2026-جىلعى 1-تامىزدان باستاپ كۇشىنە ەنگەن جاڭا تالاپ ونەركاسىپ جانە قۇرىلىس ءمينيسترىنىڭ 19-ناۋرىزداعى بۇيرىعىنا سايكەس ەنگىزىلگەن. بۇل قۇرىلىس سالاسىن BIM (Building Information Modeling) تەحنولوگيالارىنا كوشىرۋدىڭ العاشقى كەزەڭى سانالادى.
جوسپار بويىنشا 2028-جىلعى 1-قاڭتاردان باستاپ BIM تەحنولوگيالارىن قولدانۋ I جانە II ساناتتاعى اۆتوموبيل جولدارىن جوبالاۋ كەزىندە دە مىندەتتى بولادى.
ال 2030-جىلعى 1-قاڭتاردان باستاپ بۇل تالاپ جاۋاپكەرشىلىگى ءۇشىنشى دەڭگەيدەگى وبەكتىلەردى قوسپاعاندا، بارلىق قۇرىلىس نىسانىنا قولدانىلادى.
- 2026-جىلعى 1-تامىزدان باستاپ قازاقستاندا ۇزىندىعى 100 مەتر جانە ودان اساتىن كوپىرلەردى جوبالاۋ كەزىندە اقپاراتتىق مودەلدەۋدى قولدانۋ مىندەتتى بولدى، - دەپ مالىمدەدى ينستيتۋت.
وسى باعىتتا «قازجولعزي» اۆتوموبيل جولدارىندا BIM تەحنولوگياسىن قولدانۋعا ارنالعان ۆەدومستۆولىق ەرەجەلەر جيناعىن ازىرلەدى.
ينستيتۋتتىڭ اقپاراتتىق مودەلدەۋ تەحنولوگياسىمەن دايىنداعان العاشقى جوباسى - ورال قالاسىنداعى كوپىر وتكەلى مەن وعان كىرەبەرىس جولداردىڭ جۇمىس جوباسى. ءقازىر قۇجاتتار «مەمساراپتاما» رەسپۋبليكالىق مەملەكەتتىك كاسىپورنىندا قارالىپ جاتىر.
سونىمەن قاتار كوپىرلەردىڭ تەحنيكالىق جاي-كۇيىن تەكسەرۋگە جاڭا سيفرلىق ادىستەر ەنگىزىلۋدە.
ماماندار LiDAR تەحنولوگياسىنىڭ كومەگىمەن اۋەدەن جانە جەردەن لازەرلىك سكانەرلەۋ، سونداي-اق فوتوگراممەتريا ادىستەرىن پايدالانىپ، كوپىرلەردىڭ ۇشولشەمدى مودەلدەرىن جاسايدى.
بۇل تەحنولوگيالار كوپىرلەردىڭ گەومەتريالىق ولشەمدەرى مەن تەحنيكالىق جاي-كۇيى تۋرالى ناقتى دەرەكتەر الۋعا مۇمكىندىك بەرەدى.
جينالعان اقپارات «قازجولعزي» ازىرلەگەن كوپىرلەردى پايدالانۋدى باسقارۋ جۇيەسىنە ەنگىزىلەدى. وندا ءاربىر نىساننىڭ سيپاتتاماسى، تەكسەرۋ ناتيجەلەرى جانە قازىرگى تەحنيكالىق جاعدايى ساقتالادى.
بۇدان بولەك، ينستيتۋت I- V ساناتتاعى اۆتوموبيل جولدارىن ورتاشا جوندەۋ كەزىندە جول توسەمدەرىن كۇشەيتۋگە ارنالعان ۇلگىلىك كونسترۋكسيالار جوباسىن ازىرلەدى.
سونداي-اق پولشانىڭ جولدار مەن كوپىرلەر عىلىمي-زەرتتەۋ ينستيتۋتىمەن بىرلەسكەن زەرتتەۋلەر جۇرگىزۋ، پيلوتتىق جوبالاردى ىسكە اسىرۋ جانە قازاقستاننىڭ كليماتتىق ەرەكشەلىكتەرىنە بەيىمدەلگەن كوپىر كونسترۋكتسيالارىن ازىرلەۋ جوسپارلانىپ وتىر.
ايتا كەتەيىك، بۇعان دەيىن «قازجولعزي» اتىراۋداعى ورتالىق كوپىردىڭ سيفرلىق كوشىرمەسىن ازىرلەۋگە كىرىسكەن ەدى. ۇزىندىعى 260 مەتر بولاتىن كوپىردىڭ تەحنيكالىق جاي-كۇيىن باعالاۋ ءۇشىن كەشەندى تەكسەرۋ جانە سيفرلىق مودەلدەۋ جۇمىستارى جۇرگىزىلىپ جاتقانى حابارلانعان.