قازىرگى ۋاقىتتا سالادا ءۇش ءىرى ينۆەستيتسيالىق جوبانى ىسكە اسىرۋ باستالدى.
قاراعاندى وبلىسىندا جىلىنا 1 ميلليون توننا مەتاللۋرگيالىق كوكس وندىرەتىن زاۋىت سالۋ جوباسى ىسكە اسىرىلۋدا. قىتايلىق ينۆەستورمەن ينۆەستيتسيالار تۋرالى كەلىسىمگە قول قويىلدى.
پاۆلودار وبلىسىندا «Naz Dan Group» ج ش س كومىردەن ديزەل وتىنىن ءوندىرۋ جوباسىن ىسكە اسىرۋدا. كاسىپورىننىڭ قۋاتى جىلىنا 100 مىڭ توننانى قۇرايدى. كومپانياعا جەر قويناۋىن پايدالانۋ ليتسەنزياسى بەرىلدى.
قاراعاندى وبلىسىندا «Alfa Plast» ج ش س جىلىنا 100 مىڭ توننا ديزەل وتىنىن ءوندىرۋ قۋاتتىلىعىنا يە ۇقساس جوبانى ىسكە اسىرۋدا. جەر قويناۋىن پايدالانۋ ليتسەنزياسى بەرىلدى.
- كومىر حيمياسى سالاسىن جۇيەلى دامىتۋ ماقساتىندا ەنەرگەتيكا مينيسترلىگى كومىر حيمياسى جانە كومىر ءوندىرۋشى كومپانيالارمەن، سونداي-اق باسقا دا مۇددەلى ۇيىمدارمەن بىرلەسىپ، 2026-2031-جىلدارعا ارنالعان قازاقستاننىڭ كومىر حيمياسى ونەركاسىبىن دامىتۋ جونىندەگى جول كارتاسىنىڭ جوباسىن ازىرلەدى. جول كارتاسىنىڭ جوباسىنا كومىردى تەرەڭ وڭدەۋگە باعىتتالعان ءبىرقاتار پەرسپەكتيۆالى جوبالار ەنگىزىلدى،-دەلىنگەن حابارلامادا.
اتاپ ايتقاندا، قاراعاندى وبلىسىندا «Qarmet» ا ق بازاسىندا جىلىنا 200 مىڭ تونناعا دەيىن شايىردى وڭدەۋدى، 35 مىڭ تونناعا دەيىن بەنزول ءوندىرۋدى جانە كوكس گازىن تازارتۋدى كوزدەيتىن كوكسوحيميا كلاستەرىن دامىتۋ جوسپارلانۋدا.
اباي وبلىسىندا «Samal Commodities» ج ش س 300 مىڭ توننا اممياك جانە 520 مىڭ توننا كارباميد ءوندىرۋدى جوسپارلاپ وتىر.
پاۆلودار وبلىسىندا «قاز نەدرو رەسۋرس» ج ش س سارىكول كەن ورنى بازاسىندا جىلىنا 100 مىڭ توننا ديزەل وتىنىن ءوندىرۋ جوباسىن قاراستىرۋدا.
كومىر حيمياسىن دامىتۋ كومىردى پايدالانۋدىڭ نەگىزىنەن شيكىزاتتىق مودەلىنەن جوعارى قوسىلعان قۇنى بار ءونىم وندىرۋگە كوشۋگە مۇمكىندىك بەرەدى.
ايتا كەتەيىك، بۇعان دەيىن قازاقستاندا كومىردى تەرەڭ وڭدەۋ ارقىلى سينتەتيكالىق وتىن مەن حيميالىق ونىمدەر شىعارۋ باعىتىن دامىتۋ جوسپارلانىپ وتىرعانى حابارلانعان. ەلدەگى كومىر قورى شامامەن 34 ميلليارد توننانى قۇرايدى.