ەلىمىزدىڭ وڭىرلەرىندە ونەركاسىپتىك الەۋەتتى دامىتۋ، كولىك، ينجەنەرلىك جانە الەۋمەتتىك ينفراقۇرىلىمدى جاڭعىرتۋ جۇمىستارى جالعاسىپ جاتىر. جاڭا ونەركاسىپ وندىرىستەرى، دەنساۋلىق ساقتاۋ نىساندارى، جول جەلىسى جانە الەۋمەتتىك سالا نىساندارى پايدالانۋعا بەرىلدى.
كولىك ينفراقۇرىلىمى
شىعىس قازاقستان وبلىسىندا تەرەڭساي اسۋىن اينالىپ وتەتىن اۆتوموبيل جولى جانە پيحتوۆكا وزەنى ارقىلى وتەتىن قازاقستانداعى ەڭ بيىك تاۋلى اۆتوموبيل كوپىرى اشىلدى. جاڭا نىساندار جول قوزعالىسى قاۋىپسىزدىگىن ارتتىرىپ، وڭىردەگى ەلدى مەكەندەر اراسىنداعى كولىك قاتىناسىن جاقسارتادى.
الماتى وبلىسىندا رەسپۋبليكالىق ماڭىزى بار «كەگەن - نارىنقول» اۆتوموبيل جولىنىڭ 74 شاقىرىمدىق ۋچاسكەسىنە ورتاشا جوندەۋ جۇمىستارى اياقتالدى. جوبانىڭ قۇنى - 8,1 ميلليارد تەڭگە. كۇن سايىن 1,2 مىڭنان استام اۆتوكولىك قاتىنايتىن جاڭارتىلعان جول ۋچاسكەسىندە 14 ايالداما، 78 جول قيىلىسى مەن كىرمە جول جوندەلدى.
جەتىسۋ وبلىسىندا مۇقىرى اسۋىنداعى ۇزىندىعى 21 شاقىرىمدىق ءتورت جولاقتى اۆتوجول اشىلدى. جاڭا جول قوزعالىس قاۋىپسىزدىگىن ارتتىرىپ، جول ءجۇرۋ ۋاقىتىن قىسقارتۋعا مۇمكىندىك بەرەدى.
ونەركاسىپ جانە ءوندىرىس
الماتى وبلىسىندا 2,5 ميلليارد تەڭگە ينۆەستيتسيا تارتىلعان، تاۋلىگىنە 10 توننا ەت وڭدەۋگە قاۋقارلى ەت وڭدەۋ كاسىپورنى ىسكە قوسىلدى. جوبا وڭدەۋ ونەركاسىبىن دامىتۋعا جانە ىشكى نارىقتاعى وتاندىق ءونىم كولەمىن ارتتىرۋعا باعىتتالعان.
تۇركىستان وبلىسىندا قۇنى 1,5 ميلليارد تەڭگەنى قۇرايتىن ونەركاسىپتىك مەتالل كونسترۋكتسيالار مەن مەتالل بۇيىمدارىن وندىرەتىن زاۋىت ىسكە قوسىلدى. كاسىپورىن جىلىنا 100 دانا ءونىم شىعارۋعا قاۋقارلى. جاڭا ءوندىرىس ورنى وڭىردەگى ونەركاسىپ ءوندىرىسىنىڭ اۋقىمىن كەڭەيتۋگە مۇمكىندىك بەرەدى.
اباي وبلىسىندا قۇنى 8,4 ميلليارد تەڭگەنى قۇرايتىن وسىمدىك مايىن قۇيۋ جانە قاپتاۋ سەحى ىسكە قوسىلدى. كاسىپورىن تاۋلىگىنە 200 توننا ماي وندىرۋگە قاۋقارلى. جاڭا سەحتىڭ ىسكە قوسىلۋى 100-دەن استام جۇمىس ورنىن اشۋعا جانە ىشكى جانە سىرتقى نارىقتاردا ءونىم جەتكىزۋ كولەمىن كەڭەيتۋگە مۇمكىندىك بەرەدى.
قاراعاندى وبلىسىندا 20,5 مىڭ قۇسقا ارنالعان، جاساندى ينتەللەكت نەگىزىندەگى كليماتتى باقىلاۋ جۇيەسىمەن جابدىقتالعان قۇس شارۋاشىلىعى كەشەنى ىسكە قوسىلدى. كاسىپورىن قۇس ەتىنىڭ ءوندىرىسىن جىلىنا 250- 280 تونناعا ارتتىرۋعا مۇمكىندىك بەرەدى.
دەنساۋلىق ساقتاۋ جانە الەۋمەتتىك نىساندار
الماتى وبلىسىنىڭ نارىنقول اۋىلىندا اۋىسىمىنا 250 ادامعا كومەك كورسەتە الاتىن، كۇندىزگى ستاتسيونارى جانە زاماناۋي دياگنوستيكالىق جابدىقتارى بار ەمحانا اشىلدى.
وسكەمەن قالاسىندا شىعىس قازاقستان، اباي جانە پاۆلودار وبلىستارىنىڭ تۇرعىندارىنا ارنالعان 148 ورىندىق گەماتولوگيا ورتالىعى سالىندى. نىسان قۇرىلىسىنا، ونىڭ ىشىندە مەملەكەتكە قايتارىلعان اكتيۆتەر قاراجاتى ەسەبىنەن 33,6 ميلليارد تەڭگە باعىتتالدى.
تۇركىستان وبلىسىنىڭ سارى اعاش اۋدانىندا شاعىن فۋتبول، ۆولەيبول جانە باسكەتبول الاڭدارى، سونداي-اق ۆوركاۋت- ايماقتارى بار جاڭا سپورت جانە بالالار ويىن الاڭدارى اشىلدى. جاڭا نىساندار اۋىل تۇرعىندارىنىڭ سپورتپەن شۇعىلدانۋىنا جانە بەلسەندى دەمالۋىنا قولايلى جاعداي جاسايدى.
قوستانايدا 1000 ورىندىق تريبۋنالارى، جۇگىرۋ جولدارى مەن فۋتبول، باسكەتبول جانە ۆولەيبول الاڭدارى بار كوپفۋنكتسيونالدى ستاديون (2,9 گ ا) اشىلدى.