بۇل تۋرالى قۇرىلتاي دەپۋتاتتارىنىڭ ساۋالىنا پرەمەر- ءمينيسترىنىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆتىڭ جاۋابىندا ايتىلعان.
ونىڭ اتاپ وتۋىنشە، سپۋتنيكتىك بايلانىس جەرۇستى ينفراقۇرىلىمىن سالۋ تەحنيكالىق تۇرعىدان قيىن نەمەسە ەكونوميكالىق جاعىنان ءتيىمسىز شالعاي جانە جەتۋ قيىن ەلدى مەكەندەردى ينتەرنەتپەن قامتاماسىز ەتەدى.
- 2024-جىلعى قازاندا OneWeb كومپانياسى الماتى وبلىسىنىڭ كوكتەرەك اۋىلىندا جەرۇستى تۇيىندەستىرۋ ستانتسياسىن ىسكە قوستى. ال 2025-جىلعى قاڭتاردان باستاپ سپۋتنيكتىك ينتەرنەت قىزمەتتەرىن كورسەتىپ كەلەدى. «قولجەتىمدى ينتەرنەت» ۇلتتىق جوباسى اياسىندا 2025-جىلى شالعايداعى 329 اۋىل OneWeb سپۋتنيكتىك ينتەرنەتىمەن قامتاماسىز ەتىلدى. 2026-جىلى OneWeb تەرمينالدارىن پايدالانا وتىرىپ، قوعامدىق Wi-Fi نۇكتەلەرى ورناتىلعان اۋىلداردىڭ سانى 362 گە دەيىن ۇلعايتىلدى. اكىمدىكتەردىڭ وتىنىشتەرى بويىنشا قوسىمشا ەلدى مەكەندەردى قوسۋ ماسەلەسى قاراستىرىلىپ جاتىر،- دەدى ۆيتسە-پرەمەر.
ۇكىمەت باسشىسى ورىنباسارىنىڭ دەرەگىنشە، Starlink تەرمينالدارى 1798 مەكتەپتە ورناتىلعان. سونداي-اق ولاردى ازاماتتار جانە كاسىپكەرلەر، ونىڭ ىشىندە شالعاي جەرلەردە جانە تۋريستىك ورىنداردا پايدالانادى. Starlink جانە OneWeb كومپانيالارى كوممەرتسيالىق نەگىزدە قىزمەت كورسەتۋ ءۇشىن قاجەتتى تەحنيكالىق تالاپتاردى، ونىڭ ىشىندە ارنايى جەدەل-ىزدەستىرۋ ءىس-شارالارىنىڭ (ءا ج ى ش) جانە تەلەكوممۋنيكاتسيا جەلىلەرىن باسقارۋ ورتالىعىنىڭ تالاپتارىن ورىنداپ، ءتيىستى جەرۇستى ينفراقۇرىلىمىن قۇردى. 2026-جىلعى 2-قازاندا كومپانيالار قاجەتتى ليتسەنزيالاردى الىپ، پيلوتتىق رەجيمنەن كوممەرتسيالىق نەگىزدە بايلانىس قىزمەتتەرىن كورسەتۋگە كوشتى.
- 2027 -جىلى قازاقستان نارىعىنا Amazon LEO جانە Shanghai SpaceSail وپەراتورلارىنىڭ شىعۋى كۇتىلەدى. سپۋتنيكتىك تەحنولوگيالاردى دامىتۋ حالىقتىڭ الەۋمەتتىك نىسانداردىڭ جانە بيزنەستىڭ ينتەرنەتكە قولجەتىمدىلىگىن كەڭەيتۋگە، سونداي-اق جەرۇستى ينفراقۇرىلىمى زاقىمدانعان جاعدايدا رەزەرۆتىك بايلانىس ارنالارىن قامتاماسىز ەتۋگە مۇمكىندىك بەرەدى،- دەدى جاسلان ماديەۆ.
Shanghai SpaceSail Technologies قىتايدىڭ سپۋتنيكتىك ينتەرنەت كومپانياسى.
Amazon Leo (بۇرىنعى Project Kuiper) سپۋتنيكتىك ينتەرنەت جۇيەسى.
ايتا كەتەيىك، ەلىمىزدە 51 باعىت بويىنشا قاتىنايتىن جولاۋشىلار پويىزدارى Starlink سپۋتنيكتىك ينتەرنەتىنە قوسىلدى.