڭىزدى. وسى ماقساتتا رەزەرۆات اۋماعىنا 200-دەن استام بۇقار بۇعىسى مەن 140 قۇلان قونىستاندىرىلدى. جولبارىستاردىڭ قورەكتىك قورىن كوبەيتۋگە باعىتتالعان جۇمىستار تۇراقتى جۇرگىزىلىپ كەلەدى. ءۇمىت ەسىمدى ۇرعاشى جولبارىس ءوز بەتىنشە اڭ اۋلاپ، مەكەندەيتىن اۋماعىن بەلگىلەپ ۇلگەردى. بۇل كەيىن ونىڭ جانىنا اتالىق جولبارىستى جىبەرۋگە مۇمكىندىك بەردى، - دەدى ەكولوگيا جانە تابيعي رەسۋرستار ءمينيسترى الىبەك قۋانتىروۆ.
ەسكە سالايىق، ءۇمىت بيىل 31 -شىلدەدە تابيعي ورتاعا جىبەرىلگەن بولاتىن. ماماندار ونىڭ جاڭا مەكەنىنە قالاي بەيىمدەلىپ جاتقانىن باقىلاپ وتىر.
ايتا كەتەيىك، 31-قازاندا وسى رەزەرۆاتقا امۋر اتتى ەكىنشى جولبارىس جىبەرىلدى. ءتورت جاستاعى اتالىق جولبارىس تابيعاتقا شىعارىلار الدىندا ارنايى تەكسەرۋدەن ءوتتى.
قازاقستاندا جولبارىستار 70 جىلدان استام ۋاقىت بويى جابايى تابيعاتتا كەزدەسپەگەن. ولاردى قايتا جەرسىندىرۋ باعدارلاماسى كەمىندە 35 جىلعا جوسپارلانعان.