بۇل تۋرالى «وحوتزووپروم» ءو ب» ر م ك ورتالىق وڭىرلىك فيليالىنىڭ باسشىسى الماس الپامىشوۆ «24KZ» تەلەارناسىنا بەرگەن سۇحباتىندا ايتتى.
ماماننىڭ ايتۋىنشا، كيىك سانىنىڭ كوبەيۋىنە ەڭ الدىمەن جانۋارلاردى قورعاۋ جۇمىستارىنىڭ كۇشەيۋى اسەر ەتكەن. ماسەلەن، ءۇستىرت پوپۋلياتسياسىنداعى كيىك سانى 2021 -جىلى 21 مىڭعا جۋىق بولسا، قازىر 119 مىڭعا جەتكەن.
«بۇكىل ەلدىڭ قىزىعۋشىلىعى - ءبىز ونى قالاي وسىنداي سانعا جەتكىزدىك؟ ول ءبىر عانا نارسە، ول - جاقسى قورعاۋ. وعان ۇكىمەت تاراپىنان، باسشىلار تاراپىنان وتە قاتتى كوڭىل بولىنەدى. سول سەبەپتەن سانى كوبەيىپ وتىر»، - دەدى الماس الپامىشوۆ.
سونداي-اق مامان قازاقستانداعى كيىكتەردىڭ ءبىر بولىگىن كورشىلەس وزبەكستان اۋماعىنا قونىستاندىرۋ ماسەلەسىنە توقتالدى. ونىڭ سوزىنشە، بۇل باستاما بىرنەشە جىلدان بەرى تالقىلانىپ كەلەدى. وزبەكستاندىق تابيعات قورعاۋ ۇيىمدارىنىڭ وكىلدەرى قازاقستانعا كەلىپ، پيتومنيكتەردىڭ جۇمىسىمەن تانىسقان. قازىر ەكى ەل اراسىندا زەرتتەۋ جۇمىستارى جۇرگىزىلىپ جاتىر.
«كيىكتى ءبىر جەردەن ەكىنشى جەرگە ايداپ اپارۋ مۇمكىن ەمەس. ول - ەركىن جۇرەتىن جانۋار. قاي باعىتقا قونىس اۋداراتىنى اۋا رايىنا، جايىلىمداعى قورەككە، قاردىڭ قالىڭدىعىنا جانە جەلدىڭ باعىتىنا بايلانىستى»، - دەدى فيليال باسشىسى.
ونىڭ ايتۋىنشا، جوسپار بويىنشا وزبەكستانعا ەرەسەك كيىكتەردى ەمەس، جاڭادان تۋعان تولدەردى بەرۋ كوزدەلىپ وتىر. كورشى ەلدە ولاردى وسىرۋگە ارنالعان ارنايى پيتومنيك قۇرۋ جوسپارلانعان. ال جانۋارلاردىڭ جاڭا اۋماققا بەيىمدەلۋى ءۇشىن سۋ كوزدەرى مەن جايىلىم جاعدايى الدىن الا زەرتتەلەدى.
الماس الپامىشوۆ كيىكتەردىڭ كوشى-قونى ناقتى ءبىر مەرزىممەن شەكتەلمەيتىنىن اتاپ ءوتتى. ويتكەنى جانۋارلاردىڭ قوزعالىسى تابيعي جاعدايلارعا تىكەلەي بايلانىستى.