قازاقستاندا ريەلتورلاردىڭ نەگىزسىز كوميسسيا الۋى قانشالىقتى زاڭدى

استانا. قازاقپارات - قازاقستاندا ريەلتورلىق قىزمەتتى رەتتەيتىن جاڭا تالاپتار ازىرلەنىپ جاتىر. سونىڭ اياسىندا ريەلتوردىڭ قىزمەتىنە تاپسىرىس بەرمەگەن ازاماتتاردان كوميسسيا الۋعا تىيىم سالۋ ۇسىنىلدى.

Фото: Фото: AI көмегімен жасалды

بۇل تۋرالى ساۋدا جانە ينتەگراتسيا مينيسترلىگى حابارلادى.

مينيسترلىك قۇرىلتاي دەپۋتاتتارىمەن جانە كاسىبي قاۋىمداستىق وكىلدەرىمەن بىرلەسىپ، ريەلتورلىق قىزمەت كورسەتۋدىڭ ءبىرىڭعاي قاعيدالارىن تالقىلاپ جاتىر. باستامانىڭ نەگىزگى ماقساتى - قىزمەت ساپاسىن ارتتىرۋ، ريەلتورلار جۇمىسىنىڭ اشىقتىعىن قامتاماسىز ەتۋ جانە تۇتىنۋشىلاردىڭ قۇقىقتارىن قورعاۋ.

كوميسسيانى كىم تولەۋى كەرەك؟

ۇسىنىلىپ وتىرعان باستى وزگەرىستەردىڭ ءبىرى - ريەلتور قىزمەتىنە جۇگىنبەگەن ازاماتتاردان كوميسسيا تالاپ ەتۋگە جول بەرمەۋ. ياعني ماماننىڭ كومەگىنە تاپسىرىس بەرمەگەن ءۇي ساتىپ الۋشى نەمەسە جالعا الۋشى قىزمەت اقىسىن تولەۋگە مىندەتتى بولماۋى كەرەك. سونداي-اق كليەنت ريەلتوردىڭ كىمنىڭ مۇددەسىن قورعايتىنىن جانە قانداي قىزمەت ءۇشىن اقى الىپ وتىرعانىن الدىن الا بىلۋگە ءتيىس.

كەلىسىمشارتتا نە كورسەتىلەدى؟

جاڭا تالاپتار قابىلدانسا، ريەلتور مەن كليەنت اراسىنداعى كەلىسىمشارتتا كورسەتىلەتىن قىزمەتتەردىڭ ءتىزىمى مەن قۇنى، كوميسسيا مولشەرى جانە ونى تولەۋ ءتارتىبى ناقتى جازىلۋى كەرەك. قۇجاتتا ەكى تاراپتىڭ قۇقىقتارى مەن مىندەتتەرى دە بەلگىلەنبەك. وسىلايشا، ازامات كەلىسىمشارتقا قول قويماس بۇرىن قانداي قىزمەت الاتىنىن جانە وعان قانشا تولەيتىنىن بىلە الادى.

ريەلتورلاردىڭ بىلىكتىلىگى راستالماق

قازىر ريەلتورلاردىڭ كاسىبي ستاندارتى ازىرلەنىپ جاتىر. وندا ماماندارعا قاجەتتى ءبىلىم، داعدى جانە بىلىكتىلىك دەڭگەيى ايقىندالادى. سونىمەن قاتار ولاردىڭ كاسىبي دايارلىعىن اككرەديتتەلگەن ۇيىمدار ارقىلى راستاۋ تەتىگى قاراستىرىلۋدا.

ەڭبەك جانە حالىقتى الەۋمەتتىك قورعاۋ مينيسترلىگىمەن بىرلەسىپ، ريەلتورلاردى رەتتەلەتىن كاسىپتەر تىزىمىنە ەنگىزۋ ماسەلەسى قارالادى. بۇل ريەلتورلاردىڭ كاسىبي دايارلىعىنا ناقتى تالاپتار قويۋعا جانە ولاردىڭ بىلىكتىلىگىن راستاۋ ءتارتىبىن بەلگىلەۋگە نەگىز بولماق.

ناتيجەسىندە ازاماتتار قىزمەتىنە جۇگىنەتىن ريەلتورلاردىڭ كاسىبي بىلىكتىلىگى تۋرالى كوبىرەك اقپارات الا الادى. سونداي-اق ازاماتتارعا قاجەتسىز قىزمەتتەردى ءماجبۇرلى تۇردە ۇسىنۋعا، كەلىسىمشارتقا تۇتىنۋشى ءۇشىن ءتيىمسىز تالاپتار ەنگىزۋگە جانە نەگىزسىز كوميسسيا الۋعا جول بەرمەۋ ءۇشىن قوسىمشا زاڭنامالىق شارالار تالقىلانىپ جاتىر، - دەلىنگەن مينيسترلىكتىڭ رەسمي سايتىندا.

ازاماتتاردىڭ شاعىمى قالاي قارالادى؟

ريەلتورلىق قىزمەتتى ءوزىن-ءوزى رەتتەۋ جۇيەسىن دامىتۋ ۇسىنىلدى. بۇل جۇيە ەنگىزىلسە، كاسىبي بىرلەستىكتەر ءوز مۇشەلەرىنە ورتاق تالاپتار بەلگىلەپ، ولاردىڭ جۇمىسىن باقىلايدى. سونداي-اق ازاماتتاردىڭ شاعىمدارىن قاراپ، تالاپتى بۇزعان ماماندارعا قاتىستى شارا قولدانۋعا قاتىسا الادى.

مينيسترلىك قاجەتسىز قىزمەتتەردى ماجبۇرلەپ ۇسىنۋعا، كەلىسىمشارتقا تۇتىنۋشىعا ءتيىمسىز تالاپتار ەنگىزۋگە جانە نەگىزسىز كوميسسيا الۋعا جول بەرمەيتىن قوسىمشا زاڭنامالىق شارالاردى دا قاراستىرىپ جاتىر. ازىرگە اتالعان وزگەرىستەر ۇسىنىس رەتىندە تالقىلانۋدا. ولاردى ەنگىزۋ مەرزىمى مەن ناقتى ءتارتىبى كەيىن بەلگىلى بولادى.