Finprom زەرتتەۋىنشە، ەلوردادا شەنەۋنىكتەر ورتا ەسەپپەن ايىنا 618 مىڭ تەڭگە الادى. بۇل ەل بويىنشا ورتا كورسەتكىشتەن 66 پايىزعا جوعارى. ال قازاقستان بويىنشا مەملەكەتتىك باسقارۋ سالاسىنداعى ورتاشا جالاقى 372 مىڭ تەڭگەنى قۇرايدى.
استانادان كەيىن جوعارى كورسەتكىشتەر الماتىدا - 418 مىڭ تەڭگە، قىزىلوردا وبلىسىندا - 373,8 مىڭ، الماتى وبلىسىندا - 357,5 مىڭ جانە اقمولا وبلىسىندا - 349,4 مىڭ تەڭگە تىركەلگەن.
ەڭ تومەن جالاقى جامبىل وبلىسىندا - 301,9 مىڭ تەڭگە. تومەنگى ورىنداردا سونداي-اق شىمكەنت، پاۆلودار جانە اباي وبلىستارى دا بار.
بۇل ايىرماشىلىق ەل بويىنشا ورتاشا جالاقىمەن سالىستىرعاندا ءتىپتى ايقىنىراق كورىنەدى - ول 223,2 مىڭ تەڭگە. ياعني، استاناداعى شەنەۋنىكتەر ورتاشا قازاقستاندىقتان شامامەن ءۇش ەسە كوپ تابىس تابادى.
قانداي مامانداردىڭ تابىسى كوپ؟
ساراپشىلار قاعاز جۇزىندەگى ءوسىم ناقتى تابىستىڭ ارتۋىن بىلدىرمەيتىنىن ايتادى. 2025-جىلى شەنەۋنىكتەردىڭ نومينالدى جالاقىسى 10,2 پايىزعا وسكەنمەن، ينفلياتسيانى ەسەپتەگەندە ناقتى تابىس 1,1 پايىزعا تومەندەگەن.
تابىسقا تەك ايماق قانا ەمەس، مەملەكەتتىك ورگاننىڭ قۇرىلىمى دا اسەر ەتەدى. مىسالى، مىندەتتى الەۋمەتتىك قامتاماسىز ەتۋ سالاسىنىڭ قىزمەتكەرلەرى ايىنا 1 ميلليون تەڭگەدەن اسا جالاقى العان. حالىقارالىق قىزمەت سالاسىنداعىلاردىڭ تابىسى دا جوعارى - شامامەن 680 مىڭ تەڭگە.
ەڭ كوپ جالاقى الاتىنداردىڭ قاتارىندا سۋديالار بار - ولاردىڭ تابىسى 1 ميلليون تەڭگەدەن اسادى. سونىمەن قاتار ساپانى باقىلاۋ ينجەنەرلەرى، تەكسەرۋ كوميسسيالارىنىڭ ءتوراعالارى جانە ورتالىق مەملەكەتتىك ورگانداردىڭ باسشىلارى دا جوعارى جالاقى الاتىنداردىڭ ىشىندە.
ال ەڭ تومەن جالاقى تەحنيكالىق قولداۋ قىزمەتكەرلەرىندە، حاتشىلاردا، جۇرگىزۋشىلەردە، ەدەن جۋۋشىلاردا جانە كومپيۋتەر وپەراتورلارىندا تىركەلگەن - شامامەن 90- 125 مىڭ تەڭگە.
حالىقتىڭ تابىسى ازايعان
ايتا كەتەيىك، بۇدان بۇرىن Halyk Finance ساراپشىلار قازاقستاندىقتاردىڭ ناقتى تابىسى 1,7 پايىزعا تومەندەگەنىن ايتقان. الەۋەتتى ەكونوميكالىق ءوسىم تۋرالى جيى ايتىلعانىمەن، ول حالىقتىڭ ءال-اۋقاتىن ارتتىرماعان. ساراپشىلار مۇنى ءوسىمنىڭ ەداۋىر بولىگى مۇناي كىرىستەرىنە سۇيەنۋىمەن بايلانىستىرادى. ال ول تابىس بارلىق تۇرعىندارعا بىردەي جەتپەيدى. سونىمەن قاتار ەكونوميكالىق ءوسىم تابىس دەڭگەيىنىڭ ارتۋىنا بىردەن اسەر ەتپەيدى، وعان ۋاقىت كەرەك.
تابىستىڭ ازايۋى تۇتىنۋ ادەتتەرىن دە وزگەرتكەن. ناتيجەسىندە ازىق-تۇلىككە كەتەتىن شىعىن ۇلەسى ارتسا، كيىم-كەشەك، تۇرمىستىق تەحنيكا جانە باسقا دا كۇندەلىكتى قاجەتتىلىگى تومەن تاۋارلارعا جۇمسالاتىن قارجى قىسقارعان. ياعني كوپتەگەن وتباسى ۇنەمدەۋ تارتىبىنە كوشىپ، قوسىمشا شىعىنداردى ازايتۋعا ءماجبۇر بولعان.
Ulysmedia.kz