بۇل سۇراقتارعا زاڭگەرلىك كەڭەسشى ارىس داناگاتوۆ Kazinform تىلشىسىنە ءتۇسىندىردى.
زاڭگەردىڭ ايتۋىنشا، رەيس الدىنداعى جانە رەيستەن كەيىنگى مەديتسينالىق تەكسەرۋدەن وتكىزۋ مىندەتى اۆتوموبيلمەن تاسىمالداۋ قىزمەتىن جۇزەگە اسىراتىن ۇيىمدار مەن كاسىپكەرلەرگە جۇكتەلەدى.
بۇعان جولاۋشىلار مەن باگاجدى تۇراقتى جانە تۇراقتى ەمەس باعىتتار بويىنشا تاسىمالداۋ، سونىڭ ىشىندە اۆتوبۋس، شاعىن اۆتوبۋس جانە تاكسي قىزمەتى، سونداي- اق جۇك تاسىمالى كىرەدى. مۇنداي تالاپتار جولاۋشىلار مەن باگاجدى اۆتوموبيل كولىگىمەن تاسىمالداۋ قاعيدالارىندا جانە اۆتوموبيل كولىگىمەن جۇك تاسىمالداۋ قاعيدالارىندا كوزدەلگەن.
— تاسىمالداۋشى دەپ جولاۋشىلاردى، باگاجدى، جۇكتەردى نەمەسە پوشتانى اقىلى نەگىزدە جەتكىزەتىن تۇلعا تانىلادى. ال كومپانيانىڭ قاراپايىم جەڭىل اۆتوكولىگى بۇل ساناتقا جاتپايدى، — دەپ ءتۇسىندىردى ارىس داناگاتوۆ.
دەمەك كومپانيانىڭ نەگىزگى قىزمەتى تاسىمالمەن بايلانىستى بولماسا جانە اۆتوكولىك تەك قىزمەتتىك ماقساتتا پايدالانىلسا، كولىكتىڭ ۇيىم مەنشىگىندە بولۋى جۇرگىزۋشىنى كۇن سايىن رەيس الدىنداعى مەديتسينالىق تەكسەرۋدەن وتكىزۋگە مىندەتتەمەيدى.
سونىمەن قاتار جۇمىسشىلاردىڭ مەرزىمدىك مەديتسينالىق تەكسەرۋدەن ءوتۋ ءتارتىبى بار. ول دەنساۋلىق ساقتاۋ مينيسترلىگى بەكىتكەن وندىرىستىك ورتا فاكتورلارى مەن كاسىپتەر تىزبەسىنە سايكەس جۇرگىزىلەدى. مۇنداي تەكسەرۋ جۇمىسقا قابىلدانعان كەزدە جانە ودان كەيىن بەلگىلەنگەن مەرزىم سايىن وتكىزىلۋى مۇمكىن. الايدا ونى كۇندەلىكتى رەيس الدىنداعى مەديتسينالىق تەكسەرۋمەن شاتاستىرماعان ءجون.
مەديتسينالىق تەكسەرۋدەن وتپەگەنى ءۇشىن قانداي ايىپپۇل بار؟
جۇرگىزۋشىنى مىندەتتى رەيس الدىنداعى مەديتسينالىق تەكسەرۋدەن وتكىزبەي جولعا شىعارعانى ءۇشىن اكىمشىلىك جاۋاپكەرشىلىك جولاۋشىلاردى، باگاجدى جانە جۇكتەردى تاسىمالداۋ قىزمەتىنە قاتىستى قولدانىلادى.
زاڭگەر كەلتىرگەن تۇسىندىرمەگە سايكەس، ايىپپۇل مولشەرى:
لاۋازىمدى تۇلعالار مەن شاعىن كاسىپكەرلىك سۋبەكتىلەرى ءۇشىن — 30 اەك؛
ورتا كاسىپكەرلىك سۋبەكتىلەرى ءۇشىن — 40 اەك؛
ءىرى كاسىپكەرلىك سۋبەكتىلەرى ءۇشىن — 50 اەك.
سونىمەن بىرگە زاڭگەردىڭ ايتۋىنشا، تاسىمالداۋمەن اينالىسپايتىن كومپانيالاردىڭ قاراپايىم قىزمەتتىك جەڭىل اۆتوكولىكتەرىنە بۇل تالاپتى قولدانۋعا نەگىز جوق.
پوليتسيا مەدتەكسەرۋ بەلگىسىن تالاپ ەتسە، نە ىستەۋ كەرەك؟
ەگەر قۇجاتتاردى تەكسەرۋ كەزىندە پوليتسيا قىزمەتكەرى جۇرگىزۋشىدەن رەيس الدىنداعى مەديتسينالىق تەكسەرۋدەن وتكەنى تۋرالى بەلگىسى بار جول پاراعىن تالاپ ەتسە، جۇرگىزۋشى نەمەسە كومپانيا وكىلى ۇيىمنىڭ نەگىزگى قىزمەت ءتۇرىن ءتۇسىندىرۋى كەرەك.
اتاپ ايتقاندا كومپانيانىڭ نەگىزگى ەكونوميكالىق قىزمەت ءتۇرىن كورسەتەتىن ەقجج (وكەد) كودتارى تۋرالى مالىمەتتى ۇسىنۋعا بولادى. ەگەر وسى تۇسىندىرمەگە قاراماستان كومپانياعا قاتىستى اكىمشىلىك حاتتاما تولتىرىلسا، وعان شاعىم تۇسىرۋگە بولادى. زاڭگەردىڭ تۇسىندىرۋىنشە، شاعىمدا رەيس الدىنداعى مەديتسينالىق تەكسەرۋدەن ءوتۋ مىندەتى تەك تاسىمالداۋشىلارعا قاتىستى ەكەنىن كورسەتۋ قاجەت.