ۆەدومستۆونىڭ مالىمەتىنشە، وسىمدىك شارۋاشىلىعىنىڭ تيىمدىلىگىن ارتتىرۋ، زاماناۋي اگروتەحنولوگيالاردى ەنگىزۋ جانە اگرارلىق ءوندىرىستىڭ كليمات وزگەرىستەرىنە توزىمدىلىگىن نىعايتۋ جۇمىستارى جالعاسىپ جاتىر.
نەگىزگى شارالار مەملەكەت باسشىسىنىڭ اۋىل شارۋاشىلىعىنىڭ جالپى ءونىم كولەمىن ەكى ەسە ارتتىرۋ جونىندەگى تاپسىرماسىنا سايكەس ازىرلەنگەن 2024-2028 -جىلدارعا ارنالعان جول كارتاسىندا قامتىلعان.
باسىم باعىتتاردىڭ ءبىرى - ەگىس القاپتارىنىڭ قۇرىلىمىن ءارتاراپتاندىرۋ. اتاپ ايتقاندا، جوعارى تابىستى داقىلداردىڭ ۇلەسىن ۇلعايتۋ ارقىلى اۋىل شارۋاشىلىعى جەرلەرىن پايدالانۋدىڭ ەكونوميكالىق تيىمدىلىگىن ارتتىرۋ كوزدەلىپ وتىر.
بيىل ەليتالىق تۇقىمداردىڭ ۇلەسى جوسپارلانعان %11,6- دان اسىپ، %12- عا جەتتى. مينيسترلىك بۇل كورسەتكىشتى ودان ءارى ارتتىرۋ داقىلداردىڭ ونىمدىلىگى مەن قولايسىز اۋا رايىنا توزىمدىلىگىن كۇشەيتەتىنىن اتاپ ءوتتى.
- تاعى ءبىر ماڭىزدى مىندەت - مينەرالدى تىڭايتقىشتاردى قولدانۋ كولەمىن ۇلعايتۋ. بيىل اگرارشىلار 2,2 ميلليون توننا مينەرالدى تىڭايتقىش ەنگىزدى. بۇل عىلىمي نەگىزدەلگەن قاجەتتىلىكتىڭ %66- ىن قۇرايدى. تىڭايتقىشتاردى قولدانۋ كولەمىن ودان ءارى ارتتىرۋ ەگىنشىلىك تيىمدىلىگىن كوتەرىپ، اۋىل شارۋاشىلىعى القاپتارىنىڭ ونىمدىلىگىن جاقسارتۋعا مۇمكىندىك بەرەدى، - دەلىنگەن مينيسترلىك اقپاراتىندا.
سونىمەن قاتار اۋىل شارۋاشىلىعى تەحنيكاسىن جاڭارتۋ جۇمىستارى جۇرگىزىلىپ جاتىر. بيىل ماشينا- تراكتور پاركىن جاڭارتۋ دەڭگەيى %7- عا جەتكەن. جىل سوڭىنا دەيىن بۇل كورسەتكىشتى %8- عا جەتكىزۋ جوسپارلانعان.
كليماتتىڭ وزگەرۋى مەن سۋ رەسۋرستارىنا تۇسەتىن جۇكتەمەنىڭ ارتۋىنا بايلانىستى سۋ ۇنەمدەۋ تەحنولوگيالارىن ەنگىزۋ اۋقىمى دا كەڭەيتىلەدى.
مينيسترلىكتىڭ مالىمەتىنشە، اتالعان شارالار ءار گەكتاردان الىناتىن ءونىم كولەمىن تۇراقتى ارتتىرۋعا، ءونىمنىڭ وزىندىك قۇنىن تومەندەتۋگە جانە وتاندىق اۋىل شارۋاشىلىعىنىڭ باسەكەگە قابىلەتتىلىگىن نىعايتۋعا باعىتتالعان.
ايتا كەتەيىك، بۇعان دەيىن اۋىل شارۋاشىلىعى تەحنيكاسىن جاڭارتۋعا ارنالعان جەڭىلدىكتى ليزينگ باعدارلاماسىنىڭ قارجىلاندىرۋ كولەمى 2026 -جىلى 250 ميلليارد تەڭگەدەن 350 ميلليارد تەڭگەگە دەيىن ۇلعايتىلعانى حابارلانعان بولاتىن.