قاۋىمداستىقتىڭ مالىمەتىنشە، مۇنداي قارقىندى دامۋعا ىقپال ەتكەن بىرنەشە فاكتور بار. ولاردىڭ قاتارىندا كۇنباعىس ەگىس القاپتارىنىڭ كەڭەيۋى، ماي وڭدەۋ كاسىپورىندارى مەن اۋىل شارۋاشىلىعى تاۋارىن وندىرۋشىلەر اراسىنداعى شيكىزات ساتىپ الۋعا ارنالعان فورۆاردتىق كەلىسىمشارتتار نەگىزىندە ىنتىماقتاستىقتىڭ دامۋى، قايتا وڭدەۋ قۋاتتارىنىڭ ارتۋى جانە كاسىپورىنداردىڭ قوسىلعان قۇنى جوعارى ءونىم وندىرۋگە باسىمدىق بەرىلدى.
سونىمەن قاتار قازاقستاندىق ماي ونىمدەرىنە سىرتقى نارىقتاردا تۇراقتى سۇرانىستىڭ بولۋى ءوندىرىس ءوسىمىنىڭ نەگىزگى قوزعاۋشى كۇشتەرىنىڭ ءبىرى بولىپ وتىر.
بيىلعى جىلى قازاقستاندا مايلى داقىلدار ەگىلگەن القاپتاردىڭ جالپى كولەمى (ماقتا ەگىسىن ەسەپتەمەگەندە) 5,179 ميلليون گەكتاردان استى. بۇل وتكەن جىلمەن سالىستىرعاندا 30 پايىزعا كوپ.
- قازىرگى ۋاقىتتا ەلىمىزدەگى ماي وڭدەۋ كاسىپورىندارىنىڭ جىلدىق جيىنتىق قۋاتى 5,4 ميلليون توننادان استام مايلى داقىل تۇقىمىن وڭدەۋگە جەتەدى. ونىڭ ىشىندە كۇنباعىس تۇقىمىن وڭدەۋ قۋاتى 4,6 ميلليون توننانى قۇرايدى. الايدا ەگىس القاپتارىنىڭ ۇلعايۋىنا قاراماستان، كاسىپورىندار ءالى دە شيكىزات تاپشىلىعىن سەزىنىپ، وندىرىستىك قۋاتتارىن تولىق پايدالانا الماي وتىر، - دەلىنگەن حابارلامادا.
م د ق ۇ ق وكىلدەرىنىڭ حابارلاۋىنشا، سالانىڭ الداعى دامۋ باعىتى شيكىزاتتى تەرەڭ وڭدەۋدى كەڭەيتۋگە جانە ىشكى ءارى سىرتقى نارىقتارعا ارنالعان ءونىم كولەمىن ارتتىرۋعا بايلانىستى بولماق.
اتاپ ايتقاندا، 2026- 2028 -جىلدارى ماي تازارتۋ قۋاتتارىن 2,1 ەسەگە ارتتىرىپ، جىلىنا 1 ميلليون توننادان استام دەڭگەيگە جەتكىزۋ جوسپارلانىپ وتىر. ال ولشەپ-ورالعان تازارتىلعان كۇنباعىس مايىنىڭ ءوندىرىسىن 2,4 ەسەگە ۇلعايتۋ كوزدەلگەن.
بۇدان بولەك، 2027- 2028 -جىلدارى جىلدىق وندىرىستىك قۋاتى تيىسىنشە 72 مىڭ جانە 50 مىڭ توننانى قۇرايتىن وسىمدىك مايلارى مەن مارگارين وندىرەتىن ەكى جوبانى ىسكە قوسۋ جوسپارلانعان.
اتالعان جوبالاردى جۇزەگە اسىرۋ قازاقستاننىڭ قايتا وڭدەۋ الەۋەتىن نىعايتۋعا، قوسىلعان قۇنى جوعارى ءونىم تۇرلەرىن كوبەيتۋگە جانە وتاندىق ماي ونەركاسىبىنىڭ باسەكەگە قابىلەتتىلىگىن ارتتىرۋعا مۇمكىندىك بەرەدى.
ەسكە سالا كەتەيىك، قازاقستان كۇنباعىس قاۋىزىنىڭ تۇيىرشىكتەرىن ەكسپورتتاۋدان تۇسەتىن تابىستى 6,15 ەسە ارتتىردى. بيىل توعىز ايدا ەۋروپا ەلدەرىنە 63,2 مىڭ توننا ءونىم جونەلتىلىپ، ەكسپورتتىق كىرىس 3,4 ميلليون دوللارعا جەتتى.