قازاقستاندا كيىم مەن ماتا وندىرۋشىلەرگە مەملەكەتتىك قولداۋدىڭ جاڭا شارالارى ۇسىنىلادى

استانا. KAZINFORM - قازاقستاندا وتاندىق شيكىزاتتى پايدالاناتىن جانە جۇمىس ورىندارىن اشاتىن جەڭىل ونەركاسىپ نىساندارىنا مەملەكەتتىك، كۆازيمەملەكەتتىك سەكتورلار، سونداي-اق جەر قويناۋىن پايدالانۋشىلار ارقىلى ۇزاق مەرزىمدى تاپسىرىستار بەرۋ جوسپارلانىپ وتىر.

Фото: ҚР Үкіметі

بۇل تۋرالى ق ر ونەركاسىپ جانە قۇرىلىس ۆيتسە-ءمينيسترى ولجاس ساپاربەكوۆ ۇكىمەت وتىرىسىنان كەيىنگى بريفينگىدە مالىمدەدى.

ۆيتسە-ءمينيستردىڭ ايتۋىنشا، جەڭىل ونەركاسىپ ەل ەكونوميكاسى ءۇشىن ەرەكشە ماڭىزعا يە. سەبەبى بۇل سالا حالىقتىڭ ەداۋىر بولىگىن جۇمىسپەن قامتىپ وتىر. وسىعان بايلانىستى ۇكىمەت اتالعان سەكتوردى دامىتۋعا ارنالعان 30 عا جۋىق تارماقتان تۇراتىن كەشەندى جوسپاردى بەكىتكەن.

قۇجاتتىڭ نەگىزگى ماقساتى - جۇمىس ىستەپ تۇرعان وندىرىستىك قۋاتتاردى تولىق جۇكتەۋ، كاسىپورىندار اراسىنداعى كووپەراتسيانى دامىتۋ جانە جەڭىل ونەركاسىپتىڭ تولىققاندى كلاستەرىن قالىپتاستىرۋ.

- ماتا وندىرەتىن كاسىپورىندار بار، تىگىن تىگەتىن كاسىپورىندار بار. الايدا كيىم تىگۋمەن اينالىساتىنداردىڭ بارلىعى بىردەي قازاقستان اۋماعىندا وندىرىلگەن ماتانى پايدالانا بەرمەيدى. وسىنداي ماسەلەلەر تۋىنداپ وتىر، - دەدى ولجاس ساپاربەكوۆ.

بۇل تۇيتكىلدى شەشۋ ءۇشىن مينيسترلىك دەپۋتاتتارمەن بىرلەسىپ، زاڭنامالىق تۇزەتۋلەر ازىرلەگەن. ناتيجەسىندە سالالىق كلاستەر ۇعىمى بەكىتىلدى. ەندى وسى اياسىندا كاسىپورىندار اراسىنداعى كووپەراتسيانى دامىتىپ، ءتيىستى مىندەتتەمەلەردى قابىلداعان ءوندىرىس ورىندارىنىڭ جۇمىسىن تۇراقتى تاپسىرىسپەن قامتاماسىز ەتۋ جوسپارلانىپ وتىر.

اتاپ ايتقاندا، كاسىپورىندار وتاندىق شيكىزاتتى پايدالانۋعا، حالىقتىڭ الەۋمەتتىك وسال توپتارى ءۇشىن جۇمىس ورىندارىن اشۋعا جانە ەكسپورتقا نەمەسە جاپپاي تۇتىنۋ نارىعىنا باعىتتالعان ءونىم شىعارۋعا مىندەتتەمە الۋى ءتيىس.

- قاراپايىم تىلمەن ايتقاندا، ەگەر ءبىز وسىندا كيىم تىگەتىن بولساق جانە كاسىپورىن قازاقستاندا وندىرىلگەن شيكىزاتتى بارىنشا پايدالانۋعا، سونداي-اق جەڭىل ونەركاسىپ سالاسىندا حالىقتىڭ الەۋمەتتىك وسال توپتارىن جۇمىسپەن قامتۋعا مىندەتتەمە السا، وندا ءبىز وعان قولداۋ كورسەتەمىز. سونىمەن قاتار كاسىپورىن ەكسپورتقا نەمەسە جاپپاي تۇتىنۋ نارىعىنا شىعۋعا باعىتتالعان جاڭا ونىمدەر شىعارۋى كەرەك. وسى تالاپتاردى ورىنداعان جاعدايدا، ونى مەملەكەتتىك ساتىپ الۋ، كۆازيمەملەكەتتىك سەكتور جانە جەر قويناۋىن پايدالانۋشىلاردىڭ ساتىپ الۋى ارقىلى ۇزاق مەرزىمدى تاپسىرىستارمەن قامتاماسىز ەتەمىز، - دەپ ءتۇسىندىردى ۆيتسە-مينيستر.

ونىڭ ايتۋىنشا، قازىرگى ۋاقىتتا ءتيىستى تۇزەتۋلەر مەملەكەتتىك ورگاندار مەن قۇرىلتاي دەپۋتاتتارى اراسىندا بەلسەندى تالقىلانىپ جاتىر. قاجەتتى شەشىمدەردىڭ ءبىر بولىگى زاڭعا تاۋەلدى اكتىلەر دەڭگەيىندە قابىلدانسا، ەندى بىرىنە زاڭناماعا وزگەرىستەر ەنگىزۋ قاجەت بولادى.

مينيسترلىك جاڭا تەتىكتەر جەڭىل ونەركاسىپ كاسىپورىندارىندا ۋاقىتشا ەمەس، تۇراقتى جۇمىس ورىندارىن اشۋعا مۇمكىندىك بەرەدى دەپ بولجايدى.

- ءبىزدىڭ نەگىزگى ماقساتىمىز - قىزمەتكەرلەردىڭ لايىقتى جالاقىمەن قامتاماسىز ەتىلۋىن جانە بىلىكتىلىگىن ارتتىرۋ ماسەلەلەرىن دە ەسكەرۋ. ياعني كاسىپورىندار ادامداردى بەلگىلى ءبىر ۋاقىتقا نەمەسە قىسقا مەرزىمدى تاپسىرىسقا عانا جۇمىسقا الىپ، كەيىن بوساتىپ جىبەرمەۋى كەرەك. ءار ادام تۇراقتى جۇمىس ىستەپ، وسى ءوندىرىس سالاسىندا كاسىبي تۇرعىدان دامىپ، ۇزاق مەرزىمدى ىنتىماقتاستىققا سەنىم ارتا الۋى قاجەت، - دەپ تۇيىندەدى ولجاس ساپاربەكوۆ.

ايتا كەتەيىك، بۇعان دەيىن وتاندىق جەڭىل ونەركاسىپكە مەملەكەتتىك ساتىپ الۋدا باسىمدىق بەرىلەتىنىن جازعانبىز.