2023-جىلدان بەرى جۇمىس ىستەيتىن وتباسىنىڭ سيفرلىق كارتاسى بۇگىندە شامامەن 20,4 ميلليون ادامدى قامتيدى. ول 30 سيفرلىق جۇيەدەگى مالىمەتتەردى پايدالانىپ، قاجەتتى اقپاراتتى اۆتوماتتى تۇردە جيناقتايدى.
مينيسترلىك مالىمەتىنشە، وتباسىلاردىڭ جاعدايى ەكى نەگىزگى باعىت بويىنشا باعالانادى. ولار - ماتەريالدىق ءال-اۋقات جانە ومىرلىك جاعدايلار.
ماتەريالدىق ءال-اۋقاتتى انىقتاۋ كەزىندە تۇرعىن ءۇي، اۆتوكولىك، جەر ۋچاسكەسى، كوممەرتسيالىق جىلجىمايتىن مۇلىك، كاسىپكەرلىك قىزمەتكە قاتىسۋ جانە كرەديتتىك جۇكتەمە ەسكەرىلەدى.
بۇل رەتتە مۇلىكتىڭ بولۋى عانا ەمەس، ونىڭ سيپاتتامالارى دا ماڭىزدى. ماسەلەن، پاتەرى، اۆتوكولىگى نەمەسە شاعىن جەر ۋچاسكەسى بار وتباسى مىندەتتى تۇردە اۋقاتتى ساناتقا جاتقىزىلمايدى.
- سونىمەن قاتار جۇيە وتباسى مۇشەلەرىنىڭ جاسىن، بالالارى، مۇگەدەكتىگى بار جانە سوزىلمالى اۋرۋلارى بار ادامداردىڭ بولۋىن، سونداي- اق وتباسىنىڭ الەۋمەتتىك جاعدايىنا اسەر ەتۋى مۇمكىن وزگە دە ومىرلىك ءمان- جايلاردى ەسكەرەدى. مىسالى، ەكى وتباسىنىڭ تابىسى بىردەي بولعانىمەن، ولاردىڭ تۇرمىس جاعدايى ءارتۇرلى بولۋى مۇمكىن. ءبىر وتباسىندا اتا- انانىڭ ەكەۋى دە جۇمىس ىستەسە، ەكىنشىسىندە بارلىق وتباسى مۇشەسىن اسىرايتىن تەك ءبىر ادام. ونىڭ ۇستىنە وتباسىندا كىشكەنتاي بالالار نەمەسە قوسىمشا كۇتىم مەن شىعىندى قاجەت ەتەتىن مۇگەدەكتىگى بار ادامداردىڭ بولۋى دا قاراستىرىلادى، - دەلىنگەن مينيسترلىك اقپاراتىندا.
جيناقتالعان دەرەكتەر نەگىزىندە ءار وتباسىنىڭ ءال-اۋقات دەڭگەيى بەس ساناتتىڭ بىرىنە جاتقىزىلادى: جوعارى، اۋقاتتى، قاناعاتتانارلىق، ەكونوميكالىق وسال نەمەسە ەكونوميكالىق جانە الەۋمەتتىك وسال.
وتباسىنىڭ جاعدايى سيفرلىق جۇيەلەردەن كەلىپ تۇسەتىن جاڭارتىلعان مالىمەتتەر نەگىزىندە تۇراقتى تۇردە قايتا باعالانادى.
مينيسترلىكتىڭ تۇسىندىرۋىنشە، وتباسىنىڭ تسيفرلىق كارتاسىنىڭ باستى ماقساتى - ءار وتباسىنىڭ ناقتى الەۋمەتتىك-ەكونوميكالىق جاعدايىن انىقتاپ، ومىرلىك ءمان-جايلارىن ەسكەرە وتىرىپ، قاجەتتى مەملەكەتتىك قولداۋدى ۇسىنۋ.
ايتا كەتەيىك، بۇعان دەيىن وتباسىنىڭ سيفرلىق كارتاسىنداعى مالىمەتتەر قاتە كورسەتىلگەن جاعدايدا ازاماتتاردىڭ تۇرعىلىقتى جەرى بويىنشا ءتيىستى مەملەكەتتىك ورگاندارعا جۇگىنە الاتىنى حابارلانعان بولاتىن. دەرەكتەر تۇزەتىلگەننەن كەيىن وتباسىنىڭ ءال-اۋقات ساناتى كەلەسى باعالاۋ كەزىندە قايتا ەسەپتەلەدى.