دەنساۋلىق ساقتاۋ مينيسترلىگىنە قاراستى ساليدات قايىربەكوۆا اتىنداعى ۇلتتىق عىلىمي دەنساۋلىق ساقتاۋدى دامىتۋ ورتالىعىنىڭ مالىمەتىنشە، 2026-جىلعى قاڭتار-قىركۇيەك ارالىعىندا گلاۋكومانى انىقتاۋ ماقساتىندا 1,74 ميلليون ادام سكرينينگتەن ءوتتى. ولاردىڭ شامامەن 4,6 مىڭى مەديتسينالىق باقىلاۋعا الىندى.
دارىگەرلەر ولاردىڭ دەنساۋلىق جاعدايىن قاداعالاپ، باقىلاۋ تەكسەرۋلەرىن جۇرگىزەدى جانە قاجەت بولعان جاعدايدا ەم تاعايىندايدى.
باسقا باعىتتار بويىنشا دا ميلليونداعان قازاقستاندىق تەكسەرۋدەن ءوتتى. قانت ديابەتىن انىقتاۋعا ارنالعان سكرينينگپەن 1,66 ميلليون ادام قامتىلىپ، ولاردىڭ شامامەن 30,7 مىڭى مەديتسينالىق باقىلاۋعا الىندى. ارتەريالىق گيپەرتەنزيا مەن جۇرەكتىڭ يشەميالىق اۋرۋىن انىقتاۋ ءۇشىن 1,47 ميلليون ادام تەكسەرىلدى. ولاردىڭ 97 مىڭى مەديتسينالىق باقىلاۋعا جىبەرىلدى.
مي قان اينالىمىنىڭ بۇزىلۋىن ەرتە انىقتاۋعا ارنالعان سكرينينگتەن 281 مىڭ ادام ءوتتى. ونىڭ ىشىندە 14,2 مىڭى مەديتسينالىق باقىلاۋعا الىندى.
سكرينينگتىك باعدارلامانىڭ تاعى ءبىر ماڭىزدى باعىتى - ونكولوگيالىق اۋرۋلاردى ەرتە انىقتاۋ. ءسۇت بەزى وبىرىنا 1,09 ميلليوننان استام ايەل، جاتىر موينى وبىرىنا 777191 ايەل تەكسەرىلدى.
كولورەكتالدىق وبىردى انىقتاۋعا ارنالعان سكرينينگپەن 1,35 ميلليون ادام قامتىلدى.
تەكسەرۋ ناتيجەسىندە ءسۇت بەزى وبىرىنىڭ 2037، جاتىر موينى وبىرىنىڭ 374 جانە كولورەكتالدىق وبىردىڭ 601 جاعدايى انىقتالدى.
وتكەن جىلدىڭ سايكەس كەزەڭىمەن سالىستىرعاندا گلاۋكومانى انىقتاۋ سكرينينگىنىڭ قامتۋ كورسەتكىشى 81 پايىزدان 91,2 پايىزعا، ال قانت ديابەتىن انىقتاۋ كورسەتكىشى 79,4 پايىزدان 84,2 پايىزعا ءوستى.
ارتەريالىق گيپەرتەنزيا مەن جۇرەكتىڭ يشەميالىق اۋرۋىن انىقتاۋ بويىنشا كورسەتكىش 84,8 پايىزدان 79,7 پايىزعا تومەندەدى.
قازاقستاندا سكرينينگتىك باعدارلامالار دا كەڭەيتىلىپ كەلەدى. 2025-جىلى ءبىرقاتار تەكسەرۋ تۇرلەرى بويىنشا جوعارعى جاس شەگى 76 جاسقا دەيىن ۇلعايتىلدى. سونداي-اق 50-76 جاس ارالىعىنداعى ەرلەر ءۇشىن مي قان اينالىمىنىڭ بۇزىلۋىن ەرتە انىقتاۋعا ارنالعان سكرينينگ ەنگىزىلدى.
سكرينينگ اۋرۋدىڭ بەلگىلەرى پايدا بولماي تۇرىپ، ونىڭ ىقتيمال بەلگىلەرىن انىقتاۋعا مۇمكىندىك بەرەدى. ەگەر تەكسەرۋ ناتيجەلەرى قوسىمشا ناقتىلاۋدى قاجەت ەتسە، ازاماتتار تەرەڭدەتىلگەن تەكسەرۋگە جىبەرىلەدى.
سوندىقتان نىسانالى توپقا كىرەتىن ازاماتتار دەنساۋلىعىنا شاعىمى بولماسا دا، سكرينينگتەن ۋاقىتىلى وتكەنى ماڭىزدى.
تەكسەرۋدەن تىركەلگەن ەمحانا بويىنشا تەگىن وتۋگە بولادى. ال جۇمىس ىستەيتىن ازاماتتارعا وسى ماقساتتا كۇنتىزبەلىك جىل ىشىندە جۇمىس ورنى مەن ورتاشا جالاقىسى ساقتالا وتىرىپ، ءۇش جۇمىس كۇنىنە دەيىن الەۋمەتتىك دەمالىس بەرىلەدى.
2027-جىلعى قاڭتاردان باستاپ ەمحانالار ازاماتتاردى تەكسەرۋگە تسيفرلىق دەنساۋلىق ساقتاۋ سەرۆيستەرى، تەلەفون بايلانىسى جانە باسقا دا ارنالار ارقىلى قوسىمشا شاقىرا الاتىنىن ايتا كەتكەن ءجون.
بيىلعى 19-قازاننان باستاپ اقمولا وبلىسىندا، اباي جانە ۇلىتاۋ وبلىستارىندا 1414 ءنومىرى ارقىلى سكرينينگتەن ءوتۋ قاجەتتىگى تۋرالى SMS- حابارلامالار جىبەرۋ پيلوتتىق جوباسىن ىسكە قوسۋ جوسپارلانعان.