قازاقستاندا ونىڭ باعاسى 10,99 ميلليون تەڭگەدەن باستالىپ، ەڭ قىمبات X-Line نۇسقاسى 15,49 ميلليون تەڭگەگە دەيىن جەتەدى.
جاڭا Kia Seltos-تىڭ الەمدىك تۇساۋكەسەرى وتكەن جىلدىڭ سوڭىندا وتكەن بولاتىن. ەندى كروسسوۆەردىڭ ساتىلىم گەوگرافياسى كەڭەيىپ، قازاقستان نارىعىنا دا جەتتى.
سىرتقى كەلبەتى مەن سالونى
قازاقستانعا ارنالعان Seltos ديزاينى جاعىنان باسقا نارىقتارعا ۇسىنىلعان نۇسقالاردان ايتارلىقتاي ەرەكشەلەنبەيدى. كروسسوۆەردىڭ سىرتقى كەلبەتىندە ويىق ءپىشىندى رادياتور تورى، ونىمەن تۇتاسىپ كەتكەن تىكبۇرىشتى فارالار، قوس سەكتسيالى تىك كۇندىزگى ءجۇرىس شامدارى جانە ەسىكتىڭ سىرتقا قاراي جىلجيتىن تۇتقالارى بار. ارتقى شامدارى دا تىك باعىتتا ورنالاسقان.
قازاقستاندا كولىكتىڭ X-Line دەپ اتالاتىن اناعۇرلىم باتىل ديزاينى بار نۇسقاسى دا ساتىلادى. بۇل جيناقتا قارا ءتۇستى ساندىك ەلەمەنتتەر كوبىرەك قولدانىلعان.
قازاقستاندىق Kia Seltos-تىڭ ۇزىندىعى - 4460 م م، دوڭعالاق بازاسى - 2690 م م. جول ساڭىلاۋى 180 م م- گە تەڭ.
سالون جابدىقتالۋى جاعىنان مودەل قىتاي نارىعىنا ارنالعان نۇسقامەن ۇقساس. جۇرگىزۋشىگە ارنالعان 10 ديۋيمدىك سيفرلىق اسپاپتار پانەلى جانە مۋلتيمەديا جۇيەسىنىڭ 27 ديۋيمدىك ۇلكەن ديسپلەيى ورناتىلعان. بەرىلىس قورابىن باسقارۋ رولدىڭ جانىنداعى ارنايى تەتىك ارقىلى جۇزەگە اسىرىلادى.
قوزعالتقىشتىڭ ءۇش نۇسقاسى ۇسىنىلادى
قازاقستاندا جاڭا Seltos بەنزينمەن جۇرەتىن ەكى ءتۇرلى 1,5 ليترلىك قوزعالتقىشپەن ساتىلادى. اتموسفەرالىق 1.5 MPI موتورىنىڭ قۋاتى - 115 ات كۇشى. ول ۆارياتورمەن بىرگە جۇمىس ىستەيدى جانە تەك الدىڭعى جەتەكتى نۇسقادا قولجەتىمدى.
ال 1.5 T-GDI تۋربوموتورى ەكى ءتۇرلى قۋاتپەن ۇسىنىلعان. ونىڭ 150 ات كۇشىنە يە نۇسقاسى سەگىز ساتىلى اۆتومات بەرىلىس قورابىمەن جابدىقتالعان. بۇل قوزعالتقىش Prestige جانە Premium جيناقتارىندا الدىڭعى نەمەسە تولىق جەتەكتى نۇسقامەن ۇسىنىلادى.
ەڭ جوعارى X-Line جيناعىندا 200 ات كۇشىن بەرەتىن 1.5 T-GDI تۋربوموتورى ورناتىلعان. ول سەگىز ساتىلى اۆتومات بەرىلىس قورابىمەن جانە تولىق جەتەك جۇيەسىمەن ۇيلەسەدى.
جابدىقتالۋى مەن باعاسى
جاڭا Seltos-تىڭ باستاپقى جيناقتاماسىنىڭ وزىندە جارىقديودتى وپتيكا، سيفرلىق ەكراندار، رول مەن الدىڭعى ورىندىقتاردى جىلىتۋ، كليمات-باقىلاۋ، ارتقى كورىنىس كامەراسى جانە كرۋيز-باقىلاۋ قاراستىرىلعان.
كەلەسى جيناقتامادا الدىڭعى اينەك پەن اينەك جۋعىش بۇرىككىشتەرىن جىلىتۋ، كىلتسىز كىرۋ جۇيەسى، قوزعالتقىشتى باتىرما ارقىلى ىسكە قوسۋ جانە ارتقى ورىندىقتاردى جىلىتۋ مۇمكىندىكتەرى قوسىلادى. ال جوعارىراق نۇسقالاردا سالوننىڭ اتموسفەرالىق جارىقتاندىرىلۋى مەن سمارتفوندى سىمسىز قۋاتتاۋ جۇيەسى بار.
توپتىق X-Line جيناقتاماسى پانورامالىق شاتىرمەن، ەلەكترلى جۇكسالعىش ەسىگىمەن، الدىڭعى ورىندىقتاردى جەلدەتۋ جۇيەسىمەن جانە پروەكتسيالىق ديسپلەيمەن جابدىقتالعان. سونىمەن قاتار اينالانى شولۋ كامەرالارى، بەيىمدەلەتىن كرۋيز-باقىلاۋ، اۆتوماتتى تەجەۋ جانە قوزعالىس جولاعىندا ۇستاپ تۇرۋ جۇيەلەرى قاراستىرىلعان.
قازاقستاندا ەكىنشى بۋىنداعى Kia Seltos-تىڭ باعاسى 10990000 تەڭگەدەن باستالادى. ەڭ قىمبات X Line نۇسقاسىنىڭ قۇنى - 15490000 تەڭگە.
el.kz